(ភ្នំពេញ)៖ យុវតីពិការដៃទាំង២ឈ្មោះ អ៊ិត ស្រីណប់ បានឆ្លើយតបទៅអ្នកលេងបណ្ដាញសង្គម Facebook ថា នាងជាបេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) តាំងពីឆ្នាំ ២០១៥មកម៉្លេះ ដែលកាលនោះ នាងប្រឡងជាប់ទន្ទេស E មិនមែនដូចអ្វីដែលអ្នកលេង Facebook បង្ហោះចែកចាយនាពេលនេះថា នាងជាបេក្ខជនប្រឡងបាក់ឌុបឆ្នាំ ២០១៦នេះ ដោយទទួលបាននិទ្ទេស A នោះឡើយ។
យុវតី អ៊ិត ស្រីណប់ បានប្រាប់អង្គភាព Fresh News នៅរសៀលថ្ងៃទី១៣ ខែកញ្ញា ឆ្នាំ២០១៦នេះថា បន្ទាប់ក្រសួងអប់រំ យុវជន និងកីឡា បានប្រកាសលទ្ធប្រឡងបាក់ឌុប ជាផ្លូវការសម្រាប់ឆ្ នាំ២០១៦នេះ ស្រាប់តែមានអ្នកលេង Facebook មួយចំនួនធំ បានយករូបរបស់នាងទៅចែកចាយ ដោយបានសរសេរថា នាងប្រឡងបាននិទ្ទេស A ដូចនេះហើយទើប នាងបានបកស្រាយយ៉ាងច្បាស់ ដើម្បីកុំឲ្យមានការយល់ច្រឡំ និងមានជនខិលខូចមួយចំនួនយករូបរបស់នាងទៅធ្វើអាជីវកម្ម ទំនងចង់យកប្រយោជន៍ផ្ទាល់ខ្លួន (អាចប្រើរូបនាងទៅសុំការជួយឧបត្ថម្ភពីអ្នកផ្សេង)។
នាងបញ្ជាក់យ៉ាងដូច្នេះថា «គេដាក់ខ្ញុំថា បាននិទ្ទេស A ហើយព័ត៌មាននេះវាមិនពិត ខ្ញុំមិនចង់ឲ្យគេនិយាយថា ខ្ញុំជាមនុស្សពិការហើយ ទៅនិយាយព័ត៌មានមិនពិតដើម្បីបោកប្រាស់គេ ដោយពីមុនដំបូងមាន Page មួយបានផុសថា នាងខ្ញុំប្រឡងទទួលបាននិទ្ទេស A ហើយឆ្នាំហ្នឹងទៀត នេះវាខុសពីការពិតទាំងអស់ ខ្ញុំខ្លាចតែគេយករូបខ្ញុំទៅដើម្បីចង់បានប្រយោជន៍អ្វីមួយ ក្នុងការបោកប្រាស់មហាជន»។
ជាចុងក្រោយ យុវតី អ៊ិត ស្រីណប់ សូមសំណូមពរដល់អ្នកលេង Facebook ទាំងអស់ថា សូម Share ព័ត៌មានអ្វីដែលជាការពិត ដើម្បីកុំឲ្យមហាជនភ័ន្ដប្រឡំ ហើយចោទនាងថា ជាអ្នកបោកប្រាស់គេអី។
សូមបញ្ជាក់ថា យុវតី អ៊ិត ស្រីណប់ ជាកូនកំព្រាឪពុក មានស្រុកកំណើតនៅភូមិពាមជំនិត ឃុំវិហារហ្លួង ស្រុកពញ្ញាឮ ខេត្តកណ្តាល បច្ចុប្បន្ន ជានិស្សិតរៀននៅសកលវិទ្យាល័យភូមិន្ទភ្នំពេញ ផ្នែក IT ហើយការបន្ដសិក្សានេះ ស្ថិតនៅក្រោមការឧបត្ថម្ភទាំងស្រុង ដោយលោករដ្ឋមន្ដ្រីក្រសួងធនធានទឹក និងឧតុនិយម លឹម គានហោ និងជាប្រធានគណៈពង្រឹងស្រុកពញាឮ៕
ប្រភព៖ Fresh News
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា យុវសិស្សឈ្មោះ ហ៊ួត យូឡែន អាយុ១៦ឆ្នាំ មកពីវិទ្យាល័យហ៊ុន សែន ម៉េងហួត ស្វាយតានាន់ ឃុំកោះអណ្តែត ស្រុកស្រីសន្ធរ ពិការដៃទាំង២ បានប្រាប់ឲ្យដឹងថា រូបគេបានមានជំនឿយ៉ាងមុតមាំក្នុងចិត្តថា «នៅថ្ងៃដែលបានឈានជើងចូលប្រលងកាលពីថ្ងៃទី២២ និង២៣សីហាកន្លងទៅ ដោយរំពឹងថានឹងប្រលងជាប់» ដោយមើលឃើញពីសមត្ថភាពរបស់ខ្លួន ដែលបានខិតខំប្រឹងប្រែងរៀនសូត្រ ។
យុវសិស្ស យូ ឡែន ប្រាប់បន្តទាំងញញឹម និងចង់បង្ហូរទឹកភ្នែកថា ក្នុងបន្ទប់លេខ១ លេខតុទី៣ សម្រាប់សិស្ស រួមថ្នាក់ទាំងអស់ចំនួន២៥នាក់ គឺបានប្រលងជាប់ចំនួន១៥នាក់ ក្នុងនោះស្រី៩នាក់ ដោយរូបគេបានជាប់និទ្ទេស E ពិតជាមានក្តីរំភើបក្នុងចិត្ត ។ សម្រាប់គោលដៅរបស់ខ្លួន និងត្រូវបន្តការសិក្សានៅថ្នាក់ឧត្តមសិក្សាផ្នែកព័ត៌មានវិទ្យានៅរាជធានីភ្នំពេញ ដោយបានស្នាក់នៅផ្ទះរបស់បងប្រុស ។
យុវសិស្សឈ្មោះ ឆុន វ៉ាន់ណាត អាយុ១៩ឆ្នាំ ត្រូវជាមិត្តភក្តិរបស់ឈ្មោះ យូ ឡែន បានប្រាប់ឲ្យដឹងថា ចាប់តាំងពីរៀននៅសាលាបឋមសិក្សា ឈ្មោះ យូ ឡែន បានប្រឹងប្រែងរៀនសូត្ររហូតដល់ថ្នាក់វិទ្យាល័យទី១២ ហើយថែមទាំងមានចរិកសុភាពរាបសារ ហើយការរៀនទាំងប្រចាំខែ និងឆ្នាំទទួលបានលទ្ធផលគ្រាន់បើ ។ ហើយនៅព្រឹកថ្ងៃទី១១ កញ្ញា ២០១៦ ដោយសារតែ យូ ឡែន មិនមានមធ្យោបាយជិះមកមើលលទ្ធផលប្រលង រូបគេបានឌុបមកមើលទាំងអស់គា្ន រូបគេក៏ប្រលងជាប់ តែនៅមណ្ឌលផ្សេងគ្នាពិតជាសប្បាយចិត្ត ។
ស្ត្រីឈ្មោះ ហេង សុភី អាយុ៥៣ឆ្នាំ ជាម្តាយបង្កើតរបស់ យូ ឡែន ប្រាប់ឲ្យដឹងដែរថា នៅពេលដែលកូនប្រុស យូ ឡែន កើតមកនោះ ប្តីរបស់គាត់នៅពេលដែលឃើញកូនប្រុសកើតមកពិការដៃទាំងពីរបានយំបង្ហូរទឹកភ្នែកខ្លោចចិត្តអាណិតកូន សូម្បីតែគាត់ជាម្តាយក៏បានយំដែរ ក្រោយពីបានប្រសូតកូនរហូតទាស់គ្មានទឹកដោះឲ្យកូនបៅថែមទៀត ។ ក្រោយមកប្តីគាត់បានឈឺស្លាប់ ចំណែកកូនទាំង៤នាក់ក្នុងបន្ទុកត្រូវបានធ្លាក់ទៅលើគាត់ជាម្តាយ រាប់រងចិញ្ចឹមទាំងស្រុងតែម្តង ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]