រន្ធត់ចិត្ត! អតីតខ្សែប្រយុទ្ធ Chelsea កីឡាករ Demba Ba រងរបួសបាក់ជើង យ៉ាងធ្ងន់ធ្ងរ អំឡុងការប្រកួត ក្នុងលីកប្រទេសចិន (មានវីដេអូ)

ចិន៖ កីឡានាំមកនូវសុខភាព ប៉ុន្តែកីឡាករក៏អាចនាំមកនូវគ្រោះថ្នាក់ផងដែរ ជាក់ស្តែងដូចកីឡាបាល់ទាត់នេះអញ្ចឹង បើយើងមិនប្រយ័ត្នក្នុងពេលប្រកួតទេ វានឹងអាចមានផលប៉ះពាល់អវិជ្ជមានដល់យើង ដូចជា របួស បាក់ដៃ បាក់ជើង នៅពេលដែលយើងមិនបានប្រយ័ត្នក្នុងកាលៈទេសៈណាមួយជាដើម។

យ៉ាងណាមិញ គ្រោះថ្នាក់នេះគឺមើលមិនឃើញឡើយ ជាក់ស្តែងដូចហេតុការណ៍មួយ ដែលបានកើតឡើងក្នុងអំឡុងការប្រកួត នៅលីកប្រទេសចិន គឺកីឡាករ Demba Ba ដែលគេស្គាល់ថា ធ្លាប់ជាខ្សែប្រយុទ្ធមុតស្រួចរបស់ Chelsea នោះ ឥឡូនេះបានរងរបួសបាក់ជើងយ៉ាងធ្ងន់ធ្ងរ នៅពេលដែលក្រុមរបស់គេ Shanghai Shenhua ប្រកួតជាមួយ Shanghai SIPG ។

ហេតុការណ៍នេះបានកើតឡើងក្នុងជំនួបការប្រកួតរវាង Shanghai Shenhua និង Shaghai SIPG ក្នុងពានរង្វាន់ China League ដែលជាលីកបាល់ទាត់របស់ប្រទេសចិន ដែលក្នុងនោះ ឃ្លីបវីដេអូ មួយដែលថ្មីៗនេះ ត្រូវបានចែកចាយបន្តពីមហាជនក្នុងបណ្តាញអ៊ីនធឺណេត ដែលបង្ហាញពី ការរងរបួសបាក់ជើង គួរឲ្យរន្ធត់ របស់កីឡាករ Demba Ba របស់ក្រុម Shanghai Shenhua ក្នុងអំឡុងការប្រកួត ។ យោងតាមរយៈវីដេអូនេះដែរ បានធ្វើឲ្យអ្នកដែលបានទស្សនា សម្តែងនូវអារម្មណ៍ រន្ធត់ និងស្រៀវ ជាពិសេស គឺចំពោះប្រិយមិត្តដែលចូលចិត្តលេងបាល់ទាត់នេះតែម្តង ។

គួរបញ្ជាក់ផងដែរថា Demba Ba ស៊ុតចូលសរុប ២០គ្រាប់ ក្នុង២៩ប្រកួត ចាប់តាំងពីគេមកលេងឲ្យ ក្លិបនៅប្រទេសចិននេះដំបូង កាលពីឆ្នាំ២០១៥ មកម្លេះ ពោលគឺកីឡាកររូបនេះនៅតែបង្ហាញទម្រង់លេងដ៏ល្អដូចកាលពីគេធ្លាប់លេងឲ្យ Chelsea ដែរ ប៉ុន្តែថ្មីៗនេះ រឿងដែលមិនគួរកើតឡើង បានកើតឡើងចំពោះរូបគេ នៅពេលដែលកីឡារបស់ក្លិប Shanghai SIPG ម្នាក់ ព្យាយាមដណ្តើមបាល់ពីគេ ក៏ជ្រុលជើងមកទាត់ កីឡាករ Demba Ba ធ្វើឲ្យជើងឆ្វេងរបស់កីឡាកររូបនេះបាក់ភ្លាមៗ ។

បន្ទាប់ពីហេតុការណ៍នេះ បានកើតឡើង រូបគេត្រូវបានប្តូរចេញភ្លាមៗ ជំនួសវិញដោយកីឡាករ Obafemi Martins ។ ទោះជាយ៉ាងណាក្តី ក្រុមរបស់ Demba Ba គឺក្លិប Shanhai Shenhua អាចយកឈ្នះលើក្រុម Shanghai SIPG ក្នុងលទ្ធផល ២-១ ហើយក៏សូមចូលរួមសោកស្តាយដល់កីឡាករ Demba Ba ផងដែរ ចំពោះហេតុការណ៍មួយនេះ ពីព្រោះវាជាបញ្ហាប្រឈមមួយដល់អាជីពបាល់ទាត់របស់គេ៕

ប្រភព៖ Mirror