រាជធានីភ្នំពេញ ៖ នាងស្វែង សុជាតា ដែលល្បីខាងសម្តែងជាតួកាចឆ្នាស បានបញ្ចេញភាពកាចឆ្នាសពិតក្រៅឆាកដោយទះកំផ្លៀងតារាសម្តែង ប្រុសម្នាក់ទាំងកំហឹង ។ តើហេតុការណ៍ដែលកើតឡើងកាលពីពេលថ្មីៗនេះមកពីហេតុអ្វី ក្នុងពិធីអ្វី ?
បុរសជាអ្នកដឹកនាំរឿងមួយរូបឱ្យដឹងថា រឿងហេតុកើតឡើងនៅពេលនាងស្វែង សុជាតា និងតារាប្រុសនោះចូលរួមសម្តែងក្នុងខ្សែភាពយន្តរឿង «សង្សារអាប» ជាមួយគ្នានៅទីតាំងមួយនៃរាជធានីភ្នំពេញ ។
ចំណែកតារាសម្តែងឆ្នើមខាងកាចឆ្នាសស្វែង សុជាតា បានទទួលស្គាល់ថារឿងនោះជាការពិត ហើយថាមកពីការនិយាយមួលបង្កាច់នាង ។ នាងនិយាយថា «វាជារឿងពិតព្រោះតារារូបនោះនៅក្មេងសោះចេះអេចអូចនិយាយ មួលបង្កាច់នាងខ្ញុំ ។ រឿងនេះនាងខ្ញុំគ្រាន់តែព្រមានខ្លះៗប៉ុណ្ណោះ កុំឱ្យឈ្លើយពេក ប្រុសអីចេះដឹងរឿងគេ ។ បើមិនរាងចាលទេ លើកក្រោយប្រហែលជា១០កំផ្លៀងក៏មិនដឹង» ។
ក្រោយហេតុការណ៍នោះកើតឡើងនាងស្វែង សុជាតា បញ្ជាក់ថា តារាដែលរងនឹងកម្លាំងបាតដៃនាងលើផ្ទៃមុខនោះ បានទូរស័ព្ទមកសូមទោសនាង តែនាងមិនអនុគ្រោះឱ្យទេ ព្រោះស្អប់គេជាមនុស្សប្រុសមានចរិតនិយាយដើមគេពីមួយទៅមួយ ។ សុជាតា និយាយថា «ជននោះនិយាយបំផ្លើសពីខ្ញុំគ្មានព្រំដែន» ។
អ្នកដឹកនាំរឿង «សង្សារអាប» ដដែលនិយាយថា ពេលទំនាស់រវាងនាងស្វែង សុជាតា និងតារាប្រុសដែលសម្តែងជាតួរាយរងនោះកើតឡើង លោកមិនបានឃើញផ្ទាល់ភ្នែកទេ តែឮតារាប្រុសនោះនិយាយ។ តាមលោកដឹងនាងស្វែង សុជាតា ទះកំផ្លៀងតារាប្រុសនោះពីរ-បីដៃ ធ្វើឱ្យគេរត់ចោលឆាកជាច្រើនម៉ោងទើបត្រឡប់ទៅថតវិញ។
ប្រភពដដែលបញ្ជាក់ថា តារាប្រុសវ័យក្មេងនោះ មាត់អេចអូចណាស់ តារារួមអាជីពណាក៏ដឹងដែរ ។ គេមិនត្រឹមតែនិយាយបំផ្លើសនាងស្វែង សុជាតា ទេ គឺចូលចិត្តនិយាយដើមតារាជាច្រើននាក់ទៀត ។នាងស្វែង សុជាតា ជោគជ័យក្នុងអាជីព តែបរាជ័យរឿងស្នេហា ដោយបែកបាក់ពីស្វាមីខណៈនាងមានកូនពីរនាក់ទៅហើយ ។ ទំនងដោយសាររឿងនេះហើយទើបនាងចាត់ទុកខ្លួនឯងជា «តារាអាប់រស្មី» ដោយនាងបញ្ចេញវាចាក្នុងទំព័រហ្វេសប៊ុករបស់ខ្លួនថា «ខ្ញុំបានចូលប្រឡូកក្នុងវិស័យសិល្បៈអស់រយៈពេល១២ឆ្នាំហើយ ។
ថ្វីដ្បិតតែខ្ញុំជាសិល្បការិនីម្នាក់ដែល ទទួលជោគជ័យផ្នែកសម្តែង ព្រោះតែមានទស្សនិកជនគាំទ្រខ្ញុំ ទើបខ្ញុំមានកម្លាំងចិត្តបង្ហាញនូវទេពកោសល្យរបស់ខ្ញុំដោយគ្មាន ការនឿយហត់ ទោះបីភ្លៀងផ្គរ អត់ងងុយថតទល់ភ្លឺ ឬក៏ត្រូវចុះភក់ ដេកផ្ទាល់ដីក៏ខ្ញុំឥតប្រកែក ឬក៏ខ្ពើមរអើម ព្រោះខ្ញុំពេញចិត្តនឹងបម្រើចំពោះវិស័យនេះ ជាពិសេសទស្សនិកជនរបស់ខ្ញុំ ។ ខ្ញុំមានមោទនភាពណាស់នៅពេលដែលខ្ញុំដើរទៅមានប្រជាពលរដ្ឋ ស្គាល់ខ្ញុំថាជាអ្នកណា ។ អ្វីដែលខ្ញុំសប្បាយចិត្តបំផុតគឺមានទស្សនិកជនសុំថើបខ្ញុំ ។ ជីវិតថតជាខ្សែភាពយន្តរបស់ខ្ញុំបាន៧៨រឿងមកហើយ ប៉ុន្តែការសម្តែងរបស់ខ្ញុំទោះបីជាល្អឥតខ្ចោះគ្រប់តួអង្គ មិនថាស្លូត កាច ឬយ៉ាងណា ភាគច្រើនអ្នកដឹកនាំតំរូវឱ្យខ្ញុំសម្តែងតែតួកាច ឬជាអ្នកមាន ជាមេឃុំ ជាមេដឹកនាំក្រុមហ៊ុនអ្វីមួយ ។
ជីវិតតួអង្គក្នុងខ្សែភាពយន្តវាពិតជាធ្វើ ឱ្យខ្ញុំមើលទៅអស្ចារ្យមានអ្វីៗទាំងអស់ និងមនុស្សម្នាក់អាត្មានិយមគួរឱ្យស្អប់ ប៉ុន្តែលោកអ្នកដឹងទេជីវិតតារាមួយដួងនេះ វាមិនដូចជាតារាដទៃទៀតទេ ដែលរះភ្លឺបង្អួតរាងគ្រប់ចក្ខុមហាជន ។ ខ្ញុំគ្រាន់តែជាតារាអាប់រស្មី» ។នាងស្វែង សុជាតា ចាប់អាជីពជាតារាសម្តែងតាំងពីឆ្នាំ២០០០មក ហើយលេចធ្លោដំបូងក្នុងរឿង «តេជោតំឌិន» ។ តាំងពីពេលនោះរហូតដល់បច្ចុប្បន្ន ខ្សែជីវិតនាងផ្សារភ្ជាប់វិស័យសិល្បៈភាពយន្តជានិច្ច» ។ការបែកបាក់ពីស្វាមី ធ្វើឱ្យបេះដូងមានរបួស គេនិយាយមួលបង្កាច់ធ្វើឱ្យមានកំហឹង តែបុរសម្នាក់ក្នុងបេះដូងពេលនេះទំនងជាឱសថព្យាបាលវិបត្តិ ជីវិតនាងស្វែង សុជាតា ឱ្យជាសះស្បើយ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
