រាជធានីភ្នំពេញ ៖ ទីបំផុតគម្រោងវេចបង្វិចឡើងយន្តហោះឆ្លងសមុទ្រទៅកាន់ប្រទេសកាណាដាជាលើកដំបូងរបស់តារាចម្រៀងស្រីលំដាប់កំពូលនាង ឱក សុគន្ធកញ្ញា ត្រូវបានពន្យារពេល ដោយសារតែតារាចម្រៀងរូបនេះកំពុងតែមមាញឹកដូចទឹកបាក់ទំនប់ក្នុងការកើបលុយនៅក្នុងស្រុក ។
តាមពិតគម្រោងចេញទៅប្រទេសកាណាដាជាលើកដំបូងរបស់តារាចម្រៀងស្រីដ៏ល្បីល្បាញក្នុងផលិតកម្មរស្មីហង្សមាសរូបនេះ គឺមានជាយូរមកហើយ ប៉ុន្តែដោយសារតែការងារសិល្បៈក្នុងស្រុករបស់នាងដែលស្ទើរដកដៃមិនរួចនោះទើបឱក សុគន្ធកញ្ញា សម្រេចពន្យារការចេញទៅសម្តែងក្នុងប្រទេសដ៏ស៊ីវិល័យមួយនេះវិញ ។
ទាក់ទិននឹងការចេញទៅសម្តែងនៅប្រទេសកាណាដា របស់ឱក សុគន្ធកញ្ញា ពេលនេះត្រូវបានក្រុមគ្រួសាររបស់នាងអះអាងថា កញ្ញាពិតជាមានគម្រោងចេញទៅសម្តែងនៅឯបរទេសប្រាកដមែន តែមិនដឹងច្បាស់ថា កញ្ញាទៅពេលណាឱ្យប្រាកដនោះទេ ដោយសារតែបច្ចុប្បន្នការងារដែលត្រូវចេញនោះកំពុងស្ថិតក្នុងការរត់ឯកសារនៅឡើយ ។
ផ្ទុយពីការបកស្រាយខាងលើនេះ គូស្នេហ៍ចាស់វស្សារបស់ឱក សុគន្ធកញ្ញា លោករ៉េតធី ដូណា បានអះអាងប្រាប់កោះសន្តិភាពនៅថ្ងៃទី៩ សីហា ២០១២ នេះថា តាមពិតគម្រោងចេញទៅប្រទេសកាណាដារបស់ឱក សុគន្ធកញ្ញា គឺត្រូវចេញទៅយូរហើយតែដោយសារការងារក្នុងស្រុករបស់នាងមិនទាន់អាចដកឃ្លាបាននោះ ទើបនាងសម្រេចលើកពេលវិញ ។ ទោះបីជាយ៉ាងណាតន្ត្រីករវ័យក្មេងរូបនេះនៅមិនទាន់ដឹងថា គូស្នេហ៍របស់ខ្លួននឹងត្រូវចេញទៅនៅពេលណាមួយឱ្យប្រាកដនៅឡើយទេ ។ លោកបញ្ជាក់បន្ថែមថា ប្រសិនបើឱក សុគន្ធកញ្ញា ចេញទៅសម្តែងនៅប្រទេសកាណាដានោះគឺអាចប្រើរយៈពេលប្រហែលជា២ខែទើបវិលមកកាន់ទឹកដីកំណើតវិញ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]