រាជធានីភ្នំពេញ ៖ នៅវេលាម៉ោង០៥និង៤៥នាទីល្ងាច ថ្ងៃទី២៨ ខែសីហា ឆ្នាំ២០១៦ នៅចំណុចផ្ទះជួលជាន់ទី២ ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិសែនជ័យ ទល់មុខរោងចក្រសាន់ស្កាយ មានករណីជម្លោះមួយ ដែលបណ្ដាលឲ្យជនរងគ្រោះរងរបួសធ្ងន់ នៅសល់តែដង្ហើមចង្រិត។
តាមប្រភពព័ត៌មានពីកន្លែងកើតហេតុបានឲ្យដឹងថា ជនរងគ្រោះឈ្មោះ សុម៉ាលី អាយុ៣០ឆ្នាំ មុខរបរជាងតទឹកភ្លើង រស់នៅភូមិឃុំកើតហេតុខាងលើ ហើយមានស្រុកកំណើតនៅខេត្តស្វាយរៀង។
នៅមុនពេលកើតហេតុ គេបានឃើញភាគីជម្លោះទាំងសងខាង និយាយជាមួយគ្នាទំនងជាអ្នកស្គាល់គ្នា ជនរងគ្រោះមានគ្នាតែម្នាក់ឯង រីឯជនបង្កមានគ្នា៣នាក់។ មួយសន្ទុះក្រោយមកគេបានឃើញភាគីទាំងសងខាងឈ្លោះគ្នា១ទល់១។
ប្រភពបានបន្តថា អ្នកទាំង២ឈ្លោះគ្នាមិនបានប៉ុន្មាននាទី ស្រាប់តែជនបង្កបានរត់ទៅទាញកាំបិតមកស្ទុះដេញកាប់ជនរងគ្រោះ ត្រូវ១កាំបិតចំក្បាលរយះធំ និងត្រូវដៃ២កាំបិត បណ្ដាលឲ្យរងរបួសធ្ងន់។
ជាមួយគ្នានោះដែរដោយជនជនរងភិតភ័យខ្លាងពេក ក៏បានរត់ឡើងលើផ្ទះជួលជាន់ទី១ ចំណែកឯ ជនបង្កដេញតាមវាយបន្តធ្វើឲ្យជនរងគ្រោះរបូតខោជើងវែងនៅក្រោម រត់ឡើងទៅលើនៅសល់តែលីអូ ហើយជនបង្កក៏នាំគ្នារត់គេចខ្លួនបាត់តែម្ដង។ ជនរងគ្រោះត្រូវបាន រថយន្តសង្គ្រោះអង្គភាព៧១១ ដឹកទៅសង្គ្រោះនៅមន្ទីរពេទ្យ លោកសង្ឃ ។
ក្រោយពេលកើតហេតុ សមត្ថកិច្ចបានចុះមកដល់កន្លែង ដើម្បីធ្វើកំណត់ហេតុកសាងសំណុំរឿង ធ្វើយ៉ាងណា ឈានទៅរកការឃាត់ខ្លួនជនបង្កមកផ្ដន្ទាទោសតាមច្បាប់ តែតាមការបំភ្លឺពីជនរងគ្រោះមិនបានលម្អិតឡើយ ដោយមានសភាពធ្ងន់ធ្ងរពេក៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកដែរថា ដោយឡែកករណីមួយវិញទៀត កម្លាំងអធិការនគរបាលស្រុកវ៉ារិនបានធ្វើការឃាត់ខ្លួនស្ត្រីម្នាក់ដើម្បីសួរនាំនៅអធិការស្រុកបន្ទាប់ពីមានទំនាស់ពាក្យសម្តីគ្នារវាងស្ត្រីនិងស្ត្រី ខណៈពេលនោះត្រូវបានស្ត្រីម្នាក់ស្ទុះទៅកាប់ដៃគូជម្លោះបណ្តាលឱ្យរងរបួសជាទម្ងន់ ត្រូវបានក្រុមគ្រួសារដឹកយកទៅសង្គ្រោះនៅមណ្ឌលសុខភាពស្រុកវ៉ារិន ។
ហេតុការណ៍ឃាត់ខ្លួនស្ត្រីដៃឆៅនេះកើតឡើងកាលពីវេលាម៉ោង៨ និង៤០នាទីយប់ ថ្ងៃទី២៦ ខែសីហា ឆ្នាំ២០១៦ កន្លងទៅ ស្ថិតនៅក្នុងភូមិរលំរុន ឃុំស្រែណូយ ស្រុកវ៉ារិន ខេត្តសៀមរាប ។
លោកវរសេនីយ៍ទោ ណុប សារ៉ាក់ អធិការនគរបាលស្រុកវ៉ារិន បានប្រាប់ឱ្យដឹងតាមទូរស័ព្ទថា មុនពេលកើតហេតុ ប្រជាពលរដ្ឋបានរាយការណ៍មកនគរបាលប៉ុស្តិ៍ស្រែណូយ ដើម្បីឱ្យជួយអន្តរាគមន៍ ខណៈពេលនោះកម្លាំងនគរបាលចំណុះឱ្យអធិការនគរបាលស្រុកវ៉ារិនបានចុះទៅដល់កន្លែងកើតហេតុ រួចធ្វើការឃាត់ខ្លួនស្ត្រីម្នាក់ ដែលបានយកកាំបិតផ្កាក់កាប់ទៅលើដៃគូទំនាស់បណ្តាលឱ្យរបួសធ្ងន់ ។
លោកបានបញ្ជាក់ថា ជនសង្ស័យមានឈ្មោះ អោ អៀង ភេទស្រី អាយុ៥៨ឆ្នាំ មានទីលំនៅមានទីលំនៅភួមិរលំរុន ឃុំស្រែណូយ ស្រុកវ៉ារិន ខេត្តសៀមរាប ដោយសារ មូលហេតុទំនាស់ពាក្យសំដីគ្នា ទើបស្ត្រីជាជនសង្ស័យយកកាំបិតផ្គាក់មកកាប់ជនរងគ្រោះជាច្រើនកាំបិតបណ្តាលឱ្យរបួសធ្ងន់តែម្តង ។ ចំណែកជនរងគ្រោះមានឈ្មោះ ស៊ត់ វី ភេទស្រី អាយុ៤៥ឆ្នាំ មុខរបរកសិករ ក្នុងភូមិឃុំជាមួយជនសង្ស័យដែរ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
