ខេត្តកំពង់ចាម ៖ ថ្ងៃប្រកាសលទ្ធផលប្រលងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលបានធ្វើឡើងព្រមៗគ្នានៅព្រឹកថ្ងៃទី១១ កញ្ញា ២០១៦ នៅមណ្ឌលគរុកោសល្យនិងវិក្រិតការខេត្តក៏ដូចជាមណ្ឌលផ្សេងទៀតសរុប១១កន្លែង ។ អ្វីដែលគួរឲ្យកត់សម្គាល់ និងគួរឲ្យអបអរសាទរនោះគឺពិតជាមោទនភាពខ្លាំងណាស់ ដែលយុវសិស្សដែលពិការដៃទាំងសងខាងបានពុះពារគ្រប់ឧបសគ្គតូចធំរហូតបានប្រលងជាប់ដោយទឹកមុខញញឹមញញែម ។
យុវសិស្សឈ្មោះ ហ៊ួត យូឡែន អាយុ១៦ឆ្នាំ មកពីវិទ្យាល័យហ៊ុន សែន ម៉េងហួត ស្វាយតានាន់ ឃុំកោះអណ្តែត ស្រុកស្រីសន្ធរ ពិការដៃទាំង២ បានប្រាប់ឲ្យដឹងថា រូបគេបានមានជំនឿយ៉ាងមុតមាំក្នុងចិត្តថា «នៅថ្ងៃដែលបានឈានជើងចូលប្រលងកាលពីថ្ងៃទី២២ និង២៣សីហាកន្លងទៅ ដោយរំពឹងថានឹងប្រលងជាប់» ដោយមើលឃើញពីសមត្ថភាពរបស់ខ្លួន ដែលបានខិតខំប្រឹងប្រែងរៀនសូត្រ ។
យុវសិស្ស យូ ឡែន ប្រាប់បន្តទាំងញញឹម និងចង់បង្ហូរទឹកភ្នែកថា ក្នុងបន្ទប់លេខ១ លេខតុទី៣ សម្រាប់សិស្ស រួមថ្នាក់ទាំងអស់ចំនួន២៥នាក់ គឺបានប្រលងជាប់ចំនួន១៥នាក់ ក្នុងនោះស្រី៩នាក់ ដោយរូបគេបានជាប់និទ្ទេស E ពិតជាមានក្តីរំភើបក្នុងចិត្ត ។ សម្រាប់គោលដៅរបស់ខ្លួន និងត្រូវបន្តការសិក្សានៅថ្នាក់ឧត្តមសិក្សាផ្នែកព័ត៌មានវិទ្យានៅរាជធានីភ្នំពេញ ដោយបានស្នាក់នៅផ្ទះរបស់បងប្រុស ។
យុវសិស្សឈ្មោះ ឆុន វ៉ាន់ណាត អាយុ១៩ឆ្នាំ ត្រូវជាមិត្តភក្តិរបស់ឈ្មោះ យូ ឡែន បានប្រាប់ឲ្យដឹងថា ចាប់តាំងពីរៀននៅសាលាបឋមសិក្សា ឈ្មោះ យូ ឡែន បានប្រឹងប្រែងរៀនសូត្ររហូតដល់ថ្នាក់វិទ្យាល័យទី១២ ហើយថែមទាំងមានចរិកសុភាពរាបសារ ហើយការរៀនទាំងប្រចាំខែ និងឆ្នាំទទួលបានលទ្ធផលគ្រាន់បើ ។ ហើយនៅព្រឹកថ្ងៃទី១១ កញ្ញា ២០១៦ ដោយសារតែ យូ ឡែន មិនមានមធ្យោបាយជិះមកមើលលទ្ធផលប្រលង រូបគេបានឌុបមកមើលទាំងអស់គា្ន រូបគេក៏ប្រលងជាប់ តែនៅមណ្ឌលផ្សេងគ្នាពិតជាសប្បាយចិត្ត ។
ស្ត្រីឈ្មោះ ហេង សុភី អាយុ៥៣ឆ្នាំ ជាម្តាយបង្កើតរបស់ យូ ឡែន ប្រាប់ឲ្យដឹងដែរថា នៅពេលដែលកូនប្រុស យូ ឡែន កើតមកនោះ ប្តីរបស់គាត់នៅពេលដែលឃើញកូនប្រុសកើតមកពិការដៃទាំងពីរបានយំបង្ហូរទឹកភ្នែកខ្លោចចិត្តអាណិតកូន សូម្បីតែគាត់ជាម្តាយក៏បានយំដែរ ក្រោយពីបានប្រសូតកូនរហូតទាស់គ្មានទឹកដោះឲ្យកូនបៅថែមទៀត ។ ក្រោយមកប្តីគាត់បានឈឺស្លាប់ ចំណែកកូនទាំង៤នាក់ក្នុងបន្ទុកត្រូវបានធ្លាក់ទៅលើគាត់ជាម្តាយ រាប់រងចិញ្ចឹមទាំងស្រុងតែម្តង ។
នៅព្រឹកថ្ងៃទី១១ កញ្ញា ២០១៦ កូនប្រុសពៅទី៤ឈ្មោះ យូ ឡែន បានឆែក Facebook តាមទូរស័ព្ទដៃ ដំបូងមិនបានឃើញឈ្មោះរបស់ខ្លួនក៏យំបង្ហូរទឹកភ្នែក ស្ទុះមកឱបគាត់នៅលើផ្ទះ ហើយគាត់ក៏បានយំតាមកូនដែរ ។ បន្ទាប់បានឆែកមើលយ៉ាងល្អិតល្អន់ ទើបដឹងថាជាប់ ក៏សប្បាយចិត្តរំភើបថែមទាំងបង្ហូរទឹកភ្នែក ។ ក្រោយពីបានប្រលងជាប់ គាត់នឹងជំរុញឲ្យកូនរៀនសូត្របន្ថែមទៀតដើម្បីអនាគតភ្លឺស្វាង ៕
ប្រភព៖ កោះសន្តិភាព
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា រដ្ឋមន្រ្តីក្រសួងអប់រំ ភ្ញាក់ផ្អើលខ្លាំង នៅពេលឃើញសិស្សបាក់ឌុបឆ្នាំនេះ ទទួលបាននិទ្ទេស «A» ច្រើនជាងឆ្នាំមុនជិត៣ដង ។ គួររំលឹកផងដែរថា រដ្ឋមន្រ្តីក្រសួងអប់រំ យុវជន និងកីឡា លោក ហង់ ជួនណារ៉ុន បានបង្ហាញការភ្ញាក់ផ្អើលយ៉ាងខ្លាំង ដោយសារតែលទ្ធផលសិស្សប្រឡងបាក់ឌុបជាប់នៅឆ្នាំនេះ ទទួលបាននិទ្ទេស «A» ច្រើនជាងឆ្នាំមុនជិត៣ដង គឺមានចំនួនរហូតទៅដល់៤០៥នាក់នៅទូទាំងប្រទេស។
លោក ហង់ ជួនណារ៉ុន បានថ្លែងប្រាប់អង្គភាព Fresh News កាលពីរសៀលថ្ងៃទី១០ ខែកញ្ញា ឆ្នាំ២០១៦ កន្លងទៅនេះថា ក្រោយលទ្ធផលនៃការប្រឡងបាក់ឌុបនៅមណ្ឌលខេត្តកណ្តាល និងរាជធានីភ្នំពេញត្រូវបានប្រកាសថា «លទ្ធផលល្អនេះ បានកើតឡើង ដោយសារតែ កត្តាសិស្ស រួមបញ្ជូលនឹងកត្តាគ្រូ ហើយនឹងការសហការបានយ៉ាងល្អពី អាជ្ញាធរមានសមត្ថកិច្ចគ្រប់លំដាប់ថ្នាក់ និងពីអង្គភាពប្រឆាំងអំពើពុករលួយជាដើម»។
នៅមុននេះ ក្រសួងអប់រំ បានបង្ហាញលទ្ធផលប្រឡងបាក់ឌុប នៅឆ្នាំនេះឲ្យដឹងថា មានអ្នកជាប់ ៦២.១៨ភាគរយ ក្នុងនោះ មានអ្នកជាប់និទ្ទេស A ចំនួន៤០៥នាក់ និទ្ទេស B ចំនួន២៨០១នាក់ និទ្ទេស C ចំនួន៥ ៥៩៥នាក់ និង និទ្ទេស E មានចំនួន៣៨ ១១៧នាក់។
បេក្ខជនទទួលបាននិទ្ទេស A ចំនួន ៤០៥នាក់ មកពី៖ រាជធានីភ្នំពេញ មានចំនួន ១៨៣នាក់, សៀមរាប មានចំនួន ៣៦នាក់, បាត់ដំបង មានចំនួន ៣៤នាក់, កណ្តាល មានចំនួន ២៩នាក់, កំពង់ចាម មានចំនួន ២០នាក់, បន្ទាយមានជ័យ មានចំនួន ១៦ នាក់, ព្រៃវែង មានចំនួន ១៤ នាក់, កំពត មានចំនួន ១១ នាក់, ត្បូងឃ្មុំ មានចំនួន ១១នាក់, តាកែវ មានចំនួន ១១នាក់, កំពង់ធំ មានចំនួន ១០នាក់, ក្រចេះ មានចំនួន ០៩នាក់, កំពង់ឆ្នាំង មានចំនួន ០៧នាក់, ព្រះសីហនុ មានចំនួន ០៧នាក់, កំពង់ស្ពឺ មានចំនួន ០២នាក់, ពោធិ៍សាត់ មានចំនួន ០២នាក់, មណ្ឌលគិរី មានចំនួន ០១នាក់, ប៉ៃលិន មានចំនួន ០១នាក់, ឧត្តរមានជ័យ មានចំនួន ០១នាក់។
ក្រោយចេញលទ្ធផលនេះ លោក ហង់ ជួនណារ៉ុន បានវាយតម្លៃខ្ពស់ ចំពោះការខិតខំប្រឹងប្រែងរបស់សិស្សានិសិស្ស និងអាណាព្យាបាលសិស្ស និងដៃគូសហការដែលបានចូលរួមចំណែកធ្វើឲ្យការប្រឡងបាក់ឌុប នៅឆ្នាំនេះ ទទួលបានលទ្ធផលល្អបែបនេះ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]