(ភ្នំពេញ)៖ បុរសអ្នកលក់ធុរេនម្នាក់ បានយកកាំបិតដេញកាប់ កម្លាំងសន្តិសុខរៀបចំសណ្តាប់ធ្នាប់ ពេលចុះរៀបចំសណ្តាប់ធ្នាប់តាម ចិញ្ចើមផ្លូវ ត្រូវបានសមត្ថកិច្ចឃាត់ទាន់ និងបាននាំមកអប់រំ នៅព្រឹកម៉ោង៩ ថ្ងៃទី៤ ខែឧសភា ឆ្នាំ២០១៦ ត្រង់ចំណុចភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ។
ជនបង្កខាងលើមានឈ្មោះ ផេន ម៉េង អាយុ៤៣ឆ្នាំ មុខរបរលក់ធុរេន ស្នាក់នៅភូមិសាមគ្គី២ សង្កាត់ត្រពាំងក្រសាំង ខណ្ឌពោធិ៍សែនជ័យ មានស្រុកកំណើតនៅឃុំឈើខ្មៅ ស្រុកកោះធំ ខេត្តកណ្តាល។
សមត្ថកិច្ចបានឱ្យដឹងថា «មុនពេលកើតហេតុ កម្លាំងសន្តិសុខចុះរៀបចំសណ្តាប់ធ្នាប់ នៅតាមដងផ្លូវជាតិលេខ៤ មុខផ្សារជម្ពូវ័ន ឱ្យក្រុមអ្នកលក់ដូរថយទៅក្រោយ ដើម្បីសម្រួលចរាចរណ៍កុំឱ្យកកស្ទះ ស្រាប់តែបុរសលក់ធុរេនម្នាក់នេះ បានទាញកូនកាំបិតបម្រុង នឹងចាក់លើសន្តិសុខ តែត្រូវបានសមត្ថកិច្ចប៉ុស្តិ៍ចោមចៅឃាត់ខ្លួនទាន់ ដោយបានបង្កការភ្ញាក់ផ្អើលពេញផ្សារ»។
ក្រោយពីបានឃាត់ខ្លួនរួចហើយ សមត្ថកិច្ចបាននាំជនបង្កយកទៅអប់រំ នៅប៉ុស្តិ៍សង្កាត់ចោមចៅ ហើយក៏បានដោះលែងវិញ ព្រោះជនបង្ក មិនបានធ្វើឱ្យមានរបួសស្នាមអ្វីទេ៕
ប្រភព៖ Fresh News
កំណត់ហេតុខ្មែរឡូត៖
ករណីស្រដៀងគ្នានេះដែរ ក្មេងទំនើង២ក្រុម ប្រដាប់ដោយកាំបិត និងដំបង បានកាប់ចាក់គ្នាមួយប្រាវនៅក្នុងកម្មវិធីរាំធុងបាស់កម្សាន្ត កាលពីវេលាម៉ោង១០ និង១០នាទីយប់ថ្ងៃទី២៩ មីនា ស្ថិតនៅក្នុងភូមិស្រែអូរ ឃុំកកោះ ស្រុកមោងប្ញស្សី បណ្ដាលឱ្យមានរងរបួសធ្ងន-ស្រាលចំនួន៤នាក់ ហើយត្រូវឃាត់ខ្លួន៣នាក់ រីឯមួយចំនួនទៀត ដាក់មេប្រូចចោលស្រុកអស់ទាំងយប់ ។
ប្រភពឱ្យដឹងថា ក្រុមក្មេងទំនើងទាំង២ក្រុមនោះ បានប្រយុទ្ធគ្នាយ៉ាងឃោរឃៅនៅក្នុងកម្មវិធីរាំធុងបាស់កម្សាន្តក្នុងភូមិ ដែលរៀបចំដោយយុវជនម្នាក់ឈ្មោះឡាង ប៉ូរី អាយុ២៣ឆ្នាំ តែមិនបានសុំច្បាប់ទម្លាប់ ឬទំនាក់ទំនងសុំកិច្ចសហការពីសមត្ថកិច្ចមូលដ្ឋានទេ។ មន្ត្រីដដែលបន្តថា ពួកគេបានប៉ះទង្កិចគ្នាពេលកំពុងរាំកំសាន្ត លុះបន្តិចក្រោយមក ក៏ឈានដល់ការប្រើកាំបិត និងដំបងដេញកាប់ ដេញវាយគ្នាផ្អើលពេញកម្មវិធីតែម្ដង ។
បើតាមសេចក្ដីរាយការណ៍ថា ការប្រយុទ្ធគ្នាដូចកំរោលចូលរវាង២ក្រុមនេះ បណ្ដាលឱ្យគួរបក្សដិបក្ស៤នាក់រងរបួសជាទម្ងន់ ។ ជនខ្លះរយះក្បាល ខ្លះរបួសដងខ្លួន និងរបួសដៃជើង ហូរឈាមស្រោចខ្លួន ហើយត្រូវសាច់ញាតិបញ្ជួនទៅកាន់មន្ទីរពេទ្យទាំងយប់ភ្លាមៗដែរ ដើម្បីសង្គ្រោះបន្ទាន់ ។
កម្លាំងសមត្ថកិច្ចបានចុះអន្តរាគមន៍ទាំងយប់ ក្រោយពីទទូលបានព័ត៏មាននេះ ប៉ុន្តែជនដៃដល់បានរត់គេចខ្លួនអស់បាត់ទៅហើយ លុះព្រឹកថ្ងៃទី៣០ មីនា ទើបសមត្ថកិច្ចតាមឃាត់ខ្លួនបានចំនួន៣នាក់ ក្នុងចំណោមជាង១០នាក់ ។
ជនទាំង៣នាក់ត្រូវសមត្ថកិច្ចឃាត់ខ្លួន ១-ឈ្មោះខុន សុផល ហៅង៉ា អាយុ២២ឆ្នាំ ២-ឈ្មោះខេង ខឿន អាយុ២០ឆ្នាំ និង៣-ឈ្មោះឡាត់ និមល អាយុ២០ឆ្នាំ ពួកគេរស់នៅក្នុងភូមិចកធំ ឃុំកកោះ ស្រុកមោងប្ញស្សី ។
សមត្ថកិច្ចក៏បានបញ្ជាក់ដែរថា ក្មេងទំនើងទាំង២ក្រុមនេះ គ្មានក្រុមណាមួយ ជាក្រុមរងគ្រោះទេ គឺសុទ្ធតែជនល្មើសទាំងអស់ ហើយពេលនេះសមត្ថកិច្ចកំពុងតាមចាប់ខ្លួនជនដៃដល់មួយចំនួនទៀត ដែលកំពុតរត់ចោលស្រុក ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]