ខេត្តព្រៃវែង ៖ ស្នូរគ្រាប់កាំភ្លើងខ្លីបានលាន់ឡើងចំនួន២គ្រាប់ផ្ទួនៗគ្នានៅក្នុងឱសថស្ថានមួយឈ្មោះ«អង្គរវត្ត» ដែលមានទីតាំងស្ថិតនៅភូមិលេខ៣ សង្កាត់កំពង់លាវ ក្រុងព្រៃវែង ដែលភ្លាមៗនោះត្រូវបានគេដឹងថាជាអំពើឃាតកម្ម បាញ់ប្រហារមួយ ដែលមិនធ្លាប់កើតមានកន្លងមក ។ ខ្មាន់កាំភ្លើងដែលបាញ់ប្រហារមិនត្រូវបានស្គាល់មុខនោះទេ ។
ឧប្បត្តិហេតុបាញ់ប្រហារនេះបានកើតឡើងនៅវេលាម៉ោង៧និង៣០នាទីយប់ថ្ងៃទី១ សីហា បណ្តាលឱ្យស្ត្រីឈ្មោះលឹម នាង អាយុ៥៧ឆ្នាំ ជាម្ចាស់ឱសថស្ថានស្លាប់ក្នុងថ្លុកឈាម ។ ឃាតកម្មបាញ់សម្លាប់ស្ត្រីរងគ្រោះនេះត្រូវបានសមត្ថកិច្ចដាក់ការសង្ស័យថាអាចបណ្តាលមកពីរឿងគំនុំ ព្រោះឃាតករមិនបានយកវត្ថុមានតម្លៃណាមួយទៅទេ ក្រៅតែពីការពិឃាតជីវិតស្ត្រីរងគ្រោះ ប៉ុណ្ណោះ ហើយជាមួយនេះក៏មានការសន្និដ្ឋានថាជនដៃដល់អាចជាជនស៊ីឈ្មួលសម្លាប់មនុស្សផងដែរ ដែលជួលដោយនរណាម្នាក់នៅពីក្រោយខ្នង ។
ស្ត្រីរងគ្រោះមានប្តីឈ្មោះហាស់ ថុល ហៅប៉េ អាយុ៥៩ឆ្នាំ និងមានកូន៣នាក់ ស្រីទាំងអស់ ។ ក្រៅពីមុខរបរបើកឱសថស្ថាន ក្រុមគ្រួសារនេះក៏ជាម្ចាស់សណ្ឋាគារអង្គរធំផងដែរ ។
តាមប្រភពព័ត៌មានថា នៅពេលកើតហេតុបុរសជាប្តីបានស្ថិតនៅជាន់ទី២ នៃឱសថស្ថាន ដែលជាផ្ទះស្នាក់នៅផងដែរនោះ ។ ថ្វីបើមានការចាត់ទុកថាជាការបាញ់ប្រហារដោយគំនុំក្តី ក៏មិនទាន់មានការសន្និដ្ឋានណាមួយឱ្យច្បាស់នៅឡើយថា តើឃាតករ ពិតជាមានបំណងយកជីវិតប្រពន្ធ ឬបែបណា ។ តាមការធ្វើកោសល្យវិច័យលើសពស្ត្រីរងគ្រោះត្រូវបានប៉ូលិសក្រុងព្រៃវែងឱ្យដឹងថា ស្ត្រីរងគ្រោះត្រូវខ្មាន់កាំភ្លើងបាញ់ពីចម្ងាយ១គ្រាប់ចំកញ្ចឹងកពីក្រោយធ្លាយមកថ្ងាសខាងមុខ និង១គ្រាប់ទៀតគឺបាញ់ជិតចំសៀតផ្កាម្ខាងធ្លាយទៅម្ខាង ។
តាមប្រភពពីលោកវរសេនីយ៍ឯក សេង សុភក្តិ ស្នងការរង និងជាប្រធានការិយាល័យកណ្តាលនគរបាលយុត្តិធម៌បានឱ្យដឹងថា មុនពេលកើតហេតុ អ្នកស្រីលឹម នាង ជាជនរងគ្រោះនិងស្ត្រីបម្រើក្នុងផ្ទះឈ្មោះម៉េ អាន អាយុ៥១ឆ្នាំ និងកូនស្រីឈ្មោះបាន សំអាត អាយុ១១ឆ្នាំ កំពុងអង្គុយមើលទូរទស្សន៍ក្នុងឱសថស្ថានរបស់ខ្លួន ។ ពេលអ្នកទាំង៣កំពុងអង្គុយមើលទូរទស្សន៍នោះ ស្រាប់តែមានបុរសម្នាក់មាឌធំ រាងខ្ពស់ ពាក់មួកសុវត្ថិភាពពណ៌ខៀវឆ្នូតស ពាក់អាវយឺតធំ ស្ព័រ ពណ៌ទឹកប៊ិច ខោខ្មៅជើងវែង ស្បែកជើងឃ្លុបខ្មៅ បានដើរចូលមកក្នុងផ្ទះលក់ថ្នាំពេទ្យនេះ ។ តាមប្រភពថា ពេលនោះអ្នកស្រីលឹម នាង ក៏បានដើរមកកាន់ទូថ្នាំ ព្រោះតែយល់ថាបុរសរូបនេះមករកទិញថ្នាំពេទ្យ តែផ្ទុយទៅវិញជននេះបានដកកាំភ្លើងខ្លីពីចង្កេះដោយដៃឆ្វេងអត់និយាយអ្វីមួយម៉ាត់សោះ រួចភ្ជង់ចំក្បាលអ្នកស្រីលឹម នាង បាញ់ពីចំហៀងមួយគ្រាប់ បណ្តាលឱ្យដួលទៅលើកំរាលឥដ្ឋ ហើយបាញ់មួយគ្រាប់ទៀតចំក្បាលដែរ បណ្តាលឱ្យស្ត្រីរងគ្រោះស្លាប់ភ្លាមក្នុងថ្លុកឈាម ។ បន្ទាប់មកឃាតកររូបនេះដើរចេញទៅវិញ ដោយសៀតកាំភ្លើងលាក់ក្នុងចង្កេះឡើងជិះម៉ូតូដែលបញ្ឈរនៅចិញ្ចើមផ្លូវមុខផ្ទះចេញទៅបាត់ស្រមោលភ្លាមដែរ ។
លោកស្នងការរងបានបន្តថា សមត្ថកិច្ចយើងបានចុះទៅដល់កន្លែងកើតហេតុនោះ ជនល្មើសបានគេចខ្លួនបាត់ទៅហើយ ។ មានការវិភាគថា ឃាតករដែលបាញ់សម្លាប់នេះគឺមានចេតនាបាញ់ឱ្យស្លាប់ស្ត្រីម្ចាស់ឱសថស្ថាននេះតែម្តង គឺបាញ់ក្បាល១គ្រាប់ ហើយបាញ់ថែម១គ្រាប់ទៀត ដោយភាពមិនស្លន់ស្លោ ពេលខ្លួនផ្ទុះអាវុធ បង្កឱ្យមានការភ្ញាក់ផ្អើលនោះ ដែលអាចសន្និដ្ឋានថាជាមនុស្សជំនាញខាងបាញ់ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
