ខេត្តសៀមរាប ៖ កម្លាំងអធិការនគរបាលស្រុកវ៉ារិនបានធ្វើការឃាត់ខ្លួនស្ត្រីម្នាក់ដើម្បីសួរនាំនៅអធិការស្រុកបន្ទាប់ពីមានទំនាស់ពាក្យសម្តីគ្នារវាងស្ត្រីនិងស្ត្រី ខណៈពេលនោះត្រូវបានស្ត្រីម្នាក់ស្ទុះទៅកាប់ដៃគូជម្លោះបណ្តាលឱ្យរងរបួសជាទម្ងន់ ត្រូវបានក្រុមគ្រួសារដឹកយកទៅសង្គ្រោះនៅមណ្ឌលសុខភាពស្រុកវ៉ារិន ។
ហេតុការណ៍ឃាត់ខ្លួនស្ត្រីដៃឆៅនេះកើតឡើងកាលពីវេលាម៉ោង៨ និង៤០នាទីយប់ ថ្ងៃទី២៦ ខែសីហា ឆ្នាំ២០១៦ ស្ថិតនៅក្នុងភូមិរលំរុន ឃុំស្រែណូយ ស្រុកវ៉ារិន ខេត្តសៀមរាប ។
លោកវរសេនីយ៍ទោ ណុប សារ៉ាក់ អធិការនគរបាលស្រុកវ៉ារិន បានប្រាប់ឱ្យដឹងតាមទូរស័ព្ទថា មុនពេលកើតហេតុ ប្រជាពលរដ្ឋបានរាយការណ៍មកនគរបាលប៉ុស្តិ៍ស្រែណូយ ដើម្បីឱ្យជួយអន្តរាគមន៍ ខណៈពេលនោះកម្លាំងនគរបាលចំណុះឱ្យអធិការនគរបាលស្រុកវ៉ារិនបានចុះទៅដល់កន្លែងកើតហេតុ រួចធ្វើការឃាត់ខ្លួនស្ត្រីម្នាក់ ដែលបានយកកាំបិតផ្កាក់កាប់ទៅលើដៃគូទំនាស់បណ្តាលឱ្យរបួសធ្ងន់ ។
លោកបានបញ្ជាក់ថា ជនសង្ស័យមានឈ្មោះ អោ អៀង ភេទស្រី អាយុ៥៨ឆ្នាំ មានទីលំនៅមានទីលំនៅភួមិរលំរុន ឃុំស្រែណូយ ស្រុកវ៉ារិន ខេត្តសៀមរាប ដោយសារ មូលហេតុទំនាស់ពាក្យសំដីគ្នា ទើបស្ត្រីជាជនសង្ស័យយកកាំបិតផ្គាក់មកកាប់ជនរងគ្រោះជាច្រើនកាំបិតបណ្តាលឱ្យរបួសធ្ងន់តែម្តង ។ ចំណែកជនរងគ្រោះមានឈ្មោះ ស៊ត់ វី ភេទស្រី អាយុ៤៥ឆ្នាំ មុខរបរកសិករ ក្នុងភូមិឃុំជាមួយជនសង្ស័យដែរ ៕
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក ករណីមួយផ្សេងទៀត កាលពីលើកមុន បុរសម្នាក់ ប្រើដាវកាប់ជនរងគ្រោះ បណ្ដាលឲ្យរងរបួសដេរជាច្រើនថ្នេរ ហើយជាលទ្ធផលត្រូវបានកម្លាំងនគរបាលប៉ុស្ដិ៍ឫស្សីកែវ ខណ្ឌឫស្សីកែវ ឃាត់ខ្លួន ដោយដកហូតវត្ថុតាង ដាវ១ដើម។ហេតុការណ៍នេះ បានកើតឡើងនៅយប់ថ្ងៃទី២៥ ខែសីហា ឆ្នាំ២០១៦ ត្រង់ចំណុចផ្លូវរថភ្លើង ស្ថិតក្នុងក្រុមទី០៩ ភូមិបឹងសាឡាង សង្កាត់ឬស្សីកែវ ខណ្ឌឫស្សីកែវ រាជធានីភ្នំពេញ ។
បើតាមលោក វរសេនីយ៍ត្រី ចាន់ ពៅ អធិការរងទទួលផែនសេនាធិការខណ្ឌឫស្សីកែវ បានបញ្ជាក់ថា ជនសង្ស័យដែល ត្រូវឃាត់ខ្លួនមានឈ្មោះ ធន់ សុភ័ណ្ឌ ភេទប្រុស អាយុ៣២ឆ្នាំ មានមុខរបរកម្មករសំណង់ ស្នាក់នៅផ្ទះជួលក្បែរគ្នានៅចំណុចកើតហេតុខាងលើ ។ រីឯជនរងគ្រោះមានឈ្មោះ ឈិន ឡុង ភេទប្រុស អាយុ១៨ឆ្នាំ មានមុខរបរជាសិស្ស ស្នាក់នៅផ្ទះលេខ០៩១ ផ្លូវរថភ្លើង ស្ថិតក្នុងក្រុមទី០៩ ភូមិបឹងសាឡាង សង្កាត់ឬស្សីកែវ ខណ្ឌឫស្សីកែវ រាជធានីភ្នំពេញ ។
លោកវរសេនីយ៍ត្រី បានបញ្ជាក់ទៀតថា ពីដំណើររឿងមុនឈានទៅបង្ក្រាប និងក្រោយឃាត់ខ្លួនជនសង្ស័យថា គូរបដិបក្ខទាំង២នាក់មានជម្លោះនិងគ្នា បន្ទាប់មកជនត្រូវសង្ស័យបានទាញដាវទៅកាប់ជនរងគ្រោះបណ្ដាលឲ្យរងរបួសតែម្ដង ។
លោកវរសេនីយ៍ត្រី បានបន្តថា បន្ទាប់ពីទទួលបានសេចក្ដីរាយការណ៍តាមទូរស័ព្ទរបស់ម្ដាយជនរងគ្រោះភ្លាម កម្លាំងសមត្ថកិច្ចរបស់លោក ក៏បានចុះអន្តរាគមន៍ដល់ទីតាំងកើតហេតុដើម្បីស៊ើបសួរ និងឃាត់ខ្លួនជនសង្ស័យខាងលើ រួមនិងដាវសាំម៉ូរ៉ៃ១ដើមដោយពាក់ព័ន្ធករណីហិង្សាដោយចេតនា ។
បច្ចុប្បន្ន ជនសង្ស័យពាក់ព័ន្ធករណីហិង្សាដោយចេតនា រួមជាមួយវត្ថុតាង ត្រូវបញ្ជូនទៅបន្តឃុំខ្លួននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំនុំរឿងបន្តតាមនិតិវិធីរបស់ អយ្យការសាលាដំបូងរាជធានីភ្នំពេញ ចាត់ការតាមច្បាប់ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
