ផ្លូវជាតិលេខ៣ បន្ដជន់លិច នៅចន្លោះគីឡូម៉ែត្រលេខ ៣៤-៤៧ អាជ្ញាធរស្នើឲ្យប្រជាពលរដ្ឋមានរថយន្ដធុនធំ មេត្ដាវៀងផ្លូវ ទៅផ្លូវជាតិលេខ៤ វិញ

(កំពង់ស្ពឺ)៖ នៅព្រឹកថ្ងៃទី១៨ ខែតុលា ឆ្នាំ២០១៦នេះ លើកំណាត់ផ្លូវជាតិ៣ បន្ដជន់លិច នៅចន្លោះគីឡូម៉ែត្រលេខ៣៤ ដល់គីឡូម៉ែត្រលេខ៤៧ អាជ្ញាធរមូលដ្ឋានស្នើឲ្យប្រជាពលរដ្ឋ ដែលមានរថយន្ដធុនធំមេត្តាវៀងផ្លូវ ទៅផ្លូវជាតិលេខ៤វិញ ព្រោះនៅពេលនេះ ផ្លូវជាតិលេខ៤មានសភាពធម្មតាវិញហើយ។ នេះបើការឲ្យដឹងពីលោក ហុង ចាន់សុខា ប្រធានមន្ទីរសាធារណការ និងដឹកជញ្ជូន ខេត្តកំពង់ស្ពឺ។

លោក ប្រធានមន្ទីរសាធារណការ បានបញ្ជាក់យ៉ាងដូច្នេះថា «ផ្លូវជាតិលេខ៣ នៅបន្ដលិច៣កន្លែងដដែល យើងចង់ឲ្យប្រជាពលរដ្ឋ មានរថយន្ដធុនធ្ងន់វៀងផ្លូវសិន នៅចន្លោះគីឡូម៉ែត្រលេខ៣៤ ដល់៤៧ យើងមិនចង់ឲ្យគាត់ធ្វើដំណើរតាមហ្នឹងទេ ព្រោះកាលណាបើបើកកាត់វាអាចបណ្ដាលឲ្យខូចផ្លូវកាន់តែខ្លាំង ប៉ុន្ដែឡានតូចធ្វើដំណើរបានធម្មតា»។

ជាមួយគ្នានេះដែរ លោក ហុង ចាន់សុខា បានធ្វើការបដិសេធចោលទាំងស្រុង នូវពាក្យចចាមរាមថា ផ្លូវជាតិលេខ៤ មានការដាច់មិនអាចធ្វើចរាចរណ៍បាន ដែលនេះជាពាក្យមិនពិតនោះទេ ព្រោះពេលនេះ ផ្លូវជាតិលេខ៤ មានសភាពធម្មតាវិញហើយ៕

ប្រភព៖ Fresh News

កំណត់ហេតុខ្មែរឡូត៖

ដោយឡែក រំលឹកព័ត៌មានចាស់លើកមុនផងដែរថា  ផ្លូវជាតិលេខ៤ ត្រូវបានផ្អាកចរាចរណ៍បណ្តោះអាសន្ន ចំពោះរថយន្តធំ ព្រោះទឹកហូរកាត់ខ្លាំង នៅចំណុចអូរវែង ស្រុកភ្នំស្រួច ។ គួររំលឹកផងដែរថា សេចក្តីរាយការណ៍ ពីភ្នាក់ងារ Fresh News ប្រចាំខេត្តកំពង់ស្ពឺ បានបញ្ជាក់ឲ្យដឹងថា ផ្លូវជាតិលេខ៤ ត្រូវបានផ្អាកចរាចរណ៍រថយន្តធំ កាលពីព្រឹកថ្ងៃទី១៦ ខែតុលា ឆ្នាំ២០១៦ កន្លងទៅនេះ។

សេចក្តីរាយការណ៍បញ្ជាក់ថា បើយោងតាមកម្លាំងសមត្ថកិច្ច បានបញ្ជាក់ថា ដោយផ្នែកតាមបញ្ជាលោកអភិបាលខេត្តកំពង់ស្ពឺរថយន្តធំៗ នឹងផ្អាកចរាចរណ៍ដោយស្ថានភាពទឹក បានហូរកាត់ផ្លូវជាតិលេខ៤ ត្រង់ចំណុចអូរវែង ស្រុកភ្នំស្រួច ខេត្តកំពង់ស្ពឺ។

សមត្ថកិច្ចមានកម្លាំងអាវុធហត្ថ បានដាក់ការពារសុវត្តិភាពជូនម្ចាស់រថយន្ត និងត្រួតពិនិត្យខ្លាចមានបញ្ហាគ្រោះថ្នាក់ផ្សេងៗកើតឡើង ម៉្យាងការពារបាក់ខូចខាតផ្លូវជាតិផងដែរ៕