ខេត្តកំពត ៖ យុវសិស្ស២នាក់ បានជិះម៉ូតូសេ១២៥ ពណ៌ខ្មៅ ១គ្រឿង បោះពួយយ៉ាងលឿនបុករថយន្តម៉ាកកាមរីគូទស្វិត ពណ៌ប្រផេះ មួយគ្រឿង បណ្តាលឱ្យដួលសន្លប់ស្តូក កាលពីវេលាម៉ោង៧ព្រឹក ថ្ងៃទី៣១ កក្កដា នៅលើដងផ្លូវជាតិលេខ៣១ ត្រង់ចំណុចភូមិទូកមាស ឃុំទូកមាសខាងលិច ស្រុកបន្ទាយមាស ។
លោក មិន ញេប ជាមន្ត្រីនគរបាលទទួលបន្ទុកផ្នែកចរាចរណ៍ស្រុកបានឱ្យដឹងថា យុវសិស្សពីរនាក់បានជិះម៉ូតូសេ១២៥ ពណ៌ខ្មៅ ស៊េរី២០០៥ មួយគ្រឿងឌុបគ្នាតាមផ្លូវជាតិលេខ៣១ ក្នុងទិសដៅពីជើងទៅត្បូង ឆ្ពោះទៅវិទ្យាល័យទូកមាស បានបើកវ៉ារថយន្តមួយគ្រឿងនៅពីមុខក្នុងល្បឿនលឿន ហើយទៅបុករថយន្តកាមរីគូទស្វិតមួយគ្រឿង ដែលដឹកអ្នកជំងឺ ក្នុងទិសដៅបញ្ច្រាសគ្នា បណ្តាលឱ្យយុវសិស្សទាំងពីរនាក់រងរបួសធ្ងន់រហូតសន្លប់ ។ យុវសិស្សរងគ្រោះម្នាក់ឈ្មោះ ឌិន លីហួរ អាយុ១៨ឆ្នាំ នៅភូមិទូកមាស ឃុំទូកមាសខាងលិច ស្រុកបន្ទាយមាស និងម្នាក់ទៀតឈ្មោះ ឆេង សុភារ៉ា អាយុ១៩ឆ្នាំ នៅភូមិត្រពាំងមន្ត្រី ឃុំសំរោងក្រោម ស្រុកបន្ទាយមាស ។
ចំណែកអ្នកបើករថយន្តឈ្មោះ យិន ឆាយ៉ា អាយុ៣២ឆ្នាំ រស់នៅភូមិត្រពាំងធំ សង្កាត់ក្រាំងអំពិល ក្រុងកំពត បាននិយាយថា រថយន្តរបស់គាត់បានដឹកអ្នកជំងឺទៅព្យាបាលនៅមន្ទីរពេទ្យខេត្តតាកែវ តែនៅពេលកំពុងបើកប្រកាន់ស្តាំសុខៗស្រាប់តែយុវសិស្ស២នាក់ជិះម៉ូតូបោះពួយវ៉ារថយន្តមួយគ្រឿងហៀរចូលចំណែកផ្លូវមកបុកកាមរីរបស់គាត់ពេញទំហឹង បណ្តាលឱ្យយុវសិស្សទាំងពីរនាក់នោះដួលបោកសន្លប់ស្តូក ។
លោកមិន ញេប បានប្រាប់ថា យុវសិស្សវិទ្យាល័យទូកមាស ពិតជាបានបើកម៉ូតូទៅបុករថយន្តគេប្រាកដមែន រីឯលោក កៅ ជា មន្ត្រីនគរបាលចរាចរប្រចាំការបាននិយាយស្រដៀងគ្នានេះដែរថា ករណីនេះអាចបង្កមកពីកំហុសខាងយុវសិស្សខាងលើនោះ ព្រោះជិះម៉ូតូមិនបានប្រុងប្រយ័ត្ន ហៀរចូលចំណែកផ្លូវទៅបុករថយន្តគេទាំងកំរោល ។
ទោះជាបែបណា ម៉ូតូនិងរថយន្តត្រូវនគរបាលយកទៅរក្សាទុកនៅអធិការដ្ឋាននគរបាលស្រុក រង់ចាំដោះស្រាយជាក្រោយ រីឯអ្នករងរបួសត្រូវបានក្រុមគ្រួសារដឹកយកទៅព្យាបាលនៅគ្លីនិកឯកជន ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
