(ភ្នំពេញ)៖ វគ្គជម្រុះពានរង្វាន់អាស៊ាន AFF Suzuki Cup 2016 ដែលមានកម្ពុជាធ្វើម្ចាស់ផ្ទះនឹងបញ្ចប់ទៅវិញល្ងាចថ្ងៃសុក្រ ទី២១ ខែតុលានេះហើយ គ្រាដែលក្រុមបាល់ទាត់កម្ពុជា ត្រូវជួបទីម័រឡេស្តេ និងឡាវ ប៉ះប្រ៊ុយណេនាម៉ោង ៦៖៣០នាទីដូចគ្នា។
មិនលំបាកនោះទេសម្រាប់ក្រុមគោព្រៃកម្ពុជា ដែលត្រូវជួបក្រុមបាតតារាងទំម័រឡេស្តេក្នុងពហុកីឡដ្ឋានជាតិអូឡាំពិក ដែលមានអ្នកទស្សនាច្រើនកុះករ ក្រោមតម្លៃសំបុត្រ ១ម៉ឺនរៀល ក្រោមដំបូល និង ៥ពាន់រៀល នៅក្រៅដំបូល ជាមួយនឹងក្តីសង្ឃឹមខ្ពស់ឡើងទៅវគ្គចែកពូលនៅប្រទេសម្ចាស់ផ្ទះមីយ៉ាន់ម៉ា បន្ទាប់ពីកម្ពុជារកបាន៦ពិន្ទុពេញ ពីការឈ្នះ២ប្រកួតជាប់ៗគ្នាទៅលើក្រុមឡាវ ២-១ មុនបំបាក់ប្រ៊ុយណេ ៣-០ ទៀត។
ប្រវត្តិជួបគ្នា៥ដង គិតចាប់តាំងពីឆ្នាំ២០០៨មក កម្ពុជា បានយកឈ្នះទីម័រឡេស្តេ (Timor Leste) ៣ដងដោយលទ្ធផល ៣-២ ៤-២ និងមិត្តភាពចុងក្រោយនាពេលថ្មីៗនេះឈ្នះ ២-០ ក្រៅពីស្មើ១ដង ដោយលទ្ធផល ២-២ និងចាញ់១ប្រកួត ដោយលទ្ធផល ៥-១។
សូមបញ្ជាក់ផងដែរថា លេង២ប្រកួតមកនេះ កម្ពុជារបូតតែ១គ្រាប់គត់ ក្រៅពីស៊ុតបញ្ចូលទីគេបាន ៥គ្រាប់ ខណៈទីម័រស៊ុតបញ្ចូលទីគេបាន២គ្រាប់ និងរបូតវិញ៤គ្រាប់។ កម្ពុជាប្រាថ្នាត្រឹមស្មើប៉ុណ្ណោះ ដើម្បីផ្តាច់ក្តីសង្ឃឹមរបស់ឡាវ និងប្រ៊ុយណេ ដែលប្រកួតគ្នានៅពហុកីឡដ្ឋាន RSN របស់ក្លឹបភ្នំពេញក្រោនដែលមាន៣ពិន្ទុក្នុងដៃដូចគ្នានោះ។ តែយ៉ាងក៏ដោយ កម្ពុជាត្រូវតែឈ្នះ ដើម្បីទទួលបានប្រាក់រង្វាន់ ៥ម៉ឺនដុល្លារពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលបានប្រកាសផ្តល់ប្រាក់រង្វាន់លើកទឹកចិត្ត ចំពោះជ័យជំនះទៅលើប្រ៊ុយណេ និងទីម័រឡេស្តេ៕
ប្រភព៖ Khmertalking
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា ក្រុមបាល់ទាត់កម្ពុជា ឡើងមកឈរនៅចំណាត់ថ្នាក់លេខ១៦៧ របស់ពិភពលោកជាប្រវត្តិសាស្រ្ត។ គួររំលឹកផងដែរថា ក្រុមបាល់ទាត់ជម្រើសជាតិកម្ពុជា បានកើន៦លេខពីចំណាត់ថ្នាក់លេខ១៧៣ មកកាន់ចំណាត់ថ្នាក់លេខ១៦៧ នៅក្នុងតារាងចំណាត់ថ្នាក់របស់ពិភពលោក FIFA Ranking គិតត្រឹមថ្ងៃព្រហស្បតិ៍ ទី២០ ខែតុលា ឆ្នាំ២០១៦ នេះ ក្នុងចំណោម ២១០ប្រទេសដែលជាសមាជិករបស់ FIFA។
ការកើនចំណាត់ថ្នាក់នេះដែរ គឺក្រុមគោព្រៃកម្ពុជា នៅឈរនៅលើក្រុមខ្លាំងប្រចាំតំបន់អាស៊ាន សិង្ហបុរីទៀតផងដែរ ដែលកំពុងឈរនៅចំណាត់ថ្នាក់ទី១៧១ នៅពេលដែលកម្ពុជាបានយកឈ្នះ ២-១ នៅស្តាតអូឡាំពិកក្នុងមិត្តភាពអន្តរជាតិ។
សូមបញ្ជាក់ផងដែរ នាពេលថ្មីៗនេះ ក្រុមគោព្រៃកម្ពុជា បានកំពុងតែលេងឡើងជើង និងសហការគ្នាបានល្អយកឈ្នះគូប្រកួតជាបន្តបន្ទាប់ មិនដែលស្មើឡើយ ក្រៅពីចាញ់តែហុងកុង១គត់ ក្រោមលទ្ធផល ៤-២ ក្នុងទឹកដីរបស់គេ និងចាញ់ ២-០ ក្នុងទឹកដីនៃពហុកីឡដ្ឋានជាតិអូឡាំពិកនៃជំនួបមិត្តភាពអន្តរជាតិ។
ទន្ទឹមគ្នានោះដែរ ក្រុមបាល់ទាត់អាហ្សង់ទីន បានឡើងទៅឈរនៅចំណាត់ថ្នាក់លេខ១ វិញ ដោយរុញច្រានអាល្លឹម៉ង់ ធ្លាក់មកលេខ២ ប្រេស៊ីលលេខ៣ និងប៊ែលហ្ស៊ិក ឈរនៅចំណាត់ថ្នាក់លេខ៤៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
