ខេត្តកណ្តាល ៖ សោកនាដកម្មនៅក្នុងគ្រួសារមួយ ដែលបានជួបនូវឧបទ្ទវហេតុគ្រោះថ្នាក់ចរាចរណ៍មួយគួរឲ្យរន្ធត់ បណ្ដាលឲ្យស្ត្រីជាប្រពន្ធ និងកូនស្រីបានស្លាប់យ៉ាងអាណោចអធ័ម ចំណែកបុរសជាប្ដីបានរងរបួសយ៉ាងធ្ងន់ធ្ងរ និងត្រូវបានប៉ូលិសហៅរថយន្តពេទ្យ ដឹកយកទៅសង្គ្រោះបន្ទាន់ភ្លាមៗដែរ ។
ជនរងគ្រោះទាំងនោះជិះរថយន្តម៉ាកកូរ៉ូឡា១គ្រឿង ហើយត្រូវបានរថយន្តធុនយក្សម៉ាកហ៊ីណូ១គ្រឿងទៀត ជ្រុលទៅបុកយ៉ាងពេញទំហឹង ក្នុងពេលកំពុងបើកបរច្រាស់គ្នា បណ្ដាលឲ្យរថយន្តកូរ៉ូឡាខ្ទេចទាំងស្រុង ក្លាយជាដែកអេតចាយ និងបានកៀបជនរងគ្រោះខាងលើជាប់ និងប្រើពេលយ៉ាងយូរ ទើបគាស់យកចេញរួច ។
គ្រោះថ្នាក់ចរាចរមួយនោះ បានកើតឡើង កាលពីវេលាម៉ោង៩ និង៣០យប់ថ្ងៃទី៤ ឧសភា ឆ្នាំ២០១៦ ស្ថិតនៅលើកំណាត់ផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ២៥-២៦ ក្នុងភូមិស្រះសង្គម ឃុំពើក ស្រុកអង្គស្នួល ខេត្តកណ្ដាល ។
ជនរងគ្រោះខាងលើប្រពន្ធដែលស្លាប់ឈ្មោះយិន បុប្ផា អាយុ២៦ឆ្នាំ និងកូនស្រីស្លាប់ឈ្មោះនី អាយុ៥ឆ្នាំ ចំណែកបុរសជាប្ដី និងជាអ្នកបើកបររថយន្តឈ្មោះខៀវ រិទ្ធីពិសិដ្ឋ អាយុ២៩ឆ្នាំ រងរបួសធ្ងន់ធ្ងរបំផុតអ្នកទាំងអស់គ្នា មានទីលំនៅក្នុងភូមិខ្នារតានង ឃុំស្វាយរំពេរ ស្រុកបរសេដ្ឋ ខេត្តកំពង់ស្ពឺ ជិះរថយន្តម៉ាកតូយ៉ូតាកូរ៉ូឡា១គ្រឿង ពណ៌ក្រហម ពាក់ស្លាកលេខភ្នំពេញ 2D-1060 ចំណែករថយន្តបង្កធុនយក្សម៉ាក ហ៊ីណូពណ៌ខ្មៅ ពាក់ស្លាកលេខក្រុងព្រះសីហនុ 3A-2811ហើយអ្នកបើកបរមិនត្រូវបានស្គាល់ឈ្មោះនោះទេបានរត់គេចខ្លួនទៅបាត់ស្រមោល ។
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកដែរថា ទាក់ទងនឹងករណីនេះដែរ គ្រួសាមួយជាកម្មកររោងចក្រ ជិះម៉ូតូទៅស្រុកកំណើត ពេលឈប់សម្រាកបុណ្យចូលឆ្នាំខ្មែរ បានជួបគ្រោះថ្នាក់ចរាចរណ៍ ត្រូវរថយន្តបើកកៀរហើយកិនបណ្ដាលឱ្យម្ដាយ និងកូនប្រុស អាយុ១១ខែស្លាប់ ចំណែកឪពុករងរបួសស្រាល ដែលហេតុការណ៍នេះ កើតឡើងកាលពីវេលាម៉ោង១ និង២០នាទីរសៀល ថ្ងៃទី០៩ ខែមេសា ឆ្នាំ២០១៦ នៅចំណុចលើស្ពានព្រែកក្ដាម (ស្ពានមិត្តភាពកម្ពុជា-ចិន) ស្ថិតក្នុងភូមិព្រែកក្ដាម១ ឃុំកោះចិន ស្រុកពញាឮ ខេត្តកណ្ដាល ។
មន្ត្រីនគរបាលស្រុកពញាឮ បានឱ្យដឹងថា ជនរងគ្រោះដែលស្លាប់ក្នុងហេតុការណ៍គ្រោះថ្នាក់ចរាចរណ៍នេះ ឈ្មោះ ឈូក នី អាយុ២៥ឆ្នាំ ជាម្ដាយ និងកូនប្រុសអាយុ១១ខែម្នាក់ រីឯឪពុករងរបួសស្រាលឈ្មោះ ញឹក គុណ អាយុ២៩ឆ្នាំ ។ ទាំង៣នាក់ជិះម៉ូតូមួយគ្រឿងម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1AA-5973 និងមានទីលំនៅភូមិត្រពាំងរាំង ឃុំត្រពាំងរាំង ស្រុកព្រៃឈរ ខេត្តកំពង់ចាម ។ ចំណែករថយន្តបង្ករហេតុម៉ាកហ៊ីយ៉ាន់ដាយ ប្រភេទដឹកទំនិញធុនធំ ពណ៌ស ពាក់ផ្លាកលេខ ភ្នំពេញ 3B-3508 ។
មន្ត្រីនគរបាលដដែល បានឱ្យដឹងបន្ថែមទៀតថា គ្រួសារជនរងគ្រោះ ជាកម្មកររោងចក្រនៅបែកចានបានជិះម៉ូតូឌុបគ្នា ទៅស្រុកកំណើត ពេលឈប់សម្រាកបុណ្យចូលឆ្នាំខ្មែរ ខណៈជិះមូតូដល់កន្លែងកើតហេតុ ស្រាប់តែរថយន្ដម៉ាកហ៊ីយ៉ាន់ដាយ បើកឡើងស្ពានក្នុងទិសដៅ ពីលិចទៅកើត(ភ្នំពេញ-កំពង់ចាម) បានកៀរដួលម៉ូតូជនរងគ្រោះដែលកំពុង ដែលកំពុងជិះស្របទិសគ្នា ហើយរថយន្តបានកិន ជនរងគ្រោះ២នាក់ម្ដាយ និងកូនប្រុសអាយុ១១ខែ បណ្ដាលឱ្យស្លាប់នៅនឹងកន្លែងកើតហេតុ ចំណែក អ្នកបើកបរម៉ូតូជាប្ដី និងជាឪពុករងរបួសស្រាល ភ្លាមៗនោះរថយន្តបង្កបានបើកគេចទៅចតទុកនៅលើផ្លូវលំមួយ ចំណែកអ្នកបើកបរបានរត់គេចខ្លួនបាត់ ។
ក្រោយពេលកើតហេតុ នគរបាលចរាចរណ៍ស្រុក បានតាមរកឃើញរថយន្តបង្ក និងយកមករក្សាទុកនៅអធិការដ្ឋាននគរបាលស្រុក ដើម្បីចាត់ការបន្តតាមច្បាប់ ចំណែកសពបានប្រគល់ឱ្យក្រុមគ្រួសារ យកទៅធ្វើបុណ្យតាមប្រពៃណី ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]