រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ កាលពីថ្ងៃទី២៣ កក្កដា បានធ្វើការស្រាវជ្រាវឃាត់ខ្លួនមុខសញ្ញាប្លន់ម៉ូតូស្គូពីម្នាក់ និងបានបញ្ជូនទៅកាន់សាលាដំបូងចាត់ការតាមផ្លូវច្បាប់ ។ ជនដែលត្រូវឃាត់ខ្លួននេះឈ្មោះសំ វណ្ណាកា ភេទប្រុស អាយុ១៧ឆ្នាំ ជាសិស្ស ស្នាក់នៅផ្ទះជួលម្តុំផ្សារឌុយម៉ិច សង្កាត់មនោរម្យ ខណ្ឌ៧មករា ។
លោកវរសេនីយ៍ទោ ជួន ណារិន្ទ ប្រធានការិយាល័យនគរបាលព្រហ្មទណ្ឌកម្រិតធ្ងន់ បានឱ្យដឹងថា កាលពីវេលាម៉ោង៤រសៀលថ្ងៃទី២០ កក្កដា មាននារីម្នាក់ឈ្មោះសុខ ចន្ទ្រា អាយុ២០ឆ្នាំ ជាសិស្ស ស្នាក់នៅផ្ទះលេខ១៣B ផ្លូវលេខ៤៣០ សង្កាត់ផ្សារដើមថ្កូវ ខណ្ឌចំការមន បានជិះម៉ូតូស្គូពី ពណ៌ស ស៊េរី២០១១ តែម្នាក់ឯងចេញពីផ្ទះបំណងទៅបើកលុយឱ្យម្តាយមីងនៅខណ្ឌទួលគោក ដោយជិះតាមបណ្តោយផ្លូវលេខ៤៣០ ។ លុះពេលជិះទៅជិតដល់មុខភោជនីយដ្ឋានច័ន្ទក្រហមក្នុងស្ថិត សង្កាត់ទំនប់ទឹក ខណ្ឌចំការមន ស្រាប់តែមានជន៣ទៅ៤នាក់ជិះម៉ូតូ២គ្រឿងបានកៀរម៉ូតូនាង ឱ្យឈប់ និងប្លន់យកម៉ូតូ។ ពេលនោះនាងបានអែបម៉ូតូទៅចិញ្ចើមផ្លូវដោយមិនហ៊ានតបតទេ និងប្រគល់ម៉ូតូឱ្យតាមសម្រួល ប៉ុន្តែបើទោះជានាងសុខចិត្តប្រគល់ឱ្យបែបនេះក្តី ក៏ក្រុមចោរនៅតែស្រែកសម្លុតគំរាម និងបម្រុងវាយដំនាងទៀតផង ។
លោកជួន ណារិន្ទ បន្តថា បន្ទាប់ពីកើតមានអំពើប្លន់នោះ កម្លាំងនៃការិយាល័យនគរបាលព្រហ្មទណ្ឌកម្រិតធ្ងន់បានធ្វើការ ស្រាវជ្រាវស៊ើបអង្កេតរហូតឈានដល់ឃាត់ខ្លួនជនសង្ស័យបានម្នាក់ ឈ្មោះសំ វណ្ណាកា នេះបញ្ជូនទៅកាន់សាលាដំបូងរាជធានី និងកំពុងស្វែងរកចាប់ខ្លួនបក្សពួកបន្តទៀត ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
