ខេត្តរតនគិរី ៖ ដោយសារជម្លោះរឿងជិះម៉ូតូកាត់មុខបណ្តាលឱ្យ២នាក់ម្តាយ-កូន រងរបួសដោយការចាក់នឹងកាំបិតធ្លាយពោះ ។ ហេតុការណ៍នេះបានកើតឡើងកាលពីវេលាម៉ោង១២ និង២០នាទីរំលងអធ្រាត្រឈានចូលថ្ងៃទី៦ សីហា នៅភូមិ១ សង្កាត់ឡាបានសៀក ក្រុងបានលុង ។
ជនរងគ្រោះទាំង២នាក់ ម្តាយឈ្មោះសន សុភាព អាយុ៤៩ឆ្នាំ រងរបួសពោះមួយកូនកាំបិតលិចជម្រៅប្រមាណ៣ហ៊ុន ចំណែកកូនឈ្មោះស៊ុន វិចិត្រ ភេទប្រុស អាយុ២៥ឆ្នាំ រងរបួសមួយកូនកាំបិតធ្លាយពោះចេញពោះវៀន បច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែកខេត្ត ។ ជនរងគ្រោះទាំង២នាក់ម្តាយ-កូន នេះមានមុខរបរលក់ក្រូច និងនំ ក្នុងផ្សារបានលុង (ហៅផ្សារល្ងាច) ចំណែកជនដៃដល់ឈ្មោះប្រុស មានមុខរបរលក់ងាវ ពងក្រួច នៅផ្សារល្ងាចដូចគ្នា រស់នៅក្នុងភូមិ សង្កាត់ជាមួយគ្នា និងជួលបន្ទប់ស្នាក់នៅជាប់គ្នាទៀត ហើយក្រោយពីបង្ករបួសស្នាមជនដៃដល់បានរត់គេចខ្លួនបាត់ ។
តាមស្ត្រីរងគ្រោះរៀបរាប់ថា នៅមុនពេលកើតហេតុ គាត់បានទៅប្រាប់ជនដៃដល់ឈ្មោះប្រុស កុំឱ្យជិះម៉ូតូកាត់មុខបន្ទប់គាត់ចូលមកដល់ជ្រៅពេក ព្រោះខែនេះមានភ្លៀងធ្លាក់កង់ម៉ូតូជាប់ភក់ ធ្វើឱ្យប្រឡាក់ ។ ក្រោយពីប្រាប់ល្ងាចនោះ ស្រាប់តែនៅវេលាយប់ឈ្មោះប្រុសបានមករករឿងគាត់ដល់មុខបន្ទប់ ដោយមានកាន់កាំបិតចុងស្រួចពណ៌ស មានដងពណ៌លឿងប្រវែងមួយចំអាមផង ។ ខណៈនោះក៏មានការបង្កការប្រទូស្តរ៉ាយគ្នា ហើយជនដៃដល់ឈ្មោះប្រុស បានចាក់មកលើគាត់ និងកូនប្រុសបណ្តាលឱ្យដួលសន្លប់នៅនឹងកន្លែងកើតហេតុ ។
ក្នុងហេតុការណ៍នេះ រូបគាត់ជាមួយកូនប្រុសត្រូវបានអ្នកជិតខាងយកមកមន្ទីរពេទ្យបង្អែកខេត្តទាំងយប់ ចំណែកជនដៃដល់រត់គេចខ្លួន២នាក់ប្តីប្រពន្ធបាត់ស្រមោលដោយទុកកូនប្រុសតូចៗ២នាក់ចោលក្នុងបន្ទប់ ។ទាក់ទិននឹងរឿងហេតុខាងលើ ត្រូវបានលោកឯម វន អធិការនគរបាលក្រុងបានលុង ឱ្យដឹងថា សមត្ថកិច្ចកំពុងស្រាវជ្រាវតាមចាប់ខ្លួនជនដៃដល់ឱ្យខាងតែបាន ព្រោះស្គាល់អត្តសញ្ញាណហើយ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]