រៀងរាល់ថ្ងៃសុក្រ ខ្មែរឡូត នឹងធ្វើការដកស្រង់ ព័ត៌មានសំខាន់ៗ មួយចំនួន ពីប្រភពសារព័ត៌មាននានា អំពីដំណើរវិវឌ្ឍន៍នយោបាយ នៅក្នុងប្រទេសកម្ពុជា យកមកចែករំលែក ជូនដល់ប្រិយមិត្តបានជ្រាប ជាដំណឹង។ នៅក្នុងសប្តាហ៍នេះ មានប្រធានបទ គួរឲ្យចាប់អារម្មណ៍ ដែលនឹងមានខ្លឹមសារត្រួសៗ ដូចខាងក្រោម៖
ទីស្ដីការគណៈរដ្ឋមន្ត្រីប្រតិកម្មនឹងអ្នកនាំពាក្យឧត្តមស្នងការអង្គការសហប្រជាជាតិ
អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី ចេញសេចក្ដីបំភ្លឺប្រតិកម្ម ចំពោះអ្នកនាំពាក្យឧត្តមស្នងការអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស អ្នកស្រី រ៉ាវីណា ហ្សាំសាដានី (Ravina Shamsadani) ដែលអ្នកស្រីស្នើឲ្យក្រុមប្រឹក្សាធម្មនុញ្ញ ទម្លាក់ចោលសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល និងដំណើរការកាត់សេចក្ដីសកម្មជនគណបក្សសង្រ្គោះជាតិ ទាំង ១១នាក់ ថាតុលាការមិនឯករាជ្យ។ សេចក្ដីបំភ្លឺនេះអះអាងថា អ្នកស្រី រ៉ាវីណា ហ្សាំសាដានី បានចោទប្រកាន់គ្មានមូលដ្ឋាន និងកំពុងបំពានទាំងកំរោលលើគោលការណ៍នីតិរដ្ឋ និងបានបង្ហាញយ៉ាងច្បាស់ពីការមិនយល់រដ្ឋធម្មនុញ្ញរបស់កម្ពុជា ជាពិសេសបង្ហាញពីការជ្រៀតជ្រែកចូលយ៉ាងជ្រៅរំលោភលើនីតិវិធី ពីព្រោះរាល់ការអនុម័តច្បាប់របស់កម្ពុជា ត្រូវធ្វើឡើងដោយរដ្ឋសភា ព្រឹទ្ធសភា និងប្រកាសឲ្យប្រើដោយព្រះមហាក្សត្រ។ ប្រភព៖ RFA
លោកផ្កាយមាស៤ ជា តារា ថាកងទ័ពជាទ័ពរបស់គណបក្សប្រជាជនកម្ពុជា
មេទាហានផ្កាយមាស៤ នៃកងយោធពលខេមរភូមិន្ទម្នាក់ លើកឡើងថា ទាហាននៃកងយោធពលខេមរភូមិន្ទជារបស់គណបក្សប្រជាជនកម្ពុជា ព្រោះ លោក ហ៊ុន សែន ដែលជាប្រធានគណបក្សនេះជាអ្នកផ្គត់ផ្គង់ទាហាននាពេលបច្ចុប្បន្ន។ បញ្ហានេះ គណបក្សប្រឆាំង និងអ្នកវិភាគនយោបាយ ថាការលើកឡើងនេះ ខុសទៅនឹងរដ្ឋធម្មនុញ្ញ ដែលចែងពីកងកម្លាំងប្រដាប់អាវុធជាកងកម្លាំងរបស់រដ្ឋ មិនមែនជារបស់បក្សទេ និងទាមទារឲ្យមានការកែតម្រូវ។ អគ្គមេបញ្ជាការរងកងយោធពលខេមរភូមិន្ទ និងជាតំណាងគណៈមេបញ្ជាការឯកភាពសមរភូមិប្រាសាទព្រះវិហារ ផ្កាយមាស៤ លោក ជា តារា រំឭកទៅកងទ័ពថា កងទាហានទាំងអស់ជារបស់គណបក្សប្រជាជនកម្ពុជា និងជារបស់ប្រជាជន។ ថ្លែងនៅចំពោះមុខមន្ត្រីយោធា មន្ត្រីរដ្ឋាភិបាល និងវិស័យឯកជន មេទាហានផ្កាយមាស៤ ប្រចាំតំបន់ព្រះវិហារ នៅវិមានសន្តិភាព ថ្ងៃទី២៩ ខែកក្កដា លោក ជា តារា និយាយសម្ដីស្មោះត្រង់របស់ខ្លួនថា កងទ័ពត្រូវការចូលរួមការពារជាតិ និងការពារមិនឲ្យមានបដិវត្តន៍ពណ៌៖ «បើនិយាយឲ្យចំ កងទ័ព គឺជារបស់គណបក្សប្រជាជន ព្រោះសម្ដេចតេជោ ជាអ្នកចិញ្ចឹមបីបាច់ថែរក្សា ដឹកនាំបញ្ជាកងទ័ព»។ ប្រភព៖ RFA
លោក ហ៊ុន សែន ឆ្លើយតបសំណើសុំឲ្យប្ដឹង បញ្ហាព្រំដែនទៅ តុលាការអន្តរជាតិ
លោកនាយករដ្ឋមន្ត្រី ហ៊ុន សែន នៅថ្ងៃពុធ ទី២៩ ខែកក្កដា នេះ បានផ្ញើលិខិតជូនប្រធានរដ្ឋសភា ជាការឆ្លើយតបនឹងសំណើរបស់តំណាងរាស្ត្របក្សសង្គ្រោះជាតិ កន្លងមក ដែលស្នើសុំរដ្ឋាភិបាលលើកយកបញ្ហាជម្លោះព្រំដែនជាមួយប្រទេសវៀតណាម ប្ដឹងទៅតុលាការយុត្តិធម៌អន្តរជាតិ (ICJ)។ លិខិតចុះហត្ថលេខាកាលពីថ្ងៃ២៤ ខែកក្កដា របស់លោក ហ៊ុន សែន បញ្ជាក់ថា បញ្ហាព្រំដែនត្រូវបានគេយកមកធ្វើជាកម្មវត្ថុនៃអាជីវកម្មជាប់ជាប្រចាំ ក្នុងទិសដៅកេងចំណេញខាងផ្នែកនយោបាយសម្រាប់ក្រុម និងគណបក្សរបស់ពួកគេ។ លិខិតរបស់លោកនាយករដ្ឋមន្ត្រីឆ្លើយតបនឹងសំណើរបស់ក្រុមតំណាងរាស្ត្របក្សប្រឆាំងតាមរយៈលោក ហេង សំរិន ប្រធានរដ្ឋសភា ឲ្យដឹងថា រាជរដ្ឋាភិបាលមិនដែលព្រងើយកន្តើយម្ដងណាឡើយចំពោះរាល់បញ្ហាព្រំដែនដែលកើតមានឡើងតាមបណ្ដោយព្រំដែន។ រាជរដ្ឋាភិបាលបានធ្វើលិខិតផ្លូវការ និងបានចេញកំណត់ការទូតតវ៉ាទៅភាគីវៀតណាម ជាច្រើនលើក។ ប្រភព៖ RFA
លោក ហ៊ុន សែន ថា មិនចរចាជាមួយមេដឹកនាំCNRP រឿងឃុំខ្លួនសកម្មជន១១នាក់ឡើយ
លោកនាយករដ្ឋមន្ត្រី ហ៊ុន សែន បដិសេធថា លោកមិននិយាយជាមួយថ្នាក់ដឹកនាំគណបក្សសង្គ្រោះជាតិ ពីរឿងឃុំខ្លួនសកម្មជនទាំង១១នាក់ របស់គណបក្សនេះឡើយ។ លោក ហ៊ុន សែន បញ្ជាក់ថា រូបលោកគ្រាន់តែអាចផឹកទឹកតែនិងសួរសុខទុក្ខ ថ្នាក់ដឹកនាំគណបក្សសង្គ្រោះជាតិប៉ុណ្ណោះ តែបញ្ហាឃុំខ្លួនអ្នកទាំងនោះ ជាការសម្រេចរបស់តុលាការ មិនពាក់ព័ន្ធនឹងរូបលោកនោះទេ។ ប្រមុខរដ្ឋាភិបាលកម្ពុជា ក៏ជំរុញឲ្យគណបក្សសង្គ្រោះជាតិ ប្ដឹងទៅសាលាឧទ្ធរណ៍ដើម្បីដោះស្រាយបញ្ហាសកម្មជនខ្លួន ដែលជាវិធីល្អជាងជួបចចារជាមួយរូបលោក ។ ការលើកឡើងរបស់ លោក ហ៊ុន សែន បែបនេះ ធ្វើឡើងនៅក្នុងពិធីបុណ្យចម្រើនព្រះជន្ម ថ្វាយសម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយក នៅវត្តបទុមវត្តី រាជធានីភ្នំពេញ កាលពីថ្ងៃទី២៧ ខែកក្កដា ក្រោយពីលោក កឹម សុខា ប្រធានស្តីទីគណបក្សសង្គ្រោះជាតិ ថា លោកនឹងជំរុញឲ្យមានជំនួបរវាង លោក សម រង្ស៊ី និងលោក ហ៊ុនសែន ដើម្បីពិភាក្សាដោះលែង សកម្មជនទាំង១១នាក់ ។ ប្រភព៖ ថ្មីៗ
លោក ហ៊ុន សែន ព្រលះព្រះអង្គម្ចាស់រណឬទ្ធិរឿងទាញព្រះមហាក្សត្រចូលក្នុងសំណុំរឿងព្រំដែន
រឿងព្រះអង្គម្ចាស់ នរោត្តម រណឬទ្ធិទទួលបានព័ត៌មានពីអ្នកណាមួយថា ព្រះមហាក្សត្រមានគម្រោងកោះហៅមេបក្ស៣ មកជំនុំរឿងបញ្ហាព្រំដែននោះ មិនសូវសំខាន់ដូចព្រះអង្គម្ចាស់រណឬទ្ធិយករឿងនោះមកប្រាប់សារព័ត៌មានឡើយ។ ព័ត៌មានដែលផ្សាយថា ព្រះមហាក្សត្រគ្រោងអញ្ជើញមេបក្ស៣មកជួបនិយាយអំពីបញ្ហាព្រំដែន ដោយស្រង់បន្ទូលព្រះអង្គម្ចាស់ នរោត្តម រណឬទ្ធិ បានធ្វើឲ្យលោកនាយករដ្ឋមន្ត្រី ហ៊ុន សែន ខឹងយ៉ាងខ្លាំង ហើយបានផ្ញើសារតាមទូរសព្ទសួរឆ្លងឆ្លើយជាមួយព្រះអង្គម្ចាស់អំពីរឿងនេះទៀតផង។ លោក ហ៊ុន សែន បានស្តីបន្ទោសព្រះអង្គម្ចាស់ថា ព្រះអង្គម្ចាស់រណឬទ្ធិកំពុងព្យាយាមកេងចំណេញពីព្រះមហាក្សត្រ។ ប្រភព៖ ថ្មីៗ
កម្ពុជាត្រូវលុបចោល សន្ធិសញ្ញា សម័យវៀតណាម មានឥទ្ធិពលលើកម្ពុជា
ក្រុមអ្នកជំនាញការព្រំដែននិយាយថា រដ្ឋាភិបាលគួរលុបចោលសន្ធិសញ្ញាព្រំដែនមួយចំនួន ហើយដោះស្រាយតាមយន្តការសន្ធិសញ្ញាសន្តិភាពក្រុងប៉ារីស បើពុំដូច្នោះទេមិនអាចដោះស្រាយបញ្ហាព្រំដែនជាមួយវៀតណាមបានឡើយ។ នេះជាការអះអាងរបស់លោក ស៊ាន ប៉េងសែ ប្រធានគណៈកម្មការព្រំដែនកម្ពុជាក្នុងប្រទសបារាំង និង លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលចូលរួមក្នុងកម្មវិធី Hello VOA អំពីបញ្ហាព្រំដែន។ លោក វាគ្មិនទាំងពីរអះអាងដូច្នេះដោយបន្តថា វៀតណាមមិនទទួលស្គាល់ផែនទីណាផ្សេងក្រៅពីវៀតណាមបានធ្វើការបោះពុម្ភជាឯកតោភាគីទេ ហើយរដ្ឋាភិបាលខ្មែរក៏មិនព្រមប្តឹងទៅយន្តការអន្តរជាតិទៀត ដោយថ្លែងថា កំពុងបន្តចរចាទ្វេភាគី។ តែក្រុមវាគ្មិនថ្លែងថា សន្ធិសញ្ញាឆ្នាំ ១៩៨២ ១៩៨៣ ១៩៨៥ ពេលវៀតណាមមានឥទ្ធិពលលើកម្ពុជានិងសន្ធិសញ្ញាបំពេញបន្ថែមឆ្នាំ២០០៥ ជាសន្ធិសញ្ញាដែលកម្ពុជាបាត់បង់ទឹកដីកម្ពុជា។ លោកនាយករដ្ឋមន្រ្តី ហ៊ុន សែនបដិសេធមិនព្រមប្តឹងទៅតុលាការយុត្តិធម៌អន្តរជាតិដូចការចង់បានរបស់គណបក្សជំទាស់ទេ ដោយបន្តប្រើយន្តការទ្វេភាគីវិញ។ ប្រភព៖ VOA
គណបក្សសង្គ្រោះជាតិ និងសង្គមស៊ីវិល ដាក់ញត្តិទៅក្រុមប្រឹក្សាធម្មនុញ្ញ ប្រឆាំងច្បាប់អង្គការ
ក្រុមអ្នកតំណាងរាស្រ្តនៃគណបក្សសង្គ្រោះជាតិ នៅថ្ងៃព្រហស្បតិ៍នេះ បានដាក់ញ្ញត្តិទៅក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា ស្នើសុំឲ្យស្ថាប័ននីតិបញ្ញត្តិនេះពិនិត្យមើលធម្មនុញ្ញភាពនៃសេចក្តីព្រាងច្បាប់ដ៏ចម្រូងចម្រាស់ស្តីពីសមាគម និងអង្គការក្រៅរដ្ឋាភិបាលដែលរដ្ឋសភានិងព្រឹទ្ធសភាបានអនុម័តថ្មីៗនេះ។ «ខ្ញុំជឿជាក់ថា រដ្ឋាភិបាលលោកចូលចិត្តឲ្យធ្វើបែបហ្នឹងវិញ មិនចង់ឲ្យឃើញមានបាតុកម្ម មានកូដកម្មអី រំខានរាំងស្ទះដល់ចរាចរអីទេ។ ហើយបើខ្ញុំអនុវត្តទៅតាមនីតិវិធីមានសង្ឃឹមទេ មានការណ៍គេណែនាំខ្ញុំថា កុំសង្ឃឹម ពីព្រោះក្រុមប្រឹក្សាធម្មនុញ្ញហ្នឹងគឺថា ចាំតែធ្វើតាមអ្វីដែលគណបក្ស(កាន់កាប់)រាជរដ្ឋាភិបាលស្នើទេ។ ប៉ុន្តែខ្ញុំអត់...អត់ទាន់អស់សង្ឃឹមទេ។ ខ្ញុំជឿថា យោងលើឧត្តមគតិ យោងលើគោលការណ៍ ខ្ញុំថា សមាសភាពក្រុមប្រឹក្សាធម្មនុញ្ញនឹងខិតខំ ពិនិត្យសំណើរបស់ខ្ញុំពាក់ព័ន្ធនឹងអធម្មនុញ្ញភាពនៃច្បាប់ ដែលរដ្ឋាភិបាលបានផ្ញើរ ហើយសភា ព្រឹទ្ធសភាបានអនុម័តនោះ»។ ប្រភព៖ VOA
គណបក្សសង្គ្រោះជាតិ កំពុងស្វែងរកទិញដី ដើម្បីរៀបចំ ស្ថានីយទូរទស្សន៍ ព្រះអាទិត្យ
មន្ត្រីជាន់ខ្ពស់គណបក្សសង្គ្រោះជាតិឲ្យដឹងថា ក្រុមការងារបក្សនេះកំពុងតែស្វែងរក ទិញដីនៅជាយរាជធានីភ្នំពេញ ដើម្បីបង្កើតរៀបចំស្ថានីយ៍ទូរទស្សន៍ព្រះអាទិត្យ និង តម្លើងអង់តែន ។ អ្នកនាំពាក្យគណបក្សសង្គ្រោះជាតិ លោក យ៉ែម ប៉ុញ្ញាឬទ្ធិ បានប្រាប់វីអូឌី(VOD) នៅថ្ងៃសៅរ៍ម្សិលមិញថា ហូតមកដល់ពេលនេះថវិកាដែលទទួលបាន ពីកាវិភាគទានសរុបបានចំនួនជាង ៤០ម៉ឺនដុល្លារ។ លោក បញ្ជាក់ថា ក្រុមការងារយកលុយនោះស្វែងរកទិញដីសិន មុនទិញសម្ភារផ្សេងៗ ។ ទូរទស្សន៍ព្រះអាទិត្យនេះត្រូវកាថវិកាចំ៣ លានដុល្លារអាមេរិកដើម្បីអាចដំណើរការបាននៅ បំណាច់ឆ្នាំ ២០១៥នេះ ។ ប្រភព៖ VOD
លោកអ៊ុំ សំអានថា សុំការអត់ឱនពីប្រធានរដ្ឋសភា ដើម្បីបន្ធូរកម្តៅ នយោបាយ
តំណាងរាស្ត្រគណបក្សសង្គ្រោះជាតិមណ្ឌលសៀមរាប លើកឡើងថា ការដែលលោកសុំការអត់ឱនពីប្រធានរដ្ឋសភា គឺដើម្បីបន្ធូរភាពតានតឹងផ្នែកនយោបាយដែលកំពុងកើតមាន មិនមែនរូបលោកទទួលថាមានកំហុសទេ ។ កាលពីថ្ងៃទី២៤ ខែកក្កដានេះ លោក អ៊ុំ សំអាន តំណាងរាស្ត្រគណបក្សសង្គ្រោះជាតិមណ្ឌលសៀមរាប បានសរសេរលិខិត សុំការអត់ឱន ពីលោកហេង សំរិន ប្រធានរដ្ឋសភា ចំពោះពាក្យដែលលោកប្រើពាក្យថា លោក ហេង សំរិន មិនហ៊ានក្អកជាមួយវៀតណាម ។ ប៉ុន្តែលោកអ៊ុំ សំអាន ប្រាប់VODនៅល្ងាចថ្ងៃសៅរ៍ម្សិលមិញថា ការដែលលោកសរសេរលិខិតសុំការអត់ឱនពីប្រធានរដ្ឋសភានោះ មិនមែនមានន័យថា លោកទទួលស្គាល់ថា ខ្លួនមានកំហុសទេ គឺគ្រាន់តែចង់បន្ធូរភាពតានតឹងផ្នែកនយោបាយខ្លាចមានការចាប់ខ្លួន សកម្មជនបក្សប្រឆាំង ឬ មន្ត្រីសង្គមស៊ីវិលបន្តទៀត ។ កាលពីថ្ងៃទី២១ ខែកក្កដា សកម្មជនគណបក្សសង្គ្រោះជាតិ១១នាក់ ត្រូវតុលាការកាត់ទោសឲ្យជាប់ពន្ធនាគារពី៧ទៅ២០ឆ្នាំ ។ ប្រភព៖ VOD
រៀបចំដោយ ខ្មែរឡូត
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]