(កំពត)៖ បុរសមិនស្គាល់អត្តសញ្ញាណម្នាក់ ស្លៀកពាក់ស្អាតបាត ត្រូវរថភ្លើងបុកស្លាប់ នាម៉ោង៤ទាបភ្លឺថ្ងៃទី២៨ ខែកក្កដា ឆ្នាំ២០១៦ ចំណុចផ្លូវរថភ្លើង ស្ថិតក្នុងភូមិអណ្តូងខ្មែរ សង្កាត់អណ្តូងខ្មែរ ក្រុងកំពត។ ក្រោយពេលកើតហេតុសមត្ថកិច្ចមូលដ្ឋាន បានបញ្ជាក់ថា សាកសពជនរងគ្រោះ កំពុងធ្វើកោសល្យវិច្ច័យ ដើម្បីឈានទៅរកការពិត នៃការស្លាប់របស់ជនរងគ្រោះ ហើយរហូតមកដល់ពេលនេះ សពជនរងគ្រោះមិនទាន់ស្គាល់អត្តសញ្ញាណនៅឡើយទេ៕
ប្រភព៖ Fresh News
កំណត់ហេតុខ្មែរឡូត៖
ដោយឡែក ករណីមួយផ្សេងទៀត កាលពីលើកមុន បុរសម្នាក់ត្រូវរថយន្តដឹកកុងតឺន័រកិនខ្ទេចក្បាល គួររំលឹកផងដែរថា បុរសម្នាក់ត្រូវរថយន្តដឹកកុងតឺន័រកិនខ្ទេចក្បាលស្លាប់យ៉ាងអាណោចអាធ័មកាលពីវេលាម៉ោង១២ និង៣០នាទីថ្ងៃត្រង់ ថ្ងៃទី២៧ ខែកក្កដា ឆ្នាំ២០១៦ កន្លងទៅ នៅលើផ្លូវជាតិលេខ១ ចន្លោះគីឡូម៉ែត្រលេខ២១-២២ ស្ថិតក្នុងភូមិតាអោន ឃុំគគីរ ស្រុកកៀនស្វាយ ខេត្តកណ្ដាល ។
សេចក្តីរាយការណ៍បានឲ្យដឹងទៀតថា ជនរងគ្រោះមានឈ្មោះ ឆេង ដា អាយុ២១ឆ្នាំ មុខរបរអ្នកលក់មាន់ មានទីលំនៅភូមិជ្រួស ឃុំកន្សោមអក ស្រុកកំពង់ត្របែក ខេត្តព្រៃវែង ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុជនរងគ្រោះជិះម៉ូតូម៉ាកហុងដា សេ១២៥ ស៊េរីឆ្នាំ២០១៦ ដឹកមាន់ពីខេត្តព្រៃវែងមកដាក់ឲ្យម៉ូយនៅផ្សារគគីរ ខណៈដល់កន្លែងកើតហេតុក៏បានប៉ះគ្នាជាមួយរថយន្តដឹកដីបណ្ដាលឲ្យដួលខ្ទាតមកកណ្ដាលថ្នល់ ស្របពេលនេះរថយន្តដឹកកុងតឺន័របើកក្នុងទិសដៅពីភ្នំពេញទៅអ្នកលឿងមកដល់ល្មមក៏កិនចំក្បាលខ្ទេចស្លាប់យ៉ាងអាណោចអាធ័ម ។
សេចក្តីរាយការណ៍បានបន្តទៀតថា ក្រោយពេលកើតហេតុរថយន្តដឹកកុងតឺន័របានបើកគេចខ្លួនបាត់ ចំណែករថយន្តដឹកដីជាច្រើនគ្រឿងដែលចតអនាធិបតេយ្យនៅចិញ្ចើមថ្នល់កន្លែងកើតហេតុក៏បើកគេចចេញបាត់អស់ដែរ ចំណែកសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]