ខេត្តស្វាយរៀង ៖ បុរសម្នាក់ដែលគេសង្ស័យថាកំរោលចូល បានយកពូថៅដេញកាប់កម្មករធ្វើការជាមួយគ្នាឱ្យរងរបួសធ្ងន់២ នាក់ ហើយជាច្រើននាក់ទៀតភ័យរត់ប្រាសអាយុដោយសារទប់ទល់ជាមួយជន ដៃដល់មិនបាន តែក្រោយមកក៏នាំគ្នាកាន់ដំបងចូលទៅព្រួតវាយវិញរហូតទ្រមខ្លួន ទើបចាប់បាន ។ ហេតុការណ៍មិននឹកស្មានដល់នេះ បានកើតឡើងកាលពីថ្ងៃទី២១ កក្កដា វេលាម៉ោង៩និង៣០នាទីព្រឹក នៅតំបន់សេដ្ឋកិច្ចពិសេសតៃសេង ស្ថិតក្នុងភូមិតាបិប សង្កាត់បាវិត ក្រុងបាវិត ។
លោកវរសេនីយ៍ត្រី កែវ គង់ អធិការនគរបាលក្រុងបាវិតឱ្យដឹងថា ជនដៃដល់ដែលគេសង្ស័យថាកំរោលចូលនេះ ឈ្មោះឈឿន ឆោម អាយុ៣៥ឆ្នាំ ជាកម្មករសំណង់ផ្នែកពុម្ព មានទីលំនៅភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្តាល តែបានមកធ្វើជាជាងចាក់ពុម្ពក្បាច់គ្រឿងសំណង់នៅតំបន់សេដ្ឋ កិច្ចពិសេសតៃសេង ក្រុងបាវិត ។ បើតាមប្រធានក្រុមកម្មករឱ្យដឹងថា កាលពីថ្ងៃទី២០ កក្កដា វេលាម៉ោង៥ល្ងាច ជនឈឿន ឆោម មានជំងឺក្តៅខ្លួនក៏មកសុំសម្រាកពីការងារ លុះព្រឹកថ្ងៃទី២១ កក្កដា មេក្រុមបានហៅឱ្យមកជួយធ្វើពុម្ព ពីព្រោះក្រុមហ៊ុនប្រញាប់យកគ្រឿងសំណង់សាងសង់អគារ ។ ស្រាប់តែវេលាម៉ោង៩និង៣០នាទីព្រឹក ជននេះបានទាញពូថៅកាប់កម្មករឈ្មោះ ង្វៀន វ៉ាន់ស៊ី អាយុ៤៣ឆ្នាំ ជាជនជាតិវៀតណាម ជាជាងសំណង់ និងបុគ្គលិករោងចក្រតំបន់សេដ្ឋកិច្ចពិសេសតៃសេង។ កម្មកររូបនេះត្រូវកាប់ចំបីកន្លែង គឺចំគល់កផ្នែកខាងស្តាំចំក្បាលពីក្រោយក្បែរគុម្ពត្រចៀកខាង ឆ្វេង និងគុម្ពត្រចៀកខាងស្តាំ មុតផុងលលាដ៍សន្លប់ក្នុងថ្លុកឈាម ។
រីឯកម្មករម្នាក់ទៀតឈ្មោះ ណែម គង្គារដ្ឋា អាយុ២៨ឆ្នាំ ជាកម្មករសំណង់ផ្នែកពុម្ពដូចគ្នា មានទីលំនៅផ្ទះលេខ២៤E3 សង្កាត់អូរឫស្សីទី១ ខណ្ឌ៧មករា រាជធានីភ្នំពេញ រត់ដួលអុកជង្គង់ទៅលើថ្ម ដាច់ជង្គង់ទាំងសងខាងរបួសធ្ងន់ ។ រីឯកម្មករជាច្រើននាក់ទៀត ក៏ត្រូវជននេះចូលដេញកាប់ផ្អើលរត់ប្រសេចប្រសាចពេញបរិវេណរោង ចក្រ ខ្លះដួលរលាត់ដៃជើង រលាត់កួយដៃ ទាំងភ្នែកនៅកញ្ចឹងក ខ្លះទូរស័ព្ទទៅប្តឹងប៉ូលិសឱ្យជួយធ្វើអន្តរាគមន៍។
លោកអធិការបន្តទៀតថា គ្រាន់តែទទួលពាក្យបណ្តឹងតាមទូរស័ព្ទភ្លាម លោកក៏បានចាត់កម្លាំងឱ្យទៅកាន់កន្លែងកើតហេតុភ្លាមដែរ ពេលទៅដល់ឃើញពួកកម្មករបានតដៃដោយនាំគ្នាយកព្រនង់វាយទៅលើ ជននេះវិញជាច្រើនព្រនង់ តែជននេះនៅតែខ្លាំងពេលឃើញប៉ូលិសក៏ដេញកាប់ដោយពុំមានញញើតដៃ ទេ និងបានវាយកញ្ចក់រថយន្តប៉ូលិសខាងស្តាំបែកខ្ទេច ។ រីឯក្រុមកម្មករបានព្រួតវាយវិញរហូតទ្រមខ្លួនទើបសមត្ថកិច្ចឃាត់ ហើយចាប់ជននេះដាក់លើរថយន្តបញ្ជូនទៅអធិការដ្ឋានក្រុង រួចកសាងសំណុំរឿងបញ្ជូនមកការិយាល័យព្រហ្មទណ្ឌកម្រិតស្រាលចាត់ ការបន្ត ។
ជនរងគ្រោះឈ្មោះ ង្វៀង វ៉ាន់ស៊ី ត្រូវបានសាច់ញាតិបញ្ជូនទៅមន្ទីរពេទ្យឯប្រទេសវៀតណាមដើម្បី សង្គ្រោះ តែមិនដឹងថាលទ្ធផលយ៉ាងណាទេ ។ រីឯជនឈ្មោះ ឈឿន ឆោម បានឆ្លើយប្រាប់ប៉ូលិសនៅពេលមកដល់ការិយាល័យព្រហ្មទណ្ឌកម្រិត ស្រាលខេត្តថា គេក្តៅខ្លួនខ្លាំងកាលពីល្ងាច លុះព្រឹកឡើងទៅដល់កន្លែងធ្វើការបាន២ម៉ោងស្រាប់តែមើលទៅពួក កម្មករធ្វើការជាមួយគ្នា មុខខ្មៅអាក្រក់មករកកាប់ខ្លួន និងមើលទៅពួកគេដូចជាសត្រូវទើបគេភ័យដេញកាប់តែម្តង ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]