ខេត្តព្រៃវែង ៖ កាលពីថ្ងៃទី២៩ កក្កដា មានករណីចោរលួចកាបូបលុយក្នុងទូអ្នកលក់មាសអស់ចំនួន៣ កាបូបនៅក្នុងផ្សារក្រុងព្រៃវែង ។
តាមស្ត្រីឈ្មោះជា ពេញ អាយុ៤៣ឆ្នាំ នៅភូមិលេខ៥ សង្កាត់កំពង់លាវ ក្រុងព្រៃវែង បានឱ្យដឹងថា មុនពេលកើតហេតុនាវេលាម៉ោង៩ព្រឹក មានក្មេងប្រុសម្នាក់អាយុប្រហែល១៥ឆ្នាំ បានចូលមកទិញកាតទូរស័ព្ទចំនួន១ដុល្លារ ហើយក៏ចេញទៅវិញបាត់ទៅ ។ បន្ទាប់មកនៅម៉ោង៩និង៣០នាទីព្រឹក ក៏មានស្ត្រីម្នាក់មកទិញកាតទូរស័ព្ទចំនួន២សន្លឹក ហើយខណៈនោះក្មេងប្រុសដែលមកទិញកាតទូរស័ព្ទមុននេះ ក៏ចូលមកលួចកាបូបលុយដែលគាត់ដាក់នៅក្នុងទូ ។ ភ្លាមៗនោះគាត់បានស្រែកឱ្យអ្នកជិតខាងជួយចាប់ ចំណែកក្មេងប្រុសនេះពេលរត់ចេញពីទូមាសរបស់គាត់បានប្រហែល ២០ម៉ែត្រ ក៏ត្រូវប្រជាពលរដ្ឋ និងសមត្ថកិច្ចដែលល្បាតក្បែរនោះចាប់បាន ។
លោកវរសេនីយ៍ត្រី ចាន់ ណារិទ្ធ អធិការនគរបាលក្រុងព្រៃវែងឱ្យដឹងថា ក្មេងប្រុសម្នាក់នេះឈ្មោះហេង សម្បត្តិ ហៅរឿន មានទីលំនៅភូមិត្រាច សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ តាមការសួរចម្លើយក្មេងប្រុសនេះសារភាពថា ខ្លួនមានគ្នាចំនួន៣នាក់ ដែល២នាក់ទៀត គឺឈ្មោះធី អាយុប្រហែល២៥ឆ្នាំ នៅភូមិ-សង្កាត់ជាមួយគ្នា និងឈ្មោះរិទ្ធ អាយុ២២ឆ្នាំ នៅខេត្តកំពង់ចាម តែនៅពេលធ្វើសកម្មភាពឈ្មោះធី និងឈ្មោះរិទ្ធ បានគេចខ្លួនបាត់ ។
ជនឈ្មោះហេង សម្បត្តិ បានរៀបរាប់ថា ក្រុមរបស់ខ្លួនធ្លាប់ធ្វើសកម្មភាពចំនួន១៦លើកមកហើយ គឺនៅប៉ោយប៉ែត នៅខេត្តសៀមរាប និងចុងក្រោយនៅខេត្តព្រៃវែង ក៏ត្រូវសមត្ថកិច្ចចាប់ខ្លួនបាន ។ ក្មេងប្រុសដៃឆើតម្នាក់នេះ បានត្រូវសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ចាត់ការតាមច្បាប់ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]