ខេត្តបាត់ដំបង ៖ ក្រុមសន្តិសុខក្រុងបាត់ដំបងបានចេញល្បាតហាមប្រាមដល់ក្រុមយុវជនយុវនារីដែលកំពុងឈ្លក់វង្វេងនឹង «ថ្ងៃបុណ្យសង្សារ ឬបុណ្យនៃសេចក្ដីស្រឡាញ់» ដែលមិនមែនជាវប្បធម៌ និងប្រពៃណីខ្មែរមិនឲ្យដាក់តាំងផ្កាលក់តាមដងផ្លូវសាធារណៈនានាក្នុងក្រុងបាត់ដំបង ដែលនឹងប្រព្រឹត្តទៅនៅថ្ងៃទី១៤ កុម្ភៈ ក្រោយពីទទួលបានផែនការពីលោកអភិបាលក្រុងបាត់ដំបង។
សកម្មភាពនេះគេពិនិត្យឃើញក្រុមយុវជន យុវនារីបានតាំងលក់ផ្កាកូលាបចម្រុះពណ៌តិចតួចបំផុតនៅតាមដងផ្លូវនានាក្នុងក្រុងបាត់ដំបង នាព្រឹកថ្ងៃទី១៤ កុម្ភៈ។ ប៉ុន្តែគេសង្កេតឃើញក្រុមយុវសិស្សទាំងប្រុសទាំងស្រីមិនព្រមចូលសាលា បែរជានាំគ្នាជិះម៉ូតូទាំងហ្វូងៗតាមដងផ្លូវយ៉ាងច្រាស់ច្រាលដែលខ្លះប្រមូលផ្ដុំគ្នានៅតាមសួនច្បារ និងខ្លះទៀតនាំគ្នាចូលតាមបណ្ដាអាហារដ្ឋានដែលមានក្យូសបិទជិត។
កម្លាំងនគរបាលព្រហ្មទណ្ឌខេត្តក៏បានចេញល្បាតតាមដងផ្លូវនានា ដើម្បីឃ្លាំមើល និងទប់ស្កាត់រាល់បទល្មើសដែលអាចកើតឡើងពីសកម្មភាពនេះ។ រីឯក្រុមសន្តិសុខក្រុងក៏បានចេញបង្រ្កាបក្រុមអ្នកលក់ផ្កាតាមចិញ្ចើមថ្នល់ដែរ។ ក្រុមសន្តិសុខទាំងនោះនិយាយថា អាជ្ញាធរក្រុងបានបញ្ជាឲ្យមានការរៀបចំសណ្ដាប់ធ្នាប់ក្នុងក្រុងនៅថ្ងៃ «បុណ្យសង្សារ ឬបុណ្យនៃសេចក្ដីស្រឡាញ់» នេះ។ ពួកគេប្រាប់ថា អាជ្ញាធរមិនអនុញ្ញាតឲ្យក្រុមយុវវ័យទាំងនោះដាក់តាំងផ្កាលក់ដូចឆ្នាំមុនៗនៅតាមដងផ្លូវនានាក្នុងក្រុងទៀតទេ។ ប៉ុន្តែបញ្ជាក់ថា ពួកគេអាចដាក់តាំងផ្កាលក់បាននៅតាមផ្ទះ ឬនៅតាមទីផ្សារដែលមានលក់ផ្កាចម្រុះ ឬអាចដាក់លក់បាននៅពេលយប់ ព្រោះលក់ពេលថ្ងៃវានាំឲ្យប៉ះពាល់សណ្ដាប់ធ្នាប់ ម្យ៉ាងទៀតទិវានេះមិនមែនជាទំនៀមទម្លាប់ ឬប្រពៃណីរបស់ខ្មែរនោះទេ ដូច្នេះអាជ្ញាធរត្រូវតែធ្វើការទប់ស្កាត់ ៕
ដោយប្រុសកោះ
ផ្តល់សិទ្ធដោយ កោះសន្តិភាព
សូមប្រិយមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
