កំពុងធ្វើរបងខណៈមេឃភ្លៀង ដើរជាន់ខ្សែភ្លើងចំមុខដំណឆក់ស្លាប់

ភ្នំពេញ ៖ កម្មករសំណង់ម្នាក់ បានស្លាប់ បើទោះត្រូវបានសាច់ញាតិ ដឹកបញ្ជូនតាម ម៉ូតូកង់៣ ឆ្ពោះទៅកាន់មន្ទីរពេទ្យកាល់ម៉ែត ក៏ដោយ បន្ទាប់ពីជនរងគ្រោះរូបនេះ បានដើរ ជាន់ចំមុខដំណខ្សែភ្លើង ខណៈដែលមេឃ កំពុងភ្លៀង ហើយក៏ត្រូវឆក់ស្លាប់កាលពី ល្ងាចថ្ងៃទី១៣ ខែកក្កដា ស្ថិតនៅក្នុងបរិវេណ ស្ថានីយ៍បូមទឹក សម្រាប់ ផ្គត់ផ្គងរោងចក្រ អគ្គិសនី ដែលមានទីតាំងតាមបណ្ដោយផ្លូវ ជាតិលេខ៥ ភូមិ១៦ សង្កាត់ស្រះចក ខណ្ឌ ដូនពេញ ។

មន្ដ្រីនគរបាលមូលដ្ឋានបានឱ្យដឹងថា លោកផល អាយុ៣២ឆ្នាំ មុខរបរជាកម្មករ សំណង់ ស្នាក់នៅភូមិព្រែកទាល់ សង្កាត់ ស្ទឹងមានជ័យ ខណ្ឌមានជ័យ បានដួល បន្ទាប់ ពីត្រូវខ្សែភ្លើងឆក់ បើទោះបីត្រូវបានសាច់ ញាតិជួយដឹកបញ្ជូនភ្លាមៗទៅកាន់មន្ទីរពេទ្យក៏ដោយ ។

ការស្លាប់របស់ជនរងគ្រោះ ត្រូវបានសមត្ថកិច្ចអះអាងថា ខណៈដែលជនរងគ្រោះ កំពុងធ្វើរបងស្រាប់តែពេលនោះ ត្រូវមេឃកំពុងភ្លៀងផង ក៏ដើរជាន់លើមុខដំណខ្សែភ្លើង ឆក់ស្លាប់តែម្ដងទៅ ៕

ដោយ ៖ គឹម ចន្ថា

ផ្តល់សិទ្ធដោយ ដើមអម្ពិល