រាជធានីភ្នំពេញ ៖ មកទល់ពេលនេះ គេកត់សម្គាល់ថា ចំណងស្នេហ៍រវាងកីឡាករបាល់ទាត់ល្បីឈ្មោះលោក ចាន់ វឌ្ឍនាកា និងកីឡាការិនីហែលទឹកល្បីឈ្មោះកញ្ញា ហែមថុន វិទិនី កាន់តែបង្ហាញភាពផ្អែមល្ហែមជាសាធារណៈ។ នៅក្នុងកម្មវិធីជប់លៀង ឬកម្មវិធីបើកសម្ពោធធំៗគេឃើញអ្នកទាំងពីរបណ្ដើរគ្នាក្នុងនាមជាគូស្នេហ៍ និងបានបង្ហោះពាក្យពេចន៍ល្អូកល្អិនគួរឲ្យច្រណែននៅលើបណ្ដាញសង្គមហ្វេសប៊ុក ដោយគ្មានលាក់បាំង ។
គ្មានអ្នកណាមិនចាប់អារម្មណ៍នោះទេ ក្នុងពេលដែលកីឡាករនិងកីឡាការិនីវ័យក្មេង និងល្បីឈ្មោះ២រូបដែលស្ថិតនៅក្នុងប្រភេទកីឡាផ្សេងគ្នា និងមានកេរ្តិ៍ឈ្មោះរៀងខ្លួន បានបើកចំហឲ្យឃើញនូវចំណងស្នេហ៍ ហើយជាទំនាក់ទំនងស្នេហាផ្អែមល្ហែមដែលអ្នកណាក៏ចាត់ទុកថា គឺជាស្នេហានៅក្នុងវិស័យកីឡាដ៏កម្រនៅក្នុងប្រទេសកម្ពុជា ។ អ្នកទាំងពីរគឺមិនខុសគ្នានឹងគូស្នេហ៍របស់លោក វ៉ន វីវ៉ា ដែលជាកីឡាករប្រដាល់ល្បីឈ្មោះ និងនាងស៊ន ដាវីន ដែលជាកីឡាការិនីផ្នែកតេក្វាន់ដូដែលមានស្នាដៃនោះទេ ។
អីុចឹងហើយទើបស្នេហារបស់កីឡាករ និងកីឡាការិនីទាំង២គូនេះ ចាប់តាំងពីមានការបើកចំហមក គឺមានការចាប់អារម្មណ៍ខុសប្លែក ។ យ៉ាងណាក៏ដោយ ស្នេហារវាងលោក ចាន់ វឌ្ឍនាកា ដែលជាខ្សែប្រយុទ្ធដ៏មានប្រជាប្រិយភាពនៅក្នុងពិភពបាល់ទាត់ និងកញ្ញាហែមថុន វិទិនី ដែលជាកីឡាការិនីជម្រើសជាតិផ្នែកហែលទឹកនៅកម្ពុជាហាក់កន្ត្រាក់បានការចាប់អារម្មណ៍ខ្លាំងជាង ដោយសារតែភាគីខាងប្រុសគឺជាកីឡាករឆ្នើមមិនខុសពីតារាល្បីម្នាក់ដែលមានមនុស្សភាគច្រើន ជាពិសេសយុវវ័យស្គាល់ច្រើននៅកម្ពុជា ។ អ្នកតាមដានភាគច្រើន បានសរសើរពីសំណាងរបស់ហែមថុន វិទិនី ដែលបានកំលោះមុខស្រស់ ចាន់ វឌ្ឍនាកា ជាកីឡាករលំដាប់ប្រទេសជ្រើសរើសជាគូស្នេហ៍ ប៉ុន្តែមនុស្សមួយក្រុមផ្សេងទៀត ក៏សរសើរចំពោះភាគីខាងប្រុសដូចគ្នា ដែលបានកីឡាការិនីហែលទឹករូបស្រស់ដែលមានសម្រស់ទាក់ទាញគួរឲ្យខ្នាញ់យូរមកហើយ ប្រគល់បេះដូង និងព្រមទទួលជាគូស្នេហ៍ ។
អ្នកទាំងពីរគឺជាគូស្នេហ៍ស័ក្តិសមបំផុតសម្រាប់ឆ្នាំ២០១៦នេះ ដោយត្រូវបានគេសរសើរថាសមទាំងរូបសម្រស់ និងសមទាំងកេរ្តិ៍ឈ្មោះព្រមគ្នាតែម្ដង ។ មនុស្សយ៉ាងហោចជាងពាក់កណ្ដាលនៃអ្នកស្នេហាវិស័យបាល់ទាត់ និងកីឡាហែលទឹក សុទ្ធតែលាន់មាត់ឲ្យមេដាយសម្រាប់ស្នេហារបស់ពួកគេ និងចង់ដឹងថាតើពួកគេនឹងកំណត់ថ្ងៃអាពាហ៍ពិពាហ៍ ឬភ្ជាប់ពាក្យនៅពេលណា ក្នុងពេលដែលភាគីទាំងពីរកាន់តែល្អូកល្អិនគ្នាហើយមិនទាន់គិតគូរពីរឿងចាស់ទុំនៅឡើយនោះ ។
ចាន់ វឌ្ឍនាកា បានប្រាប់ទូរទស្សន៍ PNN កាលពីពេលថ្មីៗនេះថា លោកនិងគូស្នេហ៍នៅមិនទាន់ច្បាស់រឿងរៀបការពេលណានៅឡើយទេ ដោយសារតែលោក និងនាងសុទ្ធតែនៅក្មេងៗ ហើយចង់ទុកពេលរកលុយ និងសាងកេរ្តិ៍ឈ្មោះឲ្យបានបន្តិចទៀតសិន ។ លោកថា ទំនាក់ទំនងស្នេហារបស់ខ្លួនបានកើតមានឡើងប្រមាណមួយរយៈមកហើយ បន្ទាប់ពីបានស្គាល់គ្នា ប៉ុន្តែទើបតែហ៊ានសារភាពស្រឡាញ់គ្នាពេញចិត្តគ្នា ក្រោយពេលដែលលោកកាន់តែល្បីឈ្មោះនៅក្នុងពិភពបាល់ទាត់ ។ លោកបានទាំងអះអាងថា រវាងនាងនិងលោក គឺមានទំនាក់ទំនងជាប្រចាំមិនថាជួបមុខដោយផ្ទាល់ និងឆ្លើយឆ្លងគ្នាតាមឆាត តាម Line ឬតាមទូរស័ព្ទ ដោយមិនសូវលស់ពេលនោះទេ ។ មិនខុសពីការអះអាងគេឃើញទំនាក់ទំនងរវាងលោក និងហែមថុន វិទិនី មិនសូវស្ថិតនៅឆ្ងាយពីគ្នានោះទេ ដោយរូបភាពដែលបានបង្ហោះនៅលើបណ្ដាញហ្វេសប៊ុក គឺជាភស្ដុតាងស្រាប់ ។
មកទល់ពេលនេះ មានការទម្លាយថា អ្នកទាំងពីរស្រឡាញ់គ្នា២ឆ្នាំមកហើយដោយភាគីខាងចាស់ទុំសុទ្ធតែដឹងទាំងអស់ ប៉ុន្តែមកពីចង់ទុកពេលមើលចិត្តគ្នាឲ្យច្បាស់ជាងនេះ និងចង់សន្សំលុយរៀងខ្លួនឲ្យបានច្រើនសិន ទើបគម្រោងតាមគន្លងប្រពៃណីត្រូវបានអូសបន្លាយ ។ ហែមថុន វិនិទី ដែលក្លាហានទទួលស្គាល់ស្នេហាជាមួយ ចាន់ វឌ្ឍនាកា រមែងបានអះអាងថា កីឡាកររូបនេះ និងក្រុមក្រុមគ្រួសាររបស់គេគឺជាមនុស្សល្អទើបនាងសម្រេចចិត្តទទួលយក និងថែមទាំងមានភាពកក់ក្ដៅក្រោយពីសម្រេចចិត្តស្រឡាញ់លោកចាន់ វឌ្ឍនាកា ។ អ្នកទាំងពីរទៅណាមកណាមិនខុសពីគូស្នេហ៍នោះទេ ដោយភាពស្និទ្ធស្នាលក៏បានលេចឡើងជាសាធារណៈផងដែរ គ្រប់ពេលដែលអ្នកទាំងពីរបង្ហាញមុខរួមគ្នា ។ ក្នុងនោះពួកគេក៏ត្រូវគេឮហៅគ្នាអូនបងៗ និងពេលខ្លះនិយាយស្ដីបែបស៊ីអារម្មណ៍នៅលើហ្វេសប៊ុកដើម្បីឲ្យមានការចាប់អារម្មណ៍ពីភាពល្អូកល្អិនរបស់ពួកគេនោះផង ។
មួយគូនេះ មានការប៉ាន់ប្រមាណថាបើថ្ងៃភ្ជាប់ពាក្យ ឬគម្រោងរៀបការចូលមកដល់ គឺ ពិតជាមានការចាប់អារម្មណ៍ច្រើនជាងគូស្នេហាតារាសិល្បៈនោះទៅទៀត ដោយសារតែអ្នកទាំងពីរគឺជាកីឡាករ-កីឡាការិនីលំដាប់ប្រទេស ហើយមានអ្នកស្រឡាញ់ពេញចិត្តភាគច្រើន ដោយមិនសល់សូម្បីតែថា្នក់ដឹកនាំជាតិ ។ អីុចឹងហើយ ទើបគេនៅតែឆ្ងល់ថាហេតុអ្វីអ្នកទាំងពីរមិនដាក់គម្រោងរៀបការឲ្យបានឆាប់ ក្នុងពេលកេរ្តិ៍ឈ្មោះ និងប្រជាប្រិយភាពរបស់ខ្លួនស្ថិតនៅក្នុងចំណាប់អារម្មណ៍របស់ជនរួមជាតិភាគច្រើននោះ ។
យ៉ាងណាក៏ដោយ ចាន់ វឌ្ឍនាកា ធ្លាប់បានឆ្លើយជំនួសហែមថុន វិទិនីហើយថា លោកនឹងចូលចែចូវ និងរៀបការតាមប្រពៃណីជាមួយនឹងម្ចាស់ស្នេហ៍រូបនេះ នៅពេលការប្រកួតបាល់ទាត់របស់លោកធូរស្បើយពីភាពមមាញឹកដូចរាល់ថ្ងៃនោះបន្តិច ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]