ខេត្តបន្ទាយមានជ័យ ៖ បុរសម្នាក់ត្រូវនគរបាលប៉ុស្តិ៍សង្កាត់ប៉ោយប៉ែត ហៅទៅសួរនាំ បន្ទាប់ពីជាប់ចោទបិទទ្វារវាយស្ត្រីម៉ាស្សាម្នាក់ ដោយសារខឹងសុំអីៗ... នាងមិនបាន ។ ហេតុការណ៍នេះបង្កការភ្ញាក់ផ្អើលយ៉ាងខ្លាំងកាលពីវេលាម៉ោងជិត៣រសៀល ថ្ងៃទី២៧ កក្កដា នៅហាងម៉ាស្សាមួយកន្លែង យីហោ៧៧៧៧៧ នៅភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ។
ជនជាប់ចោទឈ្មោះ សុផារ៉ា អាយុ៣៧ឆ្នាំ មុខរបរជាអ្នករត់ម៉ូតូឌុប មានទីលំនៅក្នុងភូមិព្រៃព្រិច សង្កាត់ប៉ោយប៉ែត ។ នៅកន្លែងកើតហេតុ គេឃើញមនុស្សម្នាជាច្រើនចោមរោមមើលហេតុការណ៍នោះ ។ ស្ត្រីម៉ាស្សាវ័យក្មេងសាច់សខ្ចីម្នាក់ឈ្មោះ សុខ វត្តី អាយុ២៣ឆ្នាំ បានឈរសម្រក់ទឹកភ្នែក ហើយអះអាងថា នាងត្រូវបុរសខាងលើវាយធ្វើបាប ដោយចាប់បោចសក់បោកផ្ទប់ទៅនឹងគ្រែ ហើយព្យាយាមឡើងជិះ ក្នុងបំណងមិនល្អ ។ ការវាយធ្វើបាបនេះ បន្ទាប់ពីបុរសនេះសុំស្នេហ៍នាង៤ទៅ៥ថ្ងៃមកហើយ តែនាងមិនព្រម ព្រោះនាងមានកូននិងប្តីរួចហើយ ។
ស្ត្រីសាច់សខ្ចី បន្តថា នាងទើបមកពីខេត្តពោធិ៍សាត់ ចូលធ្វើការហាងម៉ាស្សានេះ ទើបតែបាន៥ថ្ងៃ ដោយសារជម្លោះក្នុងគ្រួសារតិចតួច បានរត់ចេញពីផ្ទះ មកធ្វើការនៅទីនេះ ។ តែចៃដន្យ ថ្ងៃណាក៏ជួបតែបុរសខាងលើនេះចូលមកឱ្យនាងម៉ាស្សារហូត ។
នាងបន្តថា តាំងពីថ្ងៃនាងមកធ្វើការខាងម៉ាស្សានេះ បុរសរូបនេះព្យាយាមសុំស្នេហ៍ពីនាងជារៀងរាល់លើក តែនាងបានប្រាប់បុរសនោះរហូតថា នាងមិនអាចស្រឡាញ់បានទេ ព្រោះនាងមានកូនស្រីម្នាក់អាយុ១១ខែ និងមានប្តីទៅហើយ ជាមន្ត្រីរាជការនៅខេត្តពោធិ៍សាត់ ។
ស្ត្រីរងគ្រោះបន្តថា មុនកើតហេតុ ជននេះបានចូលមកឱ្យនាងម៉ាស្សាដូចសព្វមួយដង ប៉ុន្តែថ្ងៃនេះគេហាក់ស្រវឹងស្រាខ្លាំង ។ តែមិនទាន់ទាំងបានម៉ាស្សាផង បុរសនេះសុំសេចក្តីស្នេហាសុំអីៗ ពីនាងតែម្តង ។ នាងថា ពេលនាងបដិសេធ ជននេះក៏វាយធ្វើបាបលើរូបកាយគ្មានប្រណី ដូចខឹងនាងខ្លាំងណាស់ ។ នៅកន្លែងកើតហេតុ ក្រៅពីស្ត្រីរងគ្រោះ ស្ត្រីជាថៅកែហាងម៉ាស្សាម្នាក់ទៀត វ័យ៥៨ឆ្នាំ ឈ្មោះ សាន ឈុន ក៏រងរបួសដែរ ដោយត្រូវរបួសក្បាលជង្គង់ ខ្នង ប្រអប់ដៃខាងស្តាំ ហូរឈាម ដោយសារស្ត្រីជាថៅកែហាងរូបនេះ ចូលទៅជួយនារីរងគ្រោះ ក៏ត្រូវបុរសដៃដល់ គប់នឹងដុំថ្ម ។
បុរសរូបនេះ ក៏មានរបួសតិចតួចដែរ ដូចជារបួសមេជើងខាងឆ្វេង និងត្រគាក ហើយនិយាយទាំងស្រវឹងលែងដឹងខុសត្រូវ ហើយចោទថាខ្លួនត្រូវនារីឈ្មោះ សុខ វត្តី ច្រានឱ្យដួលពេលមានជម្លោះ ។ ទោះជាយ៉ាងណា ការលើកឡើងរបស់ជននេះ ត្រូវអ្នកស្រុកជាច្រើនដែលនៅក្បែរកន្លែងកើតហេតុ និយាយថាជារឿងមិនពិត ។ អ្នកស្រុកបានប្រាប់ថា ការពិត ជននេះបានជិះម៉ូតូដួលខ្លួនឯង នៅចំណុចផ្លូវចូលហាងម៉ាស្សា ទើបរងរបួសមេជើង និងចង្កេះបែបនេះ ។
ជុំវិញបញ្ហាខាងលើ លោក អុឹម សុភារៈ នាយប៉ុស្តិ៍រដ្ឋបាលសង្កាត់ប៉ោយប៉ែត ប្រាប់ថា លោកកំពុងសួរនាំភាគីទាំងសងខាង មិនទាន់អាចប្រាប់លម្អិតបានទេ ព្រោះមិនទាន់ទទួលព័ត៌មានសព្វជ្រុងជ្រោយនៅឡើយទេ ជុំវិញការប្រទូស្តរ៉ាយគ្នានេះ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
