រាជធានីភ្នំពេញ ៖ បុរសម្នាក់ត្រូវបាននារីជាគូស្នេហ៍ និងក្រុមគ្រួសាររបស់នាងចាប់អូសចូលសាលាសង្កាត់ចោមចៅ កាលពីវេលាម៉ោង៨ និង៤៥នាទីព្រឹក ថ្ងៃទី២៧ ខែកញ្ញា ឆ្នាំ២០១៦ ដោយអះអាងថា នាងជាមួយគូស្នេហ៍នេះ បានរស់នៅជាមួយគ្នាដូចប្តីប្រពន្ធ៥ឆ្នាំហើយនៅពេលនេះ បែរជាប្រុសកំហូចរូបនេះមាន បំណងចង់ដោះដៃយករួចខ្លួនព្រមទាំងរត់ ចោលនាងទៀតផង ។
ប្រភពពីកន្លែងកើតហេតុបានឲ្យដឹងថា បុរសដែលត្រូវក្រុមគ្រួសារ និងគូស្នេហ៍ចាប់អូសចូលសាលាសង្កាត់ ដោះស្រាយគ្នានេះឈ្មោះ ភឿន សិទ្ធ អាយុ២២ឆ្នាំ អតីតកម្មកររោងចក្រ បច្ចុប្បន្នប្រកបរបរលក់ក្រួចអាំង ស្នាក់នៅម្តុំអូរដឹម សង្កាត់ចោមចៅ ខណ្ឌពោធិ៍សែនជ័យ មានស្រុកកំណើត នៅស្រុកបារាយណ៍ ខេត្តកំពង់ធំ ចំណែកនារីគូស្នេហ៍មានអាយុ២១ឆ្នាំ ជាកម្មការិនីរោងចក្រកាត់ដេរ ។
នារីវ័យក្មេងជាគូស្នេហ៍បានរៀបរាប់ទាំងទឹកភ្នែកថា ពួកនាងបានស្រលាញ់គ្នា៥ឆ្នាំហើយតាំងពីពួកនាងធ្វើការ នៅរោងចក្រជាមួយគ្នាមកម្ល៉េះ ។ ដោយសារតែពាក់លួងលោម ព្រមទាំងសន្យាថា នឹងចូលដណ្ដឹងរៀបការតាមប្រពៃណី នាងក៏សុខចិត្តលះបង់ព្រហ្មចារីយ៍ជូនប្រុសស្នេហ៍ ដើម្បីបញ្ជាក់ចិត្តស្មោះ ប៉ុន្តែប្រុសស្នេហ៍របស់នាងសន្យាថាចូលដណ្តឹងម្តងហើយម្តងទៀត ពោលគឺសន្យាឲ្យរួចតែពីមាត់ប៉ុណ្ណោះ ។ លុះរយៈពេល១ខែចុងក្រោយនេះប្រុស កំហូចនេះក៏ដាក់ពាក្យលាឈប់ការងារ ពីរោងចក្រ និងរត់ចោលបន្ទប់ជួលក្នុងបំណង ដោះដៃចោលនាង ។
នារីវ័យក្មេងរូបនេះបន្តទៀតថា បន្ទាប់ពីដឹងថា ប្រុសស្នេហ៍ចង់ដោះដៃ នាងក៏ប្រាប់ក្រុមគ្រួសារឲ្យដឹង ហើយក៏លើកគ្នាពីស្រុកមកភ្នំពេញ ដើម្បីតាមរកប្រុសកំហូចនេះរហូតប្រទះឃើញនៅម្តុំផ្សារអូរដឹម កាលពីព្រឹកថ្ងៃទី២៧ ខែកញ្ញា ឆ្នាំ២០១៦ ក៏នាំគ្នាចាប់អូសចូលសាលាសង្កាត់ដើម្បីដោះស្រាយគ្នា ។
ចំណែកភាគីខាងប្រុសដែលរងការចោទប្រកាន់នេះបានប្រាប់ឲ្យដឹងថា រូបគេមិនបានឆក់យកព្រហ្មចារីយ៍នាងឡើយ គឺគ្រាន់តែស្រឡាញ់គ្នាធម្មតាប៉ុណ្ណោះ ។
ចំពោះការឆ្លើយដោះសារបែបនេះ ត្រូវភាគីខាងស្រីបដិសេធទាំងស្រុក ដោយលើកឡើងថា នេះគ្រាន់តែជាពាក្យដោះសារយករួចខ្លួនប៉ុណ្ណោះ ដំណាច់តែលះបង់ខ្លួនប្រាណនិងចិត្ត៥ឆ្នាំហើយ មិនអាចឲ្យដោះដៃ បានដោយស្រួលបែបនេះទេ គឺត្រូវតែដោះស្រាយគ្នាឲ្យ បានច្បាស់លាស់សិន ។
ក្រោយពីប្រកែកប្រណាំងគ្នាកណ្ដាលផ្លូវអស់ចិត្ត ភាគីខាងស្រីក៏ចាប់អូសភាគីខាងប្រុសចូលទៅសាលាសង្កាត់ចោមចៅ ដើម្បីឲ្យអាជ្ញាធរជួយដោះស្រាយ ៕
ប្រភព៖ កោះសន្ដិភាព
ចំណាប់អារម្មណ៍ខ្មែរឡូត៖
សម្រាប់រឿងរ៉ាវស្នេហានេះដែរ កាលពីពេលថ្មីៗនេះក៏មានករណី នារីម្នាក់រងកម្មពេលយកប្ដីទី២ផងដែរ ក្រោយពីប្ដីទី១មានស្រី។
នៅក្នុងនោះបានឲ្យដឹងថា ប្តីចោទថាប្រពន្ធរវល់លេងទូរស័ព្ទមិនព្រមដួសបាយឲ្យហូប និងមិនព្រមចូលគេង ចំណែកប្រពន្ធថា ប្តីស្រវឹងស្រាបិទទ្វារមិនឲ្យចូលផ្ទះ ក៏ផ្ទុះជម្លោះបណ្ដាលឲ្យរបួសទាំងសងខាង និងបង្កឲ្យមានការភ្ញាក់ផ្អើលកាលពីវេលាម៉ោងជាង៨យប់ ថ្ងៃទី១៩ ខែកញ្ញា ឆ្នាំ២០១៦ នៅភូមិផ្សារកណ្ដាល សង្កាត់ផ្សារកណ្តាល ក្រុងប៉ោយប៉ែត ។
គ្រួសារផ្ទុះជម្លោះខាងលើនេះ ប្តីឈ្មោះ អាន ហេង អាយុ៣៤ឆ្នាំ ជាកម្មករសំណង់ ស្នាក់នៅបន្ទប់ជួលក្នុងភូមិកើតហេតុខាងលើ រីឯប្រពន្ធឈ្មោះ ម៉ែន អូន អាយុ៣៧ឆ្នាំ កម្មកររោងចក្រ ហាត ឌីស្ក នៅក្រុងប៉ោយប៉ែត ។
ជុំវិញបញ្ហាខាងលើ នាងជាប្រពន្ធបានច្រានចោលការចោទប្រកាន់ថា នាងរវល់លេងទូរស័ព្ទ តែការពិតនាងថាពេលប្តីមកពីធ្វើការបានរៀបចំបាយទឹកឲ្យប្តីរួចហើយ តែប្តីនាងក្រោយបាយបែរជាផឹកស្រាស្រវឹងចូលបន្ទប់បិទទ្វារមិនឲ្យនាងចូលផ្ទះ មិនតែប៉ុណ្ណោះពេលនាងហៅឲ្យបើកទ្វារបែរជាបុរសជាប្តីដាល់មួយដៃចំមុខ ទើបក្លាយជាជម្លោះកើតឡើង ។
ស្ត្រីជាប្រពន្ធប្រាប់ថា បុរសខាងលើជាប្តីទី២ទើបរស់នៅជុំគ្នាបាន៨ខែប៉ុណ្ណោះ ដោយប្តីមុននាងមានកូន២នាក់ តែប្តីនាងលួចទៅមានស្រីផ្សេង នាងក៏សម្រេចចែកផ្លូវ ដឹងអីមកយកប្តីក្រោយនេះរងកម្ម ត្រូវគេវាយធ្វើបាប និងគំរាមកំហែងញយដង ។ នាងបញ្ជាក់ថា នឹងមិនយកប្តីក្រោយនេះទៀតទេ ។
ទោះជាបែបណា គូជម្លោះខាងលើដោយសារនាងជាប្រពន្ធទាក់ទងទៅសមត្ថកិច្ចសុំការអន្តរាគមន៍ជួយ ទើបបុរសជាប្តីក្លាយជនសង្ស័យបង្កហិង្សាក្នុងគ្រួសារ ត្រូវនគរបាលប៉ុស្តិ៍រដ្ឋបាលសង្កាត់ផ្សារកណ្តាលសហការជាមួយនគរបាលក្រុងឃាត់ខ្លួនយកទៅអធិការដ្ឋាននគរបាលក្រុងប៉ោយប៉ែត ដើម្បីសួរនាំទាំងយប់តែម្តង ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
