ខេត្តកំពត ៖ ដោយសារតែអ្នកបើកបរខ្វះការប្រុងប្រយ័ត្ន មិនគោរពច្បាប់ចរាចរណ៍ ជាពិសេសបងប្អូនជាអ្នកបើករថយន្តដឹកអ្នកដំណើរ ត្រូវតែមានការប្រុងប្រយ័ត្នឱ្យបានខ្ពស់បំផុត ពីព្រោះអាយុជីវិតអ្នកជិះរាប់សិបនាក់បានផ្ញើទៅលើអ្នកបើកបរតែម្នាក់គត់ ដូច្នេះ កុំយកជីវិតគេទៅលេងសើចឱ្យសោះ គឺត្រូវគោរពច្បាប់ចរាចរណ៍ជាចម្បង ។
ជាក់ស្តែង ករណីគ្រោះថ្នាក់ចរាចរណ៍មួយ កើតឡើងស្ថិតលើកំណាត់ផ្លូវជាតិលេខ៣ (កំពត-ព្រះស៊ីហនុ) ត្រង់ចំណុចភូមិទទឹងថ្ងៃ ឃុំបឹងទូក ស្រុកទឹកឈូ កាលពីវេលាម៉ោង០២រសៀលថ្ងៃទី០៦ ឧសភា ២០១៦ ដែលបង្កឡើងដោយរថយន្តម៉ាកសាំយ៉ុងចំនួន២គ្រឿង បើកក្នុងទិសដៅបញ្ច្រាសគ្នាបានបុកគ្នាយ៉ាងពេញទំហឹង ក្រោយមកបណ្តាលឱ្យឆ្លងចរន្តភ្លើងឆេះយ៉ាងសន្ធោសន្ធៅខូចខាតអស់រថយន្តទាំង២គ្រឿង ។
នៅក្នុងករណីគ្រោះថ្នាក់ខាងលើនេះ ត្រូវបាននគរបាលចរាចរការិយាល័យផ្លូវគោកនៃស្នងការដ្ឋាននគរបាលខេត្តឱ្យដឹងថា ក្នុងពេលកើតហេតុ មេឃកំពុងមានភ្លៀងធ្លាក់ និងមានរថយន្តម៉ាកសាំយ៉ុងដឹកអ្នកដំណើរ២គ្រឿង ដោយមួយគ្រឿង ពណ៌លឿង គ្មានស្លាកលេខ ក្នុងទិសដៅពីលិច ទៅកើត តែពុំដឹងថា មានផ្ទុកអ្នកដំណើរប៉ុន្មាននាក់នោះទេ ។
រីឯមួយគ្រឿងទៀត ពណ៌ទឹកប្រាក់ពាក់ស្លាកលេខព្រះសីហនុ2A-5361 មានផ្ទុកអ្នកដំណើរចំនួន៩នាក់ ទាំងអ្នកបើកបរ ក្នុងទិសដៅពីកើតទៅលិច។
លុះមកដល់ចំណុចកើតហេតុ គេឃើញរថយន្តសាំយ៉ុងពណ៌លឿង បានរេចង្កូតមកបុកខាងស្តាំរថយន្តពណ៌ទឹកប្រាក់ពេញទំហឹង បណ្តាលឱ្យបែកផ្កាភ្លើង ។ មួយសន្ទុះក្រោយមក ក៏ចេញជាអណ្តាតភ្លើងឆេះតែម្តង រីឯមនុស្សដែលជិះនៅក្នុងរថយន្តទាំង៩នាក់បានរងរបួសស្រាល៥នាក់ (ស្រី១នាក់) ។
សមត្ថកិច្ចឱ្យដឹងទៀតថា ដំបូងឆេះតែរថយន្ត១គ្រឿងទេ តែដោយសាររថយន្តទាំង២ ក្រោយពីជួបហេតុការណ៍នៅមិនឃ្លាតពីគ្នាប៉ុន្មាននោះ ទើបឆេះទាំងពីរគ្រឿងតែម្តង ។
ទោះបីរថយន្តពន្លត់អគ្គិភ័យទៅជួយអន្តរាគមន៍ពន្លត់ ក៏មិនទាន់ផង ត្រូវឆេះអស់ស្ទើរទាំង២គ្រឿង ។ ចំណែកជនរងគ្រោះ និងឈ្មោះម្ចាស់រថយន្តសមត្ថកិច្ចមិនទាន់បានដកស្រង់ទេ ៕
ប្រភព៖ កោះសន្តិភាព
កំណត់ហេតុខ្មែរឡូត
គួររំលឹកផងដែរថា កាលពីវេលាម៉ោង៩ និង៣០យប់ថ្ងៃទី៤ ឧសភា ឆ្នាំ២០១៦ ស្ថិតនៅលើកំណាត់ផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ២៥-២៦ ក្នុងភូមិស្រះសង្គម ឃុំពើក ស្រុកអង្គស្នួល ខេត្តកណ្ដាល សោកនាដកម្មនៅក្នុងគ្រួសារមួយ ដែលបានជួបនូវឧបទ្ទវហេតុគ្រោះថ្នាក់ចរាចរណ៍មួយគួរឲ្យរន្ធត់ បណ្ដាលឲ្យស្ត្រីជាប្រពន្ធ និងកូនស្រីបានស្លាប់យ៉ាងអាណោចអធ័ម ចំណែកបុរសជាប្ដីបានរងរបួសយ៉ាងធ្ងន់ធ្ងរ និងត្រូវបានប៉ូលិសហៅរថយន្តពេទ្យ ដឹកយកទៅសង្គ្រោះបន្ទាន់ភ្លាមៗដែរ ។
ជនរងគ្រោះទាំងនោះជិះរថយន្តម៉ាកកូរ៉ូឡា១គ្រឿង ហើយត្រូវបានរថយន្តធុនយក្សម៉ាកហ៊ីណូ១គ្រឿងទៀត ជ្រុលទៅបុកយ៉ាងពេញទំហឹង ក្នុងពេលកំពុងបើកបរច្រាស់គ្នា បណ្ដាលឲ្យរថយន្តកូរ៉ូឡាខ្ទេចទាំងស្រុង ក្លាយជាដែកអេតចាយ និងបានកៀបជនរងគ្រោះខាងលើជាប់ និងប្រើពេលយ៉ាងយូរ ទើបគាស់យកចេញរួច ។
ជនរងគ្រោះខាងលើប្រពន្ធដែលស្លាប់ឈ្មោះយិន បុប្ផា អាយុ២៦ឆ្នាំ និងកូនស្រីស្លាប់ឈ្មោះនី អាយុ៥ឆ្នាំ ចំណែកបុរសជាប្ដី និងជាអ្នកបើកបររថយន្តឈ្មោះខៀវ រិទ្ធីពិសិដ្ឋ អាយុ២៩ឆ្នាំ រងរបួសធ្ងន់ធ្ងរបំផុតអ្នកទាំងអស់គ្នា មានទីលំនៅក្នុងភូមិខ្នារតានង ឃុំស្វាយរំពេរ ស្រុកបរសេដ្ឋ ខេត្តកំពង់ស្ពឺ ជិះរថយន្តម៉ាកតូយ៉ូតាកូរ៉ូឡា១គ្រឿង ពណ៌ក្រហម ពាក់ស្លាកលេខភ្នំពេញ 2D-1060 ចំណែករថយន្តបង្កធុនយក្សម៉ាក ហ៊ីណូពណ៌ខ្មៅ ពាក់ស្លាកលេខក្រុងព្រះសីហនុ 3A-2811ហើយអ្នកបើកបរមិនត្រូវបានស្គាល់ឈ្មោះនោះទេបានរត់គេចខ្លួនទៅបាត់ស្រមោល ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]