ខេត្តកំពង់ឆ្នាំង ៖ សមត្ថកិច្ចក្រុងកំពង់ឆ្នាំង បានសហការជាមួយ នគរបាលព្រហ្មទណ្ឌ កំរិតស្រាលនៃស្នងការដ្ឋាន នគរបាលខេត្ត នៅវេលាម៉ោង១០ និង៣០នាទីព្រឹក ថ្ងៃទី២៧ សីហា ២០១៥ ចុះធ្វើការឆែកឆេរផ្ទះបណ្តែតទឹកជនសង្ស័យជាចោរលួចម្នាក់ ដែលបានរត់គេចខ្លួនជាមួយប្រពន្ធ កូន រួមនិងបក្សពួក៤នាក់ទៀត ក្រោយពីដឹងខ្លួនថា សមត្ថកិច្ចចុះទៅចាប់ ។
ប្រតិបត្តិការនេះបានធ្វើឡើងនៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ។
លោក ម៉ា យន់ នាយនគរបាល ព្រហ្មទណ្ឌក្រុងកំពង់ឆ្នាំង បានរៀបរាប់ពីដំណើររឿង ដែលនាំឱ្យមានការឆែកឆេរ ផ្ទះជនសង្ស័យឈ្មោះ ង្វៀង យ៉ាំងភឿក អាយុ៤២ឆ្នាំ មានប្រពន្ធឈ្មោះ ង្វៀង ធីឌៀប ជាមុខសញ្ញាចោរលួចយ៉ាងសកម្ម និងធ្លាប់ជាប់ពន្ធនាគារច្រើនដងថា នៅព្រឹកនោះមានបុរសឈ្មោះ ហុង រ៉ាម៉ន អាយុ២៥ឆ្នាំ មានទីលំនៅភូមិថ្នល់តាសែង ឃុំស្វាយជ្រុំ ស្រុករលាប្អៀរ និងប្រជាពលរដ្ឋ៣នាក់ទៀត បានមកតាមរកកាណូតបាឡាស្មាច់១គ្រឿង និងម៉ាស៊ីនកាណូត៥គ្រឿង ដែលពួកគាត់បានបាត់កាលពីយប់ថ្ងៃទី២៦ សីហា ហើយក៏បានប្រទះឃើញកាណូតរបស់ខ្លួនពីចម្ងាយ តែមិនហ៊ានចូលទេ និងបានឃើញឈ្មោះ ង្វៀង យ៉ាំងភឿក និងប្រពន្ធ រួមនិងបក្សពួក៤នាក់កំពុងធ្វើសកម្មភាពដោះជើងម៉ាស៊ីនកាណូត។
ពេលនោះប្រជាពលរដ្ឋ បានរាយការណ៍ប្រាប់សមត្ថកិច្ចនគរបាល បន្ទាប់មកសមត្ថកិច្ចក្រុង និងខេត្ត បាននាំគ្នាទៅផ្ទះជនសង្ស័យខាងលើ ប៉ុន្តែដោយសារស្ថានភាព ផ្ទះជនសង្ស័យជាផ្ទះ បណ្តែតទឹកដាច់តែឯង ហើយសមត្ថកិច្ចជិះកាណូតទៅទម្រាំតែដល់ ត្រូវក្រុមជនសង្ស័យទាំងនោះមានគា្នសរុបប្រមាណ៦នាក់ដឹងខ្លួនមុនបាននាំគ្នាជិះកាណូត បាឡាស្មាច់៣គ្រឿងរត់គេចខ្លួនអស់ នៅសល់តែផ្ទះ និងសម្ភារជាភស្តុតាងជាច្រើន ត្រូវបានសមត្ថកិច្ចប្រមូលយកមកកាន់ស្នងការដ្ឋាននគរបាលខេត្ត ។
អ្វីដែលចាប់អារម្មណ៍នោះ សមត្ថកិច្ចបានរកឃើញ នៅផ្ទះជនសង្ស័យជាមេចោរ មានគ្រាប់កាំភ្លើងអាកា47 ចំនួនដល់ទៅ៨៦គ្រាប់ និងបង់កាំភ្លើងចំនួន៤ ។ សមត្ថកិច្ចបានរឹបអូសវត្ថុតាង មានកាណូតបាឡាស្មាច់ប្រវែង៧ម៉ែត្រ១គ្រឿង ម៉ាស៊ីនកាណូត៤គ្រឿង ជើងម៉ាស៊ីនចំនួន៥ អាគុយ២ គ្រាប់កាំភ្លើង អាកា47ចំនួន៨៦គ្រាប់ បង់កាំភ្លើង៤ថង់ សម្រាប់ច្រកគ្រឿងញៀន និងប្រដាប់ប្រើប្រាស់គ្រឿងញៀនមួយចំនួនទៀត ។
សមត្ថកិច្ចបានបង្ហាញ រូបថតជនសង្ស័យរូបនោះ និងប្រពន្ធដែលកំពុងរត់គេចខ្លួន ឱ្យប្រជាពលរដ្ឋមើល បើឃើញជនសង្ស័យ ដូចរូបថតដែលបានដាក់បង្ហាញនេះ សូមប្រញាប់រាយការណ៍ ជូនសមត្ថកិច្ចដែលនៅជិត ដើម្បីមានវិធានចាប់ខ្លួន ចំណែកវត្ថុតាងខាងលើត្រូវ បានសមត្ថកិច្ចកសាងសុំណុំរឿង បញ្ជូនទៅតុលាការតាមនិតិវិធីច្បាប់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
