ខេត្តកំពង់ឆ្នាំង ៖ ស្ត្រីម្នាក់បានស្លាប់នៅនឹងកន្លែង ចំណែកមនុស្ស២នាក់ទៀត ក្នុងនោះមានកុមារម្នាក់ផងបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ មួយបានកើតឡើងនៅវេលាម៉ោង១និង៣០នាទីរសៀល ថ្ងៃទី២៦ ខែមិថុនា ឆ្នាំ២០១៦ លើកំណាត់ផ្លូវជាតិលេខ៥ នៅចន្លោះគីឡូម៉ែត្រលេខ ១១៨ និង១១៩ ស្ថិតក្នុងភូមិ ក្បាលថ្នល់ ឃុំផ្សារ ស្រុកបរិបូរណ៌ ខណៈដែលរថយន្តម៉ាកទូរីស បុកម៉ូតូបើកបរលើថ្នល់ជាតិ ។
លោក ជាង សុវណ្ណរិទ្ធ អធិការនគរបាលស្រុក បរិបូរណ៌បានអោយដឹងថា ស្ត្រីរងគ្រោះស្លាប់បាត់បង់ជីវិតមានឈ្មោះ កែវ គឿន អាយុ៥២ឆ្នាំ មានទីលំនៅ ភូមិឃុំកើតហេតុខាងលើ ។ លោកបន្តថា មុនពេលកើតហេតុ ស្ត្រីរងគ្រោះខាងលើបានជិះម៉ូតូជាមួយកូនប្រុសម្នាក់ទៀត ដែលជាអ្នកបើកម៉ូតូម៉ាកវីវ៉ា ពាក់ស្លាកលេខ ក.8802 ក.1 ដោយមានដឹកក្មេងប្រុសម្នាក់ទៀត ក្នុងដំណើរពីជើងទៅត្បូងតាមបណ្តោយ ផ្លូវជាតិពីខាងឆ្វេងដៃ ។
លុះពេលមកដល់ចំណុចកើតហេតុ ក៏បានបើកឆ្លងថ្នល់មិនប្រយ័ត្នក៏ត្រូវរថយន្តមួយគ្រឿងម៉ាក សាំយ៉ុង ពណ៌ស ពាក់ស្លាកលេខ ភ្នំពេញ 2X-8565 បើកបរដោយបុរសឈ្មោះជុង ពៅ អាយុ៤១ឆ្នាំ មានទីលំនៅខេត្តកំពង់ចាម បុកពីក្រោយយ៉ាងពេញទំហឹង បណ្តាលឲ្យស្ត្រីរងគ្រោះស្លាប់នៅនឹងកន្លែង ចំណែកកូនប្រុស អ្នកបើកម៉ូតូ និងចៅប្រុសម្នាក់ទៀត អាយុ៥ឆ្នាំ បានរងរបួសធ្ងន់ ហើយត្រូវបានដឹកមកសង្គ្រោះនៅមន្ទីរពេទ្យខេត្ត កំពង់ឆ្នាំង ។
ក្រោយពេលកើតហេតុ អ្នកបើកបររថយន្ត ត្រូវបានសមត្ថកិច្ចធ្វើការឃាត់ខ្លួន បញ្ជូនទៅអធិការដ្ឋាននគរបាលស្រុក រួមជាមួយមធ្យោយបាយធ្វើដំណើរ មានរថយន្ត១គ្រឿង និងម៉ូតូមួយគ្រឿងដើម្បីរង់ ចាំការដោះស្រាយតាមនិតិវិធី ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកដែរថា ករណីមួយវិញទៀត នារី២នាក់ជាបងប្អូនបង្កើត បានស្លាប់ភ្លាមៗនៅកន្លែងកើតហេតុ ដោយសារតែរថយន្ដកុងទីន័រ បុកម៉ូតូរបស់ពួកគេ នៅម៉ោង១៖២០នាទីរសៀលថ្ងៃទី១១ ខែមិថុនា ឆ្នាំ២០១៦ កន្លងទៅ តាមបណ្ដោយផ្លូវជាតិលេខ៤ ស្ថិតក្នុងសង្កាត់ចោមចៅ ខណ្ឌពោធិ៍សែន។
ភ្នាក់ងារ Fresh News បានរាយការណ៍ថា មុនពេលកើតហេតុការណ៍រថយន្ដកុងទីន័រ ម៉ាក Fuso ពាក់ស្លាកលេខភ្នំពេញ3A-6503 បើកបរក្នុងទិសដៅពីលិចទៅកើត លុះដល់ចំណុចកើតហេតុ បានគៀររថយន្ដ Prius មួយគ្រឿង ក្រោយមកបានរេចង្កូតទៅបុក និងកិនម៉ូតូមួយគ្រឿង ម៉ាកគុប ពាក់ស្លាកលេខភ្នំពេញ1AH-3577 បណ្ដាលឱ្យនារី២នាក់ ដែលត្រូវជាបងប្អូនបង្កើតនឹងគ្នា ស្លាប់យ៉ាងអាណោចអាធ័ម។
ជនរងគ្រោះទី១ឈ្មោះអន ពិដោរ អាយុ១៩ឆ្នាំ ស្នាក់នៅសង្កាត់រាំងសាំង ខណ្ឌពោធិ៍សែនជ័យ និងម្នាក់មិនទាន់ស្គាល់ឈ្មោះ។ ក្រោយពេលកើតហេតុ សមត្ថកិច្ចទាក់ទងទៅក្រុមគ្រួសារសព ដើម្បីយកទៅធ្វើបុណ្យតាមប្រពៃណី ចំណែករថយន្ដបង្ក និងម៉ូតូ ត្រូវបានយកទៅរក្សាទុកដើម្បីរង់ចាំការដោះស្រាយ នៅពេលក្រោយ។ ជាមួយគ្នានេះអ្នកបើករថយន្តកុងតឺន័រ និងព្រូរថយន្តក៏ត្រូវបានសមត្ថកិច្ចចាប់ខ្លួនផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]