រាជធានីភ្នំពេញ ៖ ម៉ូតូ១គ្រឿង ខណៈម្ចាស់កំពុងជិះសុខៗ ស្រាប់តែឆ្លងចរន្តភ្លើងឆាបឆេះយ៉ាងសន្ធោសន្ធៅ បង្កឲ្យមានការភ្ញាក់ផ្អើល កាលពីវេលាម៉ោង៨ និង៣០នាទីយប់ ថ្ងៃទី២៥ ខែសីហា ឆ្នាំ២០១៤ នៅចំណុចផ្លូវលេខ១៥៤ កែងផ្លូវលេខ៦៣ ស្ថិតក្នុងសង្កាត់ផ្សារថ្មី៣ ខណ្ឌដូនពេញ ។
ប្រជាពលរដ្ឋដែលបានឃើញ ហេតុការណ៍បានឲ្យដឹងថា មុនពេលកើតហេតុគេបានឃើញយុវជនម្នាក់ មិនស្គាល់អត្តសញ្ញាណ ជិះម៉ូតូ១គ្រឿងម៉ាក សុយហ្ស៊ុយគី ស្តេប ពណ៌ខ្មៅ អត់ស្លាកលេខ ធ្វើដំណើរតែម្នាក់ឯង តាមបណ្ដោយផ្លូវលេខ៦៣ ទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែម៉ូតូក៏បាន ឆ្លងចរន្ដភ្លើងឆាបឆេះចេញជាអណ្ដាតភ្លើង យ៉ាងសន្ធោសន្ធៅ ភ្លាមៗនោះម្ចាស់ម៉ូតូបានស្រែកឲ្យគេជួយដែរ តែដោយសារអណ្តាត ភ្លើងឆេះខ្លាំងពេក ទើបមិនអាចពន្លត់បាន ម្ចាស់បានត្រឹមតែឈរមើល ស្រណោះម៉ូតូ រួចក៏ដើរចេញទៅបាត់ ។
ប្រជាពលរដ្ឋបានឲ្យដឹងទៀតថា ម្ចាស់ម៉ូតូពេលដែល ម៉ូតូឆាបឆេះបានស្រែកថា ជួយផងម៉ូតូឆេះហើយ ដោយសារតែម៉ូតូរបស់គាត់ឆ្លងចរន្ត ព្រោះកន្លងមកតែងតែឆេះហើយរលត់ទៅវិញជាញឹកញាប់ បន្ទាប់ពីឆេះភ្លាមៗនោះម្ចាស់ម៉ូតូបានចុះពីលើម៉ូតូពន្លត់ដែរ តែមិនរលត់ព្រោះមិនមានឧកបរណ៍សម្រាប់ពន្លត់ឡើយ បណ្តាលឲ្យឆាបឆេះកាន់តែខ្លាំងឡើងៗ ម្ចាស់ម៉ូតូបានត្រឹមតែ ឈរមើលពេលម៉ូតូឆេះជិតអស់ហើយ ក៏ទៅបាត់ទៅ ។
ប្រភពដដែលបានបន្តថា បន្ទាប់ពីភ្លើងឆេះម៉ូតូស្ទើរតែ ទាំងស្រុងទៅហើយ ទើបមានប្រជាពលរដ្ឋយកបំពង់ពន្លត់អគ្គិភ័យមកបាញ់ពន្លត់ តែហួសពេលទៅហើយ ។
ក្រោយពេលកើតហេតុ សមត្ថកិច្ចមូលដ្ឋាន បានចុះដល់កន្លែងកើតហេតុ ហើយបានយកម៉ូតូដែលឆេះអស់សល់ តែគ្រោងឆ្អឹងយកទៅរក្សាទុក នៅប៉ុស្ដិ៍រដ្ឋបាលនគរបាលផ្សារថ្មី៣ ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកដែរថា ដោយឡែកករណីមួយវិញទៀត យុវជន២នាក់ជាសិស្ស រួមជាមួយគ្នានិងស្នាក់នៅជាមួយគ្នា បានឈ្លោះទាស់ទែង យ៉ាងស្រួចស្រាល់ រហូតឈានដល់ដុតកម្ទេចម៉ូតូ១ គ្រឿងចោល បណ្ដាលឱ្យមានឆាបឆេះ យ៉ាងសន្ធោសន្ធៅ និងបង្កភ្ញាក់ផ្អើលកាល ពីវេលាម៉ោង១ និង១៥នាទីរំលងអធ្រាត្រ ឈានចូលថ្ងៃទី០៦ មេសា ២០១៥ កន្លងទៅ ស្ថិតនៅក្បែរផ្សារឯករាជ្យ១ ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ប្រភពបានឱ្យដឹងថា សិស្សរួមថ្នាក់ដែលទាស់ទែងគ្នានោះ ម្នាក់ដែលជាជនបង្កដុតម៉ូតូ ចោលមានឈ្មោះសំ ស៊ីញឿន អាយុ២១ឆ្នាំ ជាសិស្សសាលាបណ្តុះបណ្តាល បច្ចេកទេស ឌី សុវណ្ណរិទ្ធ និងជាជាងជួសជុលម៉ាស៊ីន ដេរតាមរោងចក្រ មានស្រុកកំណើតនៅក្នុងខណ្ឌព្រៃនប់ ខេត្តព្រះសីហនុ សព្វថ្ងៃស្នាក់នៅក្នុងសាលា បណ្តុះបណ្តាលបច្ចេកទេសខាងលើ ។ ចំណែកម្នាក់ទៀត ដែលជាជនរងគ្រោះមានឈ្មោះឆេន សុខចាន់ អាយុ២៤ឆ្នាំ ជាជាងជួសជុល ម៉ាស៊ីនដេរដូចគ្នា ស្នាក់ជាមួយគ្នា និងមានស្រុកកំណើតនៅ ក្នុងភូមិត្រពាំងជ្រៅ ឃុំព្រៃក្រសាំង ស្រុកឧដុង្គ ខេត្តកំពង់ស្ពឺ ជាម្ចាស់ម៉ូតូដែលជនសង្ស័យ ដុតចោលម៉ាកស៊ុយហ្សីគីរីវ៉ូ ពណ៌ខ្មៅ ពាក់ស្លាកលេខភ្នំពេញ 1AA-7144។
ប្រភពបន្តថា នៅមុនពេលកើតហេតុ នៅវេលាល្ងាចថ្ងៃទី៥ មេសា យុវជនទាំង២នាក់នោះ បានឈ្លោះប្រកែកគ្នាមួយប្រាវ ប៉ុន្តែ មិនដឹងថា បណ្ដាលមកពីរឿងអីនោះឡើយ ហើយក្រោយមកបានអ្នកជិតខាងជួយឃាត់ ទើបស្ងប់ស្ងាត់ទៅវិញ។ បន្ទាប់មក ជនបង្ក ឈ្មោះសំ ស៊ី ញឿន បានចេញទៅផឹកស៊ីនៅខាងក្រៅ លុះផឹកស្រវឹងធ្លាក់ភ្នែក ទើបត្រឡប់ចូលកន្លែងស្នាក់នៅវិញ លុះពេលទៅដល់ដោយនឹកឃើញគំនុំពីល្ងាចនោះក៏ បានដើរសំដៅទៅកន្លែង ដែលជនរងគ្រោះកំពុង តែដេកលង់លក់ រួចបានឡើងទៅ លើគ្រែសោយមុង ហើយវាយជនរងគ្រោះមួដៃចំកណ្តាលមុខ ធ្វើឱ្យជនរងគ្រោះភ្ញាក់ពីដំណេក ស្ទុះរត់ចេញឡើងទៅលើផ្ទះ រួចចូលទៅក្នុងបន្ទប់ចាក់សោ ពីខាងក្នុងមិនឱ្យជនបង្កឡើងទៅតាម ព្រោះតែខ្លាចជនបង្កវាយទៀត។
ប្រភពដដែលបានបន្តថា ខណៈនោះជនបង្កបានស្រែក ឱ្យជនរងគ្រោះបើកទ្វារ ប៉ុន្តែជនរងគ្រោះមិនព្រមបើកឱ្យ ទើបជនបង្កបាននិយាយគំរាមថា បើឯងមិនបើកទ្វារទេ អញនឹងយកម៉ូតូឯងទៅដុតចោលហើយ ។ បន្ទាប់មកជននោះ ក៏ស្រែកឱ្យបើកទ្វារចំនួន១០ដង តែជនរងគ្រោះនៅតែមិនព្រមបើកទៀត ជនបង្កក៏ចុះទៅក្រោមវិញ រួចយកម៉ូតូជនរងគ្រោះដុតចោល ហើយគេចខ្លួនបាត់ស្រមោល ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
