រៀងរាល់ថ្ងៃសុក្រ ខ្មែរឡូត នឹងធ្វើការដកស្រង់ ព័ត៌មានសំខាន់ៗ មួយចំនួន ពីប្រភពសារព័ត៌មាននានា អំពីដំណើរវិវឌ្ឍន៍នយោបាយ នៅក្នុងប្រទេសកម្ពុជា យកមកចែករំលែក ជូនដល់ប្រិយមិត្តបានជ្រាប ជាដំណឹង។ នៅក្នុងសប្តាហ៍នេះ មានប្រធានបទ គួរឲ្យចាប់អារម្មណ៍ ដែលនឹងមានខ្លឹមសារត្រួសៗ ដូចខាងក្រោម៖
លោក ហ៊ុន សែន ថា លោក សម រង្ស៊ី កេងចំណេញលើក្រុមគ្រួសាររបស់លោក
នាយករដ្ឋមន្ត្រី ហ៊ុន សែន នៅព្រឹកថ្ងៃពុធនេះ ថ្លែងថា លោក សម រង្ស៊ី មិនត្រឹមតែចង់កេងចំណេញនយោបាយលើរូបគាត់នោះទេ ថែមទាំងចង់កេងចំណេញទៅលើក្រុមគ្រួសាររបស់លោកថែមទៀតផង។ លោកមានប្រសាសន៍ថា៖ “កូនគាត់វិលមកស្រុកខ្មែរវៃ(ផ្ញើសារ)មកសួរខ្ញុំថា កូនគាត់(លោក សម រង្ស៊ី)មកថ្ងៃនេះ ម៉ោងនេះ តែសម្តេចគិតយ៉ាងម៉េច។ ខ្ញុំក៏ផ្ញើសារទៅគាត់វិញថា តើអាចឲ្យខ្ញុំអញ្ជើញបាយមួយពេលដើម្បីជួបជុំបានទេ? ថាស្រេចតែសម្តេច ដល់ពេលចុងក្រោយថាមានកូនប្រសាមួយទៀត ខ្ញុំថាចូលទាំងអស់មក។ ស្រាប់តែគាត់ទៅសម្ភាសន៍ជាមួយហ្វីកាដូ សូម្បីទំនាក់ទំនងគ្រួសារយើងទាំងពីរក៏គាត់យកប្រៀបដែរ។ ខ្ញុំមិនបានថា អ្នកណាចង់ជួបអ្នកណាទេ ក៏ប៉ុន្តែយើងបានបង្កលក្ខណៈ បើធ្វើយ៉ាងដូច្នេះ សូម្បីតែបញ្ហាទំនាក់ទំនងគ្រួសារបស់យើងទាំងពីរក៏យកប្រៀបខាងនយោបាយចំពោះខ្ញុំដែរ ។ តើខ្ញុំអត់ទ្រាំបានទេ ខ្ញុំឲ្យអ្នកេងចំណេញលើគោកបានទេ សង្ឃឹមថាលោកជំទាវប្រដៅប្តីផង នែរឿងហ្នឹង ខ្ញុំតក់ស្លុតណាស់ ហើយខ្ញុំអត់ឲ្យប្រពន្ធខ្ញុំមើលទេ”។ ប្រភព៖ VOD
លោក ហ៊ុន សែន សង្ឃឹមថាឯកអគ្គរដ្ឋទូតថ្មីអាមេរិក នឹងយល់ពីកម្ពុជា ច្រើនជាងលោក William Todd
លោកនាយករដ្ឋមន្រ្តី ហ៊ុន សែន បានថ្លែងថាលោកសង្ឃឹមថាឯកអគ្គរដ្ឋទូតថ្មីរបស់អាមេរិកលោក William Heidt នឹងយល់ដឹងពីកម្ពុជាឲ្យបានច្រើនជាងលោក William Toddដែលទើបតែបញ្ចប់បេសកកម្មរបស់លោកកាលពីកន្លងទៅ។ លោកបានថ្លែងថា៖ ”ខ្ញុំបានប្រាប់គាត់(លោក William Todd)ថាបើខ្ញុំមិនស្គាល់ការផ្លាស់ប្តូរនិងមិនអាចគ្រប់គ្រងបាននូវដំណើរការនៃការផ្លាស់ប្តូរ តើខ្ញុំអាចអង្គុយធ្វើជានាយករដ្ឋមន្រ្តីជាង៣០ឆ្នាំបានទេ”។ លោកបន្តថាក្រោមការដឹកនាំរបស់លោក លោកបានផ្លាស់ប្តូរជាបន្តបន្ទាប់ទៅលើផ្នែកសេដ្ឋកិច្ចនិងគោលនយោបាយនានា។ លោកលើកឡើងថាលោកសង្ឃឹមថាឯកអគ្គរដ្ឋទូតថ្មីរបស់អាមេរិកនឹងប្រសើរជាងឯកអគ្គរដ្ឋទូតចាស់។ លោកបញ្ជាក់ថា៖ ”…តើការផ្លាស់ប្តូរមានត្រឹមតែដូរមេដឹកនាំឬអ្វី ដែលគេហៅថាបដិវត្តន៍ពណ៌។ ខ្ញុំមិនមែនប្រដៅអគ្គរដ្ឋទូតអាមេរិកទេ ក៏ប៉ុន្តែខ្ញុំចង់ទាញអារម្មណ៍របស់គាត់ថាសូមយល់ដឹងពីកម្ពុជាឲ្យបានច្បាស់ជាងនេះ ហើយប្រហែលជាឯកអគ្គរដ្ឋទូថ្មីរបស់អាមេរិកអាចនឹងមានការយល់ដឹងជាងឯកអគ្គរដ្ឋទូតដែលទើបនឹងផ្លាស់ទៅ”។ ប្រភព៖ VOD
គ.ជ.ប នឹងធ្វើការចុះបោះឆ្នោតសាកល្បង តាមប្រព័ន្ធបច្ចេកវិទ្យាទំនើប នៅក្នុងខែវិច្ឆិកា
គណៈកម្មាធិការជាតិរៀបចំការបោះឆ្នោត (គ.ជ.ប) ឲ្យដឹងថា ខ្លួនបានប្រជុំសម្រេចធ្វើការចុះឈ្មោះបោះឆ្នោតសាកល្បងតាមប្រព័ន្ធបច្ចេកវិទ្យាទំនើប ចាប់ពីថ្ងៃទី១ ដល់ថ្ងៃទី១៥ ខែវិច្ឆិកា ឆ្នាំ២០១៥នេះ។ សេចក្តីប្រកាសព័ត៌មានរបស់ គ.ជ.ប ចុះថ្ងៃទី២៦ ខែសីហាបានឱ្យដឹងថា គ.ជ.ប បានបើកកិច្ចប្រជុំ និងបានសម្រេចធ្វើការចុះឈ្មោះបោះឆ្នោតសាកល្បងពីថ្ងៃទី១ ដល់ថ្ងៃទី១៥ ខែវិច្ឆិកា នៅក្នុងរាជធានីខេត្តទាំង២៥។ សេចក្ដីប្រកាសបន្តថា គ.ជ.ប សម្រេចយកឃុំ/សង្កាត់មួយនៅក្នុងរាជធានីខេត្តនីមួយៗសម្រាប់ធ្វើជាកន្លែងចុះឈ្មោះសាកល្បងនេះ។ សេចក្ដីប្រកាសបន្តទៀតថា នៅក្នុងកិច្ចប្រជុំដដែលនោះ គ.ជ.ប ក៏បានសម្រេចឆ្លើយតបជាលិខិតទៅអង្កការ JICA ដោយទទួលយកអ្នកជំនាញការជប៉ុនមួយរូបគឺលោក គេន អ៊ីននូអេ ( Mr Ken INOUE) ផ្នែកកែទម្រង់ការបោះឆ្នោត ឲ្យចូលធ្វើការនៅទីស្តីការ គ.ជ.ប ចាប់ពីថ្ងៃទី០១ ខែកញ្ញតទៅ។ ប្រភព៖ VOD
តំណាងរាស្ត្របក្សប្រឆាំង អះអាងថារកឃើញផែនទី បោន ខ្នាត ១/១០០.០០០ នៅអាមេរិក
តំណាងរាស្ត្រគណបក្សសង្គ្រោះជាតិ ដែលកំពុងស្វែងរកការពិតនៃផែនទីប្រទេសកម្ពុជា អះអាងថា លោកបានរកឃើញផែនទីរបស់កម្ពុជា ជាប្រភេទផែនទីបោន (Bonnes) ខ្នាត ១/១០០.០០០ ក្នុងរដ្ឋធានីវ៉ាស៊ីនតោន (Washington) សហរដ្ឋអាមេរិក។ លោកបញ្ជាក់ថា ផែនទីនេះអាចជាផែនទីដែលសម្តេចព្រះនរោត្តម សីហនុ យកទៅឲ្យសហរដ្ឋអាមេរិក ទទួលស្គាល់ខ្សែបន្ទាត់ព្រំដែនរវាងកម្ពុជា និងវៀតណាម។ លោក អ៊ុំ សំអាន៖ «ផែនទីដែលខ្ញុំបានពីបណ្ណាល័យសហរដ្ឋអាមេរិក ហើយនិងផែនទីរបស់រដ្ឋាភិបាលខុសគ្នាត្រង់ថា ផែនទីដែលខ្ញុំទទួលបានពីបណ្ណាល័យសភារបស់អាមេរិក គឺអត់មានត្រាវៀតណាម អាត់មានការចុះហត្ថលេខារបស់លោក ឌិត មន្ទី និង លីវ វ៉ាន់ឡឺយ ដូចផែនទីរបស់រដ្ឋាភិបាលដែលមានទេ។ អ៊ីចឹងផែនទីដែលរដ្ឋាភិបាលមានហ្នឹង គឺជាផែនទីដែលអមជាមួយសន្ធិសញ្ញាឆ្នាំ១៩៨៥ មាន ២៦ផ្ទាំង»។ ប្រភព៖ RFA
លោក ហោ ណាំហុង ព្រមានថា អ្នករិះគន់រឿងផែនទី នឹងភ្លឺភ្នែកនៅពេលឆាប់ៗនេះ
លោក ហោ ណាំហុង ព្រមានក្រុមអ្នករិះគន់រឿងផែនទីថា ពួកគេនឹងភ្លឺភ្នែកនៅពេលបន្តិចទៀតនេះ ព្រោះរដ្ឋាភិបាលបារាំង នឹងឆ្លើយតបមករដ្ឋាភិបាលកម្ពុជា ជាផ្លូវការថា ឲ្យកម្ពុជា ខ្ចីផែនទីដែលរក្សាទុកនៅប្រទេសបារាំង។ រដ្ឋមន្ត្រីក្រសួងការបរទេស លោក ហោ ណាំហុង មានប្រសាសន៍ថា អាយ៉ៃឆ្លើយឆ្លងតាមប្រព័ន្ធសារព័ត៌មានរបស់ក្រុមអ្នករិះគន់រឿងផែនទី នឹងត្រូវបញ្ចប់នៅពេលរដ្ឋាភិបាលបារាំង ឆ្លើយតបមករដ្ឋាភិបាលកម្ពុជា នៅរយៈពេលប៉ុន្មានថ្ងៃខាងមុខ។ ជាងនេះទៅទៀត លោក ហោ ណាំហុង ផ្ដាំទៅអ្នកនយោបាយផ្សេងទៀតឲ្យឈប់យកបញ្ហាផែនទីមកកេងចំណេញនយោបាយ៖ «អស់លោកនឹងភ្លឺភ្នែកអំពីអ្វីដែលខ្លួននិយាយកន្លងមក ហើយខ្ញុំសង្ឃឹមនៅពេលភ្លឺភ្នែកហើយនោះ ឈប់យកបញ្ហាព្រំដែនកម្ពុជា-វៀតណាម មកកេងចំណេញរឿងនយោបាយ។ បើនៅមិនភ្លឺភ្នែក ខ្ញុំមិនដឹងធ្វើអីទេ ស្រេចតែរដ្ឋាភិបាលចាត់ចែងទៅ»។ ប្រភព៖ RFA
លោក ហ៊ុន សែន ថា CNRP ប្រមូលថវិកាបង្កើត ទូរទស្សន៍ ដើម្បីផ្គត់ផ្គង់ចម្ការម្រេច
ពីពិធីប្រកាសផ្សព្វផ្សាយនិងដាក់ឲ្យអនុវត្តគោលនយោបាយអភិវឌ្ឍវិស័យឧស្សាហកម្មកម្ពុជាឆ្នាំ២០១៥-២០២៥ នាព្រឹកថ្ងៃពុធនេះ នៅវិមានសន្ដិភាព លោកនាយករដ្ឋមន្ត្រី ហ៊ុន សែន បានរិះគន់ដំណើរការ ប្រមូលថវិកាសម្រាប់បង្កើតទូរទស្សន៍របស់គណបក្សសង្គ្រោះជាតិថា ការប្រមូលថវិកានោះ គឺដើម្បីយកទៅផ្គត់ផ្គង់ចម្ការម្រេច និងទុកចំណាយលើថ្លៃយន្ដហោះ ធ្វើដំណើរទៅក្រៅប្រទេសប៉ុណ្ណោះ។ ឆ្លើយតបនឹងការរិះគន់របស់លោក ហ៊ុន សែន នេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថា ថវិកាមូលនិធិបង្កើតទូរទស្សន៍របស់គណបក្សសង្គ្រោះជាតិ មិនដែលបាត់បង់នោះទេ សូម្បីតែមួយកាក់ ឬមួយសេន។ លោកថា ថវិកាដែលប្រមូលបាននោះ គឺគណបក្សមានហឹបសម្រាប់ទុកដាក់ថវិកា និងមានឯកសារច្បាស់លាស់សម្រាប់បញ្ជាក់ពីចំនួនទឹកប្រាក់ដែលប្រមូលបាន។ ប្រភព៖ ថ្មីៗ
គណបក្សនយោបាយថ្មីបង្កើតច្រើនធ្វើអោយ CPP សប្បាយផង និងភ័យផង…
ការបោះឆ្នោតឃុំសង្កាត់ឆ្នាំ២០១៧ និងការបោះឆ្នោតជាតិឆ្នាំ២០១៨ខាងមុខមិនទាន់មកដល់មែន។ ប៉ុន្តែ គណបក្សនយោបាយជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ បានចាប់ផ្តើមធ្វើសកម្មភាពនយោបាយរបស់ខ្លួនយ៉ាងសស្រាក់សស្រាំរួចទៅហើយ ផ្ទុយពីអាណត្តិមុនៗដែលបក្សនយោបាយចាប់ផ្តើមរកសំឡេងឆ្នោតតែក្នុងអំឡុងពេល៦ខែមុនការបោះឆ្នោតប៉ុណ្ណោះ។ មិនត្រឹមតែប៉ុណ្ណោះ គណបក្សបង្កើតថ្មីក៏មានច្រើនដែរ។ គណបក្សថ្មីទាំងនោះ ជារួមមាន៖ គណបក្សប្រជាធិបតេយ្យមូលដ្ឋានរបស់លោក យ៉ង សាំងកុមារ នាយកអង្គការសេដាក់, គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ, គណបក្សខ្មែរសាមគ្គី របស់លោកអ្នកស្រី ឡាក់ សុភាព, គណបក្សអំណាចពលរដ្ឋខ្មែរ របស់លោក សួន សេរីរដ្ឋា, និងអាចមានគណបក្សតូចផ្សេងៗទៀត។ ប្រភព៖ ថ្មីៗ
រៀបចំដោយ ខ្មែរឡូត
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
