ក្រុងប៉ោយប៉ែត ៖ ក្មេងប្រុសម្នាក់បានស្លាប់ និងម្នាក់់់់់ទៀតរងរបួស ដោយសារឪម៉ាល់ទិច កាលពីវេលាម៉ោងជិត៤រសៀលថ្ងៃទី២១ កក្កដានៅភូមិបាលិលេយ្យ២ សង្កាត់ប៉ោយប៉ែត ខណៈពេលក្មេងទាំង២នាក់ចូលទៅរើសខ្លែងហើយ ប៉ះចំសម្បុកឪម៉ាល់ ។ ក្មេងប្រុសដែលស្លាប់ឈ្មោះរ៉ា ថេត អាយុ៩ឆ្នាំ ឯក្មេងប្រុសដែលរងរបួសឈ្មោះរដ្ឋ រី អាយុ១៤ឆ្នាំ ពួកគេទាំង២នាក់រស់នៅក្នុងភូមិខាងលើ ។
តាមសាក្សីនៅកន្លែងកើតហេតុនិយាយថាកុមារ ទាំង២នាក់នេះបានឃើញខ្លែងមួយធ្លាក់ទើរលើដើមក្រខុបក្នុង បរិវេណដីទំនេររបស់អ្នកស្រុកមួយគ្រួសារដែលគ្មានមនុស្សរស់នៅ ។ កុមារទាំង២នាក់ បាននាំគ្នាឡើងតាមរបងចូលទៅក្នុងដីនោះដើម្បីដណ្តើមគ្នាយកខ្លែង ហើយមានក្មេងឯទៀតទះដៃអបអរបន្ទរចំពោះ នរណាយកខ្លែងបានមុន ។ លុះពេលទៅដល់ចំណុចខ្លែងដាច់ទើរលើដើមក្រខុបនោះឈ្មោះរដ្ឋ រី ដែលដល់គោលដៅមុន ក៏ត្រូវសត្វឪម៉ាល់មួយសម្បុកនៅទីនោះទិចចំលើត្រចៀកខាងឆ្វេង ហើយរត់យ៉ាងលឿនត្រឡប់ក្រោយវិញ។ ចំណែកឯកុមារឈ្មោះរ៉ា ថេត ក៏ត្រូវឪម៉ាល់រោមទិចរាប់សិបទ្រនិច ស្រែកឱ្យគេជួយ ធ្វើឱ្យក្មេងៗផ្សេងទៀតដែលឃើញហេតុការណ៍ពីចម្ងាយអត់មានអ្នក ណាហ៊ានចូលជួយទេ នាំគ្នារត់ចូលពួនតាមផ្ទះអស់ ។
ស្ត្រីឈ្មោះខុម សុខា អាយុ៣១ឆ្នាំ ដែលមានផ្ទៃពោះ៧ខែផង និយាយថា កុមារាឈ្មោះរ៉ា ថេត ត្រូវសត្វឪម៉ាល់តាមទិចដោយរោមខ្មៅរលពេញក្បាល ដងខ្លួន និងកំប៉េះគូទ ហើយក្រោយពេលរត់តោងឡើងរបងរួចក៏ដួលសន្លប់មុខផ្ទះអ្នកស្រុក តែម្តង ។ ស្ត្រីរូបនេះក៏ដូចជាអ្នកស្រុកនិយាយថា គ្រប់គ្នាបាននាំគ្នារត់ពួនតាមផ្ទះមិនហ៊ានចេញទេរហូតទាល់តែ សត្វឪម៉ាល់ហើរចេញអស់ទើបនាំគ្នាស្រែកហៅឪពុកម្តាយក្មេងរងគ្រោះ ឱ្យយកកូនទៅពេទ្យ ។
បុរសជាឪពុកឈ្មោះណន រ៉ា អាយុ៤៧ឆ្នាំ និងម្តាយឈ្មោះរឿត រៀង អាយុ៤៣ឆ្នាំ និយាយថា ក្រោយពីមានឧប្បត្តិហេតុនេះ ពួកគាត់ក៏បាននាំកូនទៅពេទ្យឈ្នួលនិងបានព្យួរសេរ៉ូមផងដែរ ប៉ុន្តែជាអកុសលកូនគាត់បានស្លាប់ដោយមិនអាចសង្គ្រោះបាន ។
នៅយប់ថ្ងៃកើតហេតុនោះ សត្វឪម៉ាល់មួយសម្បុកធំនោះក៏ត្រូវអ្នកស្រុកនាំគ្នាដុតកម្ទេច ចោលទាំងអស់តែម្តង ព្រោះខ្លាចទិចក្មេងៗនៅពេលក្រោយទៀត ។ ចំណែកសពក្មេងរងគ្រោះត្រូវបានឪពុកម្តាយរៀបចំធ្វើបុណ្យតាមប្រពៃណី ។
គួរកត់សម្គាល់ថា ចង់បំផ្លាញសម្បុកឪម៉ាល់គេហ៊ានធ្វើតែនៅពេលយប់ងងឹតទេ ដោយដុតឈួលវាដោយសំណុំភ្លើង ។ បើហ៊ានធ្វើនៅពេលថ្ងៃប្រាកដជាចាញ់ឪម៉ាល់មិនខាន ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
