ខេត្តកំពង់ឆ្នាំង ៖ បុរសជាប្តីដោយសារតែខឹងនឹងប្រពន្ឋមិនព្រមមកផ្ទះ ក្នុងឱកាសបុណ្យចូលឆ្នាំខ្មែរនេះ បានយកភ្លើងដុតផ្ទះខ្លួនឯង ដែលជាប់គ្នា និងផ្ទះម្តាយក្មេក បណ្តាលអោយឆេះខ្ទេច ទាំង២ខ្នង មិនអាចជួយបានឡើយ ។
ហេតុការណ៍នេះបានកើតឡើង នៅវេលាម៉ោង៥ និង៣០នាទីរសៀល ថ្ងៃទី១៥ ខែ មេសា ឆ្នាំ២០១៦ នៅភូមិក្បាលថ្នល់ ឃុំផ្សារ ស្រុកបរិបូរណ៍ ។
សមត្ថកិច្ចនគរបាលមូលដ្ឋានបានអោយដឹងថា ជនសង្ស័យដុតផ្ទះខ្លួនឯង និងផ្ទះម្តាយក្មេក មានឈ្មោះ អ៊ុក ភន អាយុ៣៤ឆ្នាំ ម្តាយក្មេកមានឈ្មោះ ប៉ិក តុំ អាយុ៧១ឆ្នាំ ជាស្ត្រីមេម៉ាយ ។
ជនដៃដល់បានដុតផ្ទះខ្លួនឯង ជាផ្ទះតូចមានទំហំ៣គុណនិង៤ម៉ែត្រ ធ្វើពីឈើប្រក់ និងបាំងជញ្ជាំងស្លឹក ដែលសង់ជាប់គ្នាជាមួយផ្ទះម្តាយក្មេក មានទំហំ៥គុណនិង៦ម៉ែត្រ ធ្វើពីឈើ ប្រក់និងបាំងជញ្ជាំងស្លឹក បណ្តាលអោយ ឆេះខ្ទេចទាំងស្រុងទាំងពីខ្នងតែម្តង ។
បើតាមសំដីរបស់ស្ត្រីជាម្តាយក្មេកបានអោយដឹងថា កូនស្រីគាត់ឈ្មោះ ថ្លាង សុគង់ អាយុ៣១ឆ្នាំ បានទៅធ្វើការនៅរោងចក្រ នៅខេត្តសៀមរាប ។
មុនពេលកើតហេតុប៉ុន្មានថ្ងៃនេះ គាត់ឃើញកូនប្រសារគាត់ បានឈ្លោះគ្នាជាមួយកូនស្រីគាត់ដែលត្រូវជាប្រពន្ធ តាមទូរសព្ទ័ស្ទើររាល់យប់ ហើយឮកូនប្រសារថា ចូលឆ្នាំនេះត្រូវមកផ្ទះ បើមិនមកទេ នឹងមានរឿងហើយ ។
លុះដល់ពេលចូលឆ្នាំ មិនឃើញកូនស្រីគាត់មកផ្ទះ កូនប្រសារគាត់បានដុតផ្ទះវា ឆេះរាលដល់ផ្ទះគាត់ឆេះខ្ទេច រូមទាំងទ្រព្យសម្បត្តិគាត់មួយចំនូនផង គ្មានយកអ្វីបានឡើយ ។
ស្ត្រីជាម្តាយបានបានបញ្ជាក់ថា ក្រៅពីខឹងនឹងប្រពន្ឋមិនមកផ្ទះ កូនប្រសារគាត់ក៏បានប្រចណ្ឌប្រពន្ឋវាផងដែរ តែអ្វីដែលធ្ងន់ជាងនេះទៀត គឺផ្ទះមួយខ្នង ដែលកូនប្រសារដុតនោះ គាត់បានលក់អោយគេ ក្នុងតម្លៃ៤លានរៀល និងបានយកប្រាក់ពីគេរួចហើយ រង់ចាំតែគេមករុះយកតែប៉ុណ្ណោះ ។
បើតាមសំដីអ្នកជិតខាងបានអោយដឹងថា ប្តីប្រពន្ឋពីរនាក់នេះ មិនសូវត្រូវគ្នាប៉ុន្មានទេ ឈ្លោះគ្នាញឹកញាប់ណាស់ ពេលដែលប្រពន្ឋមិនទាន់ចេញទៅធ្វើការនៅរោងចក្រ ហើយបើទោះជាខឹងគ្នាយ៉ាងណាក្នុងឱកាសបុណ្យចូលឆ្នាំនេះគួរតែមកមើលម្តាយ និងប្តីដែរ ។
ទោះយ៉ាងណាក្រោយកើតហេតុ សត្ថកិច្ចបានចាប់ឃាត់ខ្លួនបុរសជាប្តី ដើម្បីកសាងសំណុំរឿងតាមផ្លូវចាប់ ។
ផ្តល់សិទ្ធិដោយ កោះសន្តិភាព
កំណត់ហេតុខ្មែរឡូត
យ៉ាងណាមិញ កាលពីពេលថ្មីៗកន្លងទៅនេះ ក៏មានហេតុការណ៍ ស្រដៀងគ្នានេះដែរ ដោយសារតែ សុំលុយប្រពន្ធ យកទៅទិញស្រាផឹកមិនបាន ក៏ដុតបំផ្លាញ ទ្រព្យសម្បត្តិ និងវាយប្រពន្ធ ឲ្យរបួសតែម្តង។
បុរសម្នាក់ ដោយសារតែខឹង សុំលុយទិញស្រាផឹក បន្តមិនបាន បានដុតបំផ្លាញ ទ្រព្យសម្បត្តិក្នុងផ្ទះ និងឈានទៅ ប្រើអំពើហឹង្សាលើប្រពន្ធ បណ្តាលឲ្យរងរបួស ទើបទ្រាំលែងបាន ប្តឹងនគរបាលឲ្យចាប់ខ្លួន បុរសជាប្តី កសាងសំណុំរឿង បញ្ជូនទៅតុលាការ ចាត់ការទៅតាមនិតិវិធី។
មន្ត្រីនគរបាលស្រុកត្បូងឃ្មុំ បានឲ្យដឹងថា នៅថ្ងៃទី២៩ ខែមីនា ក្នុងភូមិវាលកណ្តៀង ឃុំជប់ ស្រុកត្បូងឃ្មុំ ជនល្មើសឈ្មោះ ទូច ធឿន ភេទប្រុស អាយុ៣៨ ឆ្នាំ បានផឹកស្រាស្រវឹងហើយធ្វើសកម្មភាព ដុតបំផ្លាញទ្រព្យសម្បត្តិ និង វាយតប់ទាត់ធាក់ ទៅលើស្ត្រីរងគ្រោះ ជាប្រពន្ធ ឈ្មោះ ស៊ឹម ស៊ីណា អាយុ៣៧ ឆ្នាំ ពីព្រោះតែខឹងនិង ប្រពន្ធមិនឲ្យលុយយក ទៅទិញស្រាផឹក បន្តទៀត។
មិនត្រឹមតែ វាយប្រពន្ធបណ្តាលឲ្យ រងរបួសគ្រាំគ្រា ឈឺចាប់ក្នុងខ្លួនប៉ុណ្ណោះទេ ថែមទាំង ដុតបំផ្លាញទ្រព្យសម្បត្តិ ឆេះខូចខាតម៉ូតូ ម៉ាកសេ១០០ កូរ៉េ ចំនួន១គ្រឿងទៀតផង។
មន្ត្រីនគរបាលឲ្យដឹងទៀតថា កន្លងមកជនល្មើសរូបនោះ បានធ្វើសកម្មភាព ប្រើអំពើហិង្សា និងបំផ្លិចបំផ្លាញទ្រព្យសម្បត្តិ ក្នុងគ្រួសារជាញឹកញាប់ ជាមួយគ្នានោះ សមត្ថកិច្ចប៉ុស្តិ៍ជប់ ក៍ធ្លាប់បានធ្វើកិច្ច សន្យាអប់រំ ច្រើនលើកមកហើយ តែជនល្មើសនេះ មិនព្រមកែប្រែ ទើបហេតុការណ៍លើកនេះ ធ្វើឲ្យស្ត្រីរងគ្រោះជាប្រពន្ធ សម្រេចចិត្តប្តឹង សមត្ថកិច្ចឲ្យ ឃាត់ខ្លួន បញ្ជូនទៅតុលាការ ផ្តន្ទាទោសតាមច្បាប់។
គួររំលឹកផងដែរថា ហេតុការណ៏ដុតបំផ្លាញទ្រព្យសម្បត្តិ ស្រដៀងគ្នានេះ ក៏បានកើតឡើង កាលពីវេលាម៉ោង ៣រសៀល ថ្ងៃ១ មីនា ២០១៦ កន្លងទៅនេះ នៅតាមបណ្តោយ ផ្លូវជាតិលេខ៧៦ ស្ថិតក្នុងភូមិអូរណា ឃុំស្រែខ្ទុម ស្រុកកែវសីមា ដោយផ្ទះឈើមួយខ្នង ត្រូវភ្លើងឆេះអស់ សល់តែផេះ ដោយសារស្នាដៃ កូនប្រុសអកតញ្ញូ ខឹងសុំលុយម្តាយមិនបាន ។
សាក្សីនៅកន្លែងកើតហេតុ បានឱ្យដឹងថា មុនកើតហេតុ កូនប្រុសម្ចាស់ផ្ទះ ឈ្លោះប្រកែកជាមួយម្តាយ រឿងសុំ លុយម្តាយ ៥ម៉ឺនរៀលមិនបាន និងគំរាមដេញម្តាយ ឱ្យចេញពីផ្ទះ បើសិនជាគ្មានលុយឱ្យ ។
ខណៈពេលឈ្លោះជាមួយម្តាយនោះ បានយកសាំងបំណងដុតផ្ទះ ម្តងជាពីរដង តែត្រូវអ្នកជិតខាង ជួយឃាត់ទាន់ ។ មិនបានប៉ុន្មាននាទីផង ស្រាប់តែកូនប្រុសរូបនេះ រត់ទៅយកសាំង ស្រោចលើជញ្ជាំងរួចដុត ហើយបានរត់គេចខ្លួន បាត់ស្រមោល ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]