Ronaldo ស៊ុតប៉េណាល់ទីអត់ចូល ធ្វើឲ្យព័រទុយហ្គាល់ បានត្រឹមស្មើ ខណៈ បែលហ្ស៊ិក លុត សារធារណៈរដ្ឋអៀរឡង់ ៣-០

បារាំង៖ ព័រទុយហ្កាល់ ខកចិត្តទៀតហើយ ដោយមិនទាន់ស្គាល់ពាក្យថាឈ្នះសោះ ក្នុងពានរង្វាន់ទ្វីបអ៊ឺរ៉ុប EURO 2016 នេះ ដោយប្រកួតបានត្រឹមស្មើ អូទ្រីស ០-០ ហើយអ្វីដែលគួរឲ្យកត់សម្គាល់នោះគឺ Cristiano Ronaldo ខកខានឱកាសពិសេស ក្នុងការស៊ុតបាល់ប៉េណាល់ទី ១១ម៉ែត្រ ។

ការប្រកួតពានរង្វាន់ទ្វីបអ៊ឺរ៉ុប EURO 2016 វគ្គជម្រុះក្នុងពូល ជុំទី២ ត្រូវបានបញ្ចប់កាលពីយប់មិញនេះ ដោយការប្រកួតក្នុងពូល E និង F ។

ការប្រកួតក្នុងពូល F កាលពីយប់មិញ មាន២គូ ដែលព័រទុយហ្គាល់ បានប្រកួតស្មើ ដោយគ្មានការស៊ុតបញ្ចូលទីគ្នា ជាមួយអូទ្រីស ស្របពេលដែលកីឡាករកំពូល Ronaldo ស៊ុតបាល់ប៉េណាល់ទីមិនចូល ដោយស៊ុតចំបង្គោលទី នៅនាទី៧៩ ។ ដោយឡែក ហុងគ្រី ដែលស្ថិតក្នុង ពូលF នេះ ក៏ប្រកួតបានត្រឹមស្មើជាមួយ អ៊ីស្លង់ ដែរ គឺក្នុងលទ្ធផល ១-១ ។

ដូច្នេះហុងគ្រី បន្តឈរលេខ១ ក្នុងពូលF ខណៈដែលព័រទុយហ្កាល់ អ៊ីស្លង់ និងអូទ្រីស នៅតែមានឱកាសបន្តទៅវគ្គ ១៦ក្រុមចុងក្រោយ។

ចំនែកឯការប្រកួតក្នុងពូលE វិញ បែលហ្ស៊ិក បន្ទាប់ពីចាញ់ អីុតាលីរួចមក បានស្តារមុខមាត់ឡើងវិញ ដោយបានបំបាក់ សារធារណៈអៀរឡង់ ៣-០ ដោយការស៊ុតបញ្ចូលទីពី កីឡាករ Lukaku ២គ្រាប់ និង Witsel មួយគ្រាប់ ។

ដូច្នេះបែលហ្ស៊ិក នៅតែមានសង្ឃឹមបានឡើងបន្ត ខណៈដែលអីុតាលីវិញ បានឡើងទៅវគ្គ ១៦ក្រុមចុងក្រោយដោយស្វ័យប្រវត្តិ បន្ទាប់ពីឈ្នះស៊ុយអែត ១-០ កាលពីម្សិលមិញ៕

ប្រភព៖ BBC | Skysports