ខេត្តសៀមរាប ៖ សេចក្តីរាយការណ៍បឋមបានឲ្យដឹងថា ម៉ូតូអូសរ៉ឺម៉ក១គ្រឿងបានឆេះយ៉ាងសន្ធោសន្ធៅបង្កឱ្យមានការភ្ញាក់ផ្អើលកាលពីវេលាម៉ោង៧ និង៤០នាទីព្រឹក ថ្ងៃទី២០ ខែមិថុនា ឆ្នាំ២០១៦ នៅក្បែរចិញ្ចើមផ្លូវជាតិលេខ៦ ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ។ សេចក្តីរាយការណ៍បានឲ្យដឹងទៀតថា ការឆេះនេះបណ្ដាលមកពីចូលចាក់សាំងមិនព្រមពន្លត់ម៉ាស៊ីនម៉ូតូ ។
តាមប្រភពពីអ៊ុំប្រុសម្នាក់ដែលជាអ្នកលក់សាំងនៅតាមចិញ្ចើមផ្លូវជាតិលេខ៦ បានប្រាប់«កោះសន្តិភាព»នៅកន្លែងថា មុនដំបូង មានម៉ូតូដឹកឥវ៉ាន់របស់ សេង លី កាត់កញ្ចក់ បានមកចាក់សាំង១លីត្រ ប៉ុន្តែមិនបានពន្លត់ម៉ាស៊ីនទេ ។ ខណៈនោះគាត់បានប្រាប់អ្នកបើកម៉ូតូថា ក្មួយពន្លត់ម៉ូតូសិនទៅ ពេលនោះអ្នកបើកម៉ូតូមិនស្តាប់តាមគាត់ទេ បែរជាឱ្យចាក់សាំងមកមិនអីទេ ប៉ុន្តែចាក់សាំងមិនទាន់បានប៉ុន្មាននាទីផងស្រាប់តែឆេះចេញពីធុងសាំងយ៉ាងសន្ធោរសន្ធៅតែម្តង បង្កឱ្យភ្ញាក់ផ្អើលដល់អ្នកធ្វើដំណើរតាមដងផ្លូវជាតិលេខ៦ ខ្លះនាំគ្នាជួយពន្លត់ ខ្លះជះខ្សាច់ ខ្លះជះទឹក ប្រហែលជិត១ម៉ោងទើបរលត់អស់ទាំងស្រុង រួចក៏នាំគ្នារុញម៉ូតូទាំងឥវ៉ាន់ យកទៅកន្លែងដើម្បីធ្វើការដោះដូរម៉ូតូយកឥវ៉ាន់ទៅឱ្យម៉ូយ ។
ចំណែកអ្នកបើកម៉ូតូរ៉ឺម៉កដឹកឥវ៉ាន់ សេង លី កាត់កញ្ចក់ នោះមានឈ្មោះ សា ប៉េងស៊ុន ភេទប្រុស អាយុ២៨ឆ្នាំ មុខរបរជាងកាត់កញ្ចក់ឱ្យ សេង លី មានទីលំនៅភូមិត្រាំនាគ សង្កាត់ស្លក្រាម ក្រុងសៀមរាប ដែលជិះម៉ូតូម៉ាក អឹមដេ ពណ៌ក្រហម ពាក់ស្លាកលេខ សៀមរាប 1Q-5381 ពីលិចមកកើត ៕
កំណត់ហេតុខ្មែរឡូត
គូររំលឹកថា កាលពីថ្ងៃទី១៧ ឧសភាឆ្នាំ២០១៦ មានការភ្ញាក់ផ្អើលមួយដោយសារ ម៉ូតូមួយគ្រឿងបានឆាបឆេះខ្ទេច ខណៈកំពុងបើកលើដងផ្លូវជាតិលេខ59A ក្នុងទិសដៅពីជើងទៅត្បូង ក្នុងភូមិរស្មីសាមគ្គីសង្កាត់និមិត្ត ក្រុងប៉ោយប៉ែត។
ប្រភពពីកន្លែងកើតហេតុថា គេឃើញម៉ូតូបានឆាបឆេះទាំងស្រុងនៅសល់តែគ្រោងឆ្អឹង មិនឃើញអ្នកបើកទេ តែអ្នកស្រុកបានប្រាប់ថា អ្នកបើកនោះជាក្មេងប្រុសជំទង់ម្នាក់ អាយុប្រហែលជាង១០ឆ្នាំ បានរត់ចោលម៉ូតូ សង្ស័យភ័យពេក ។
ជុំវិញករណីខាងលើ លោកម៉ារិន នាយប៉ុស្តិ៍រដ្ឋបាលនគរបាលសង្កាត់និមិត្តបានប្រាប់តាមទូរស័ព្ទថា ម៉ូតូដែលឆេះខាងលើម៉ាកសង់C110 ពណ៌ខ្មៅ ដែលមានម្ចាស់ឈ្មោះយាយប៉ាន់ រស់នៅក្នុងភូមិកើតហេតុ ។
លោកមេប៉ុស្តិ៍បន្តថា ម៉ូតូនោះយោងការសួរនាំ គឺស្រក់សាំងប្រហែលជាចំប៊ូស៊ី ទើបបង្កជាការឆាបឆេះយ៉ាងដូច្នេះ ។ យ៉ាងណាក៏ដោយ លោកមេប៉ុស្តិ៍បញ្ជាក់ថា មិនទាន់ស្គាល់អត្តសញ្ញាណអ្នកបើកបរនៅឡើយទេ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]