កូរ៉េខាងត្បូង៖ យ៉ាងហោចណាស់មនុស្សប្រមាណ៥នាក់ ត្រូវបានស្លាប់បាត់បង់ជីវិត យ៉ាងអាណោចអាធ័ម បន្ទាប់ពីព្យុះដ៏កាចសាហាវ ទីហ្វុង Chaba បានវាយប្រហារមកលើប្រទេសកូរ៉េខាងត្បូង ជាមួយនឹងល្បឿនខ្យល់បោកបក់យ៉ាងខ្លាំងក្លា និងមានភ្លៀងធ្លាក់ជោកជាំ បង្កការលិចលង់ផងដែរ។
បើតាមប្រភពបានឲ្យដឹងថា ភាគខាងត្បូងនៃទីក្រុង Busan និង Ulsan នៃប្រទេសកូរ៉េខាងត្បូង ត្រូវបានទទួលរងគ្រោះមហន្តរាយ ដោយសារតែគ្រោះមហន្តរាយទីហ្វុង Chaba បានវាយប្រហារ ប៉ះពាល់យ៉ាងខ្លាំងក្លា រួមទាំងរមណីយដ្ឋានកោះ Jeju ផងដែរ។
ទន្ទឹមនឹងនោះផងដែរ ការដឹកជញ្ជូននានា សាលារៀន រោងចក្រជាច្រើនកន្លែង និងកំពង់ផែដ៏សំខាន់របស់ប្រទេសនេះ ក៏ត្រូវបានជាប់គាំង និងបិទទ្វារបណ្តោះអាសន្នផងដែរ។ ហើយបើក្រឡេកទៅមើល វីដេអូឃ្លីបវិញ បានបង្ហាញឲ្យឃើញថា ល្បាប់នៃទឹកជំនន់បានហូរកាត់តាមដងផ្លូវ ក្នុងទីក្រុងមួយនេះ ជាមួយនឹងល្បឿនយ៉ាងខ្លាំងថែមទៀតផង។
គួរឲ្យដឹងថា តាមរយៈប្រភពដែលទទួលបាននេះ ព្យុះទីហ្វុងដ៏កាចសាហាវនេះ កំពុងតែបន្តដំណើរវាយប្រហារ ទៅកាន់ប្រទេសជប៉ុនហើយ ខណៈខាងទីភ្នាក់ងារឧតុនិយម ក៏បានចេញប្រកាស ឬសេចក្តីព្រមានឲ្យជើងហោះហើរទាំងអស់ ត្រូវលុបចោលផងដែរ។
គូសបញ្ជាក់បន្ថែមដែរថា ជុំវិញករណីគ្រោះធម្មជាតិ ព្យុះទីហ្វុង Chaba ក្នុងប្រទេសកូរ៉េខាងត្បូងនេះដែរ មនុស្សចំនួន៥នាក់ ត្រូវបានគេរាយការណ៍ថាបានបាត់ខ្លួន ក្នុងនោះមានអ្នកជួយសង្គ្រោះ (អ្នកពន្លត់អគ្គីភ័យ) ក្នុងក្រុង Ulsan ម្នាក់ផងដែរ ដែលបានព្យាយាមចូល ជួយសង្គ្រោះអ្នករងគ្រោះ។ នេះបើយោងតាម ប្រភពសារព័ត៌ក្នុងស្រុក បានរាយការណ៍ ៕
ទស្សនាវីដេអូ៖
ប្រភព៖ BBC
កំណត់ហេតុខ្មែរឡូត៖
គួររំលឹកព័ត៌មានចាស់ដែរថាព្យុះទីហ្វុង Meranti បន្តបោកបក់ទៅកាន់តំបន់ ភាគខាងត្បូងប្រទេសចិន បន្ទាប់ពីវាយប្រហារ យ៉ាងវឹកវរនៅ កោះតៃវ៉ាន់ ។
ប្រភពបានឲ្យដឹងថា ព្យុះទីហ្វុង Meranti ត្រូវគេចាត់ទុកថា ជាព្យុះដែលមានកម្លាំងខ្លាំងជាងគេបំផុត ក្នុងប្រវត្តិសាស្រ្តជាមួយនឹងល្បឿនចាប់ពី ២២៧គីឡូម៉ែត្រក្នុង១ម៉ោងឡើងទៅ។
គួររំលឹកថា ប្រជាជនប្រមាណកន្លះលាននាក់ រស់នៅកោះតៃវ៉ាន់ ត្រូវបានជម្លៀសចេញពីផ្ទះសំបែង កាលពីប៉ុន្មានថ្ងៃជាប់ៗគ្នានេះផងដែរ។
ដោយឡែកតាមប្រភពព័ត៌មាន ដែលទទួលបាន នាព្រឹកថ្ងៃព្រហស្បតិ៍ទី១៥ កញ្ញា ២០១៦ កន្លងទៅ បានរាយការណ៍ថា ព្យុះទីហ្វុង Meranti បានវាយលុកចូលមកក្បែរ តំបន់ប៉ែកអាគ្នេយ៍នៃទីប្រជុំជនក្រុង Xiamen ប្រទេសចិន ជាមួយនឹងល្បឿនខ្យល់បង្គួរតែបានបណ្តាលឲ្យបាក់ស្រុតដីជាច្រើនកន្លែងផងដែរ។
ប្រភពបន្តថា ជើងហោះហើរ និងខ្សែរថភ្លើងជាច្រើនកន្លែង ស្ថិតនៅភាគខាងត្បូងប្រទេសចិន ត្រូវបានលុបចោល ខណៈប្រជាជនប្រមាណ១០ពាន់នាក់ កំពុងតែត្រូវបានធ្វើការជម្លៀសចេញ ជាបន្តបន្ទាប់ផងដែរ។ មិនតែប៉ុណ្ណោះ ការបាក់ដីដែលបណ្តាលមកពី កម្លាំងខ្យល់ព្យុះទីហ្វុងនេះ ក៏បានបង្កជាការរំខានមួយ ក្នុងការប្រារព្ធធ្វើពីធីសែននំ ព្រះខែ ឬហៅថា «Mid-Autumn Festival» របស់ប្រជាជនចិនថែមទៀតផង។
គួរបញ្ជាក់ដែរថា នៅកោះតៃវ៉ាន់ មានមនុស្សស្លាប់ដោយសារព្យុះទីហ្វុង Meranti នេះចំនួនម្នាក់ និងមានអ្នករងរបួសចំនួន ៣៨នាក់ នេះបើតាមការឲ្យដឹងពីសំណាក់ មន្រ្តីជំនាញ។ តាមរយៈការព្យាករណ៍ វាអាចទៅរួចដែលកម្លាំងខ្យល់ព្យុះទីហ្វុងនេះ នឹងបង្កឲ្យមានការបាក់ស្រុតដី ជាបន្តទៀតនៅតាមតំបន់ភ្នំ នឹងនៅតាមតំបន់មួយចំនួនទៀត ជាមួយនឹងកម្រិតទឹកភ្លៀងធ្លាក់ ៨០០មីលីម៉ែត្រផងដែរ។
ទន្ទឹមនឹងនោះផងដែរ សាលារៀន និងការិយាល័យជាច្រើនកន្លែង គឺសុទ្ធតែត្រូវបានបិទទ្វារ ភាគច្រើនស្ថិតនៅភាគខាងកើត និងភាគខាងត្បូងនៃប្រទេស និងរងការប៉ះពាល់ខ្លាំងរហូតដល់ទៅ ប្រមាណ ៦៥០,០០០គ្រួសារ ដែលរស់នៅក្នុងតំបន់រងគ្រោះ។ បង្គោលភ្លើងអគ្គីសនី និងដើមឈើជាច្រើន គឺសុទ្ធសឹងតែត្រូវបានដួលរលំ ដោយសារតែកម្លាំងខ្យល់ព្យុះ សូម្បីតែរថយន្តដឹកទំនិញ និងដំបូលផ្ទះរបស់ប្រជាពលរដ្ឋ ក៏ត្រូវបានរបើក ប៉ើងចេញគ្មានសល់ដែរ។
ព្យុះទីហ្វុងមួយផ្សេងទៀតឈ្មោះថា Malakas ត្រូវបានគេរំពឹងថា នឹងវាយប្រហារបោកបក់ មកកាន់តំបន់កោះតៃវ៉ាន់ ជាថ្មីម្តងទៀតនៅថ្ងៃសុក្រ និងថ្ងៃសៅរ៍ ក្នុងសប្តាហ៍នេះ ប៉ុន្តែតាមការព្យាករណ៍ វាអាចមិនបណ្តាលឲ្យបាក់ស្រុកដីនោះទេ។
គួររំលឹកផងដែរថា កោះតៃវ៉ាន់ជាញឹកញាប់តែងតែ ត្រូវរងការវាយប្រហារពីឥទ្ធិពល ខ្យល់ព្យុះទីហ្វុង Dujuan និងធ្លាប់បានសម្លាប់មនុស្ស អស់៣នាក់ និងអ្នករងរបួសប្រមាណជា ៣០០នាក់រួចមកហើយកាលពីអំឡុងឆ្នាំ២០១៥ ផងដែរ។ លុះដល់អំឡុងខែកក្កដា ២០១៦ មនុស្ស៣នាក់ បានស្លាប់ និងរាប់រាប់រយនាក់ផ្សេងទៀត រងរបួសដោយសារព្យុះទីហ្វុង ដែលមានឈ្មោះថា Nepartak បោកបក់មកកាន់តំបន់ឆ្នេរកោះតៃវ៉ាន់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
