រាជធានីភ្នំពេញ ៖ អ្នកគួកជេរថយន្តពីរនាក់ប្តីប្រពន្ធត្រូវចោរប្លន់ប្រដាប់អាវុធ ភ្ជង់និងវាយបំបែកក្បាលដោយកាំភ្លើងខ្លីប្លន់យកកាបូបលុយ មានប្រាក់ជាង១.០០០ដុល្លារ និងទូរស័ព្ទដៃស៊េរីទំនើប២គ្រឿងគេចខ្លួនទៅបាត់ ខណៈពេលត្រឡប់ពីប្រកបមុខរបរវិញជិះរថយន្តដល់មុខលំនៅឋាន។ ហេតុការណ៍នេះបានកើតឡើងនៅចំណុចផ្ទះលេខ១២៣ ផ្លូវលេខ២៧ ភូមិឫស្សី សង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង៨និង១៥នាទីយប់ថ្ងៃទី២៧ កុម្ភៈ ២០១២។
ទាក់ទិននឹងសកម្មភាពប្លន់ខាងលើនេះបានឱ្យ ដឹងថា មុនពេលកើតហេតុឈ្មោះឈុន ប៉ីយុង ភេទប្រុស អាយុ៣៨ឆ្នាំ បានជិះរថយន្តម៉ាក LEXUS RX300 ពណ៌ស្ករ រួមដំណើរជាមួយប្រពន្ធត្រឡប់មកពីកន្លែងទិញលក់រថយន្តនៅ ម្តុំវត្តភ្នំវិញ លុះធ្វើដំណើរវដល់មុខលំនៅឋានក៏ឈប់រថយន្តត្រៀមលក្ខណៈបើកចូល ផ្ទះ ប៉ុន្តែខណៈពេលនោះក៏លេចមុខជនប្រដាប់អាវុធ៤នាក់ ជិះម៉ូតូ២គ្រឿងស្ទុះចូលមកធ្វើសកម្មភាពភ្ជង់ប្លន់យកកាបូប លុយពីភរិយារបស់ឈ្មោះឈុន ប៉ីយុង ដែលមានលុយជាង១.០០០ដុល្លារ និងទូរស័ព្ទដៃថ្មីៗចំនួន២គ្រឿងរួចហើយគេចខ្លួនបាត់ ។ ចំណែកឯឈ្មោះឈុន ប៉ីយុង ត្រូវចោរប្លន់ភ្ជង់ និងវាយបំបែកក្បាលដោយស្នាប់កាំភ្លើងខ្លីបែកឈាមហូររហាម ។ បន្ទាប់ពីធ្វើសកម្មភាពភ្ជង់ប្លន់យកបានកាបូបប្រាក់ហើយ ក្រុមចោរប្លន់បាននាំគ្នាឡើងជិះម៉ូតូបក្សពួករបស់គេបើករត់បាត់ អស់ ហើយបាញ់រះគំរាមលើអ្នកភូមិចំនួន៣គ្រាប់បន្ថែមទៀត ។
ចំពោះករណីខាងលើនេះសមត្ថកិច្ចមូលដ្ឋានបាន សន្និដ្ឋានថា អំពើប្លន់នេះមានចរិតជារឿងគំនុំនៃមុខរបររកស៊ីរបស់ឈ្មោះ ឈុន ប៉ីយុង ។ ប៉ុន្តែសមត្ថកិច្ចក៏ពុំបានបដិសេធចោលនូវសកម្មភាពប្លន់ទាំង ស្រុងដែរ ព្រោះបទល្មើសជាក់ស្តែងគឺជាសកម្មភាពប្លន់ ។ សូមរំលឹកថា កាលពីព្រឹកថ្ងៃទី២៥ កុម្ភៈ ២០១២ ក៏មានអំពើភ្ជង់បាញ់ប្លន់យកម៉ូតូម៉ាក C125 ស៊េរីឆ្នាំ២០១២ មួយគ្រឿង ពីគ្រូបង្រៀនម្នាក់ ប៉ុន្តែពុំបណ្តាលឱ្យរងរបួសម្ចាស់ម៉ូតូឡើយ។ ហេតុការណ៍កាលពីពេលកន្លងមកថ្មីៗនេះបានកើតមានឡើងនៅមុខ ទីស្នាក់ការមន្ត្រីនគរបាលប៉ុស្តិ៍រដ្ឋបាលស្ទឹងមានជ័យតែម្តង។
ករណីដោយឡែកមួយទៀតកាលពីរសៀលថ្ងៃទី២៧ កុម្ភៈ ២០១២ មានចោរប្លន់ម្នាក់ប្រើប្រាស់មធ្យោបាយថ្មើរជើងប្រដាប់ដោយដាវ សាមូរ៉ៃមួយដើមបានភ្ជង់ប្លន់យកទូរស័ព្ទដៃពីសិស្សវិទ្យាល័យ ច្បារអំពៅម្នាក់នៅខាងក្រោយសាលា យកបានខ្សែ.កប្លាទីន១ខ្សែ ទម្ងន់២ជី និងទូរស័ព្ទដៃម៉ាកអាយហ្វូន១គ្រឿងទៅបាត់ប៉ូលិសកំពុងត្រជាក់ ល្ហឹមនៅឡើយទេ ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
