លួចម៉ូតូបានជិះទៅស្អាង នគរបាលចាប់ជាប់ឆែកឃើញ លិខិតបញ្ចាំម៉ូតូ តាមមកដល់ភ្នំពេញឆែកហាងទទួលបញ្ចាំ

(កណ្ដាល)៖ ចោរលួចម្នាក់ត្រូវបាន កម្លាំងនគរបាលស្រុកស្អាង ស្ទាក់ចាប់បានខណៈរូបគេលួចម៉ូតូ នៅភ្នំពេញបានក៏ដឹកប្រពន្ធយកទៅ លេងផ្ទះបងប្អូននៅស្រុកស្អាង ខេត្តកណ្ដាលក្នុងគោលបំណង លក់ម៉ូតូផង តែក្រោយពីឃាត់ខ្លួនឆែកឆេរ សមត្ថកិច្ចបានរកឃើញលិខិត ទទួលបញ្ចាំម៉ូតូមួយសន្លឹក នៅក្នុងហោប៉ាវជនសង្ស័យ ទើបព្រះរាជអាជ្ញាបញ្ជាអោយ សមត្ថកិច្ចបើកការស៊ើបអង្កេត ពន្លាតដែនដីតាមទៅឆែកដល់ ទីតាំងទទួលបញ្ចាំម៉ូតូ នៅក្នុងសង្កាត់ទឹកល្អក់ ទី៣ ខណ្ឌទួលគោកជាបន្តទៀតដើម្បី ចង់ដឹងថាតើម៉ូតូដែលចោរលួចខាងលើ យកទៅបញ្ចាំជាម៉ូតូស្របច្បាប់ របស់ជនសង្ស័យឬជាម៉ូតូ បានមកពីអំពើទុច្ចរិត។

លោក​លឹម សុគន្ថា ព្រះរាជអាជ្ញាអមសាលាដំបូង ខេត្តកណ្ដាលបានថ្លែងប្រាប់ Fresh News នៅម៉ោង២រសៀលថ្ងៃនេះថា ក្រោយពីសមត្ថកិច្ចនគរបាល ស្រុកស្អាងឃាត់ខ្លួន ចោរលួចម៉ូតូបានហើយឆែកឃើញ លិខិតបញ្ចាំម៉ូតូមួយគ្រឿងផ្សេងទៀតភ្លាម លោកបានបញ្ជាអោយនគរបាល បើកការស៊ើបអង្កេតពន្លាត ដែនដីចុះទៅឆែកឆេរទីតាំងទទួលបញ្ ចាំទៅតាមអាស័យដ្ឋាន នៅក្នុងលិខិតបញ្ចាំដើម្បីធ្វើការត្រួតពិនិត្យមើល ថាតើម៉ូតូដែលជនសង្ស័យរូបនេះ យកទៅបញ្ចាំនោះជាម៉ូតូកម្មសិទ្ធិ របស់ជនសង្ស័យ ឬជាម៉ូតូបានមកពីចោរកម្ម ឬបានមកពីអំពើទុច្ចរិតផ្សេងៗ ហើយយកទៅបញ្ចាំ តែមិនទាន់ដឹងលទ្ធផល នៅឡើយទេ។ លោក លឹម សុគន្ថាបានបន្ថែមថា ការបើកស៊ើបអង្កេតពន្លាត ដែនដីដោយចុះត្រួតពិនិត្យទីតាំង ទទួលបញ្ចាំខាងលើនេះក៏ដើម្បីចូលរួម លប់បំបាត់អំពើអសន្តិសុខផ្សេងៗ នៅក្នុងសង្គមផងដែរ ។

សូមបញ្ជាក់ថាកាលពីថ្ងៃទី១៧ ខែសីហា ឆ្នាំ២០១៦ វេលាម៉ោង ១៥និង១៥នាទី កម្លាំងអន្តរាគមន៍នគរបាលស្រុកស្អាង សហការជាមួយនគរបាលប៉ុស្តិ៍ស្អាងភ្នំ ល្បាតតាមដងផ្លូវឃុំស្អាងភ្នំ និងឃុំក្រាំងយ៉ូវ មកដល់ចំណុចស្ពានកំពង់ ស្វាយស្ថិតក្នុងភូមិ ពាមសាលា ឃុំស្អាងភ្នំ ពេលនោះជនសង្ស័យឈ្មោះ អន អូន បានជិះម៉ូតូម៉ាកស៊ុយសូគីនិច ពណ៌លឿងឌុបឈ្មោះ ពេជ្រ កញ្ញា ហៅស្រី ម៉ៅ ត្រូវជាប្រពន្ធ(អន អូន) ហើយពេលឃើញសមត្ថកិច្ច ក៏បន្ថែមល្បឿនព្យាយាម រត់គេចពីសមត្ថកិច្ច។

ពេលឃើញដូចនេះ សមត្ថកិច្ចបានដេញតាមហើយ ម៉ូតូឈ្មោះ អន អូន ក៏ក្រឡាច់កង់បណ្តាលឲ្យដួលនៅ ចំណុចភូមិពាមសាលា ឃុំស្អាងភ្នំ ស្រុកស្អាង ខេត្តកណ្តាល សមត្ថកិច្ចបាននាំឈ្មោះអន អូន មកអធិការដ្ឋាននគរបាលស្រុកដើម្បី ធ្វើការសាកសួរ។ យោងតាមការប្រកាសផ្សាយព័ត៌មានតាម Facebook មានជនរងគ្រោះជាម្ចាស់ម៉ូតូ បានមកដាក់ពាក្យបណ្ដឹង នៅចំពោះមុខសមត្ថកិច្ចផង ទើបឈ្មោះ អន អូន សារភាពថាខ្លួនពិតជាបានធ្វើសកម្មភាព លួចម៉ូតូម៉ាកស៊ុយស៊ូគីនិច ពណ៌លឿងលាយសពាក់ផ្លាកលេខភ្នំពេញ 1CJ-8980 នៅចំណុចផ្សារសាំហាន់នៅខណ្ឌឬស្សីកែវ រាជធានីភ្នំពេញ ដែលម្ចាស់ចតនៅក្បែរផ្លូវ ដោយមិនបាន ដកកូនសោរចេញពីម៉ូតូ រួចជិះម៉ូតូខាងលើសំដៅមកលេងផ្ទះបងស្រីឈ្មោះ អន ញ៉ាញ ដែលមានប្តីឈ្មោះជឿន នៅភូមិគោកអណ្តែតឃុំស្អាងភ្នំ ស្រុកស្អាង ខេត្តកណ្តាលពិតប្រាកដមែន ដើម្បីយកទៅលក់។ ក្នុងនោះសមត្ថកិច្ចក៏ចុះទៅឆែកឆេរ នៅទីតាំងផ្ទះទទួលទិញ របស់ចោរផងដែរ តែម្ចាស់ដឹងខ្លួនមុនបានរត់គេចខ្លួន បាត់ទៅហើយ៕

ប្រភព៖ Fresh News

កំណត់ហេតុខ្មែរឡូត៖

ដោយឡែក ករណីមួយផ្សេងទៀត កាលពីលើកមុន  លួចម៉ូតូបានសម្រេចហើយ! អស់សាំងប្លុងចោលក្នុងព្រៃ មិនអស់ចិត្តទៅយកម៉ូតូ នៅកន្លែងអាវុធហត្ថខេត្ត ដូចទៅរកខ្នោះ គួររំលឹកផងដែរថា ជនសង្ស័យម្នាក់បានសុំផ្ទះគេស្នាក់នៅ១យប់ ពេលម្ចាស់ផ្ទះមិននៅ ឆ្លៀតឱកាសលួចយកម៉ូតូរបស់ម្ចាស់ផ្ទះ ជិះគេចបាត់តែសំណាងអាក្រក់ ត្រូវអស់សាំងតាមផ្លូវ រួចយកម៉ូតូលាក់ទុកនៅក្នុងព្រៃ ហើយរត់គេចខ្លួនបាត់ ស្រាប់តែមន្ដ្រីអាវុធហត្ថប្រទះឃើញ ក៏យកមករក្សាទុកនៅទីបញ្ជាការដ្ឋានអាវុធហត្ថខេត្ត ក្រោយមកជនសង្ស័យបានចេញមុខអះអាងថា ជាកម្មសិទ្ធរបស់ខ្លូន ប៉ុន្ដែគ្មានឯកសារបញ្ជាក់ត្រូវអាវុធហត្ថចាប់ខ្លួនតែម្ដង។

លោកឧត្តមសេនីយ៍ត្រី ឱ បូរិន្ទ មេបញ្ជាការខេត្ត បានឲ្យដឹងថា មន្ដ្រីអាវុធហត្ថស្នាក់ការ សន្តិសុខ៦៦៦ ភ្នំលៀប ស្រុកព្រះនេត្រព្រះ ក៏បានប្រទះឃើញម៉ូតូ១គ្រឿង ដែលគេយកមកប្លុងចោលនៅក្នុងព្រៃ រួចស្រាវជ្រាវរកម្ចាស់លុះថ្ងៃទី១ ខែសីហា ឆ្នាំ២០១៦ កន្លងទៅ ស្រាប់តែជនសង្ស័យបានចេញមុខមកយកម៉ូតូ ដោយអះអាងថាខ្លួនជាម្ចាស់ម៉ូតូ ដោយសារតែគ្មានឯកសារគ្រប់គ្រាន់នោះទេ ក្រោយមកអាវុធហត្ថក៏បានចាប់ខ្លួនតែម្ដង។

លោកបន្តថា កាលពីថ្ងៃទី២៩ ខែកក្កដា ឆ្នាំ២០១៦កន្លងទៅ មានជនរងគ្រោះម្នាក់ ឈ្មោះទិដ្ឋ រដ្ឋ អាយុ៣៧ឆ្នាំ រស់នៅភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ បានមកដាក់ពាក្យបណ្ដឹងថា ខ្លូនបាត់ម៉ូតូ ម៉ាកWave C១១០ ពាក់ស្លាកលេខ បន្ទាយមានជ័យ1H-4602។

លោកឧត្តមសេនីយ៍ត្រី បញ្ជាក់ថា បើតាមចម្លើយសារភាពរបស់ជនសង្ស័យឈ្មោះ ត្រង សង្គម ហៅសង្គោម អាយុ១៩ឆ្នាំ បានសារភាពថា ខ្លូនពិតជាបានលួចម៉ូតូរបស់ឈ្មោះ ទិដ្ឋ រដ្ឋ នេះពិតប្រាកដមែន ក្រោយពីលួចបានហើយ ខ្លួនបានជិះទៅខេត្តកំពង់ធំ លុះជិះមកដល់ចំណុច ឃុំភ្នំលៀប ស្រុកព្រះនេត្រ ម៉ូតូក៏អស់សាំង ហើយអត់មានលុយចាក់សាំង ក៏ទុកម៉ូតូចោលក្នុងព្រៃក្បែរ បង្គោលភ្លើងចុះពីផ្លូវជាតិប្រហែល១០ម៉ែត្រ ហើយបានគេចខ្លួន។