ខេត្តបាត់ដំបង ៖ បុរសជនជាតិវៀតណាមម្នាក់ ត្រូវសមត្ថកិច្ចឃាត់ខ្លួនតាមពាក្យបណ្តឹងរបស់ប្រពន្ធ ពីបទចូលមុងប្អូនថ្លៃប៉ុនប៉ងចាប់រំលោភសេពសន្ថវៈ កាលពីវេលាម៉ោង១រំលងអធ្រាត្រឈានចូលថ្ងៃទី១៣ មិថុនា នៅក្នុងផ្ទះស្ថិតក្នុងភូមិព្រៃចាស់ ឃុំព្រៃចាស់ ស្រុកឯកភ្នំ ប៉ុន្តែជនជាប់ចោទអះអាងថា គេចូលមុងច្រឡំ ព្រោះស្រវឹងពេក រកកន្លែងដេកអត់ឃើញ ។
មន្ត្រីនគរបាលមូលដ្ឋាននិយាយថា បុរសវៀតណាមនោះឈ្មោះ ហេង យ៉ាំងធឿន អាយុ៣៦ឆ្នាំ និងប្អូនថ្លៃឈ្មោះ ភុំ ធីហឿង អាយុ១៧ឆ្នាំ ស្នាក់នៅក្នុងផ្ទះជាមួយគ្នា ។ ការចាប់រំលោភនោះមិនបានសម្រេចដោយសារនាងជាប្អូនថ្លៃភ្ញាក់ ទាន់ ហើយស្ទុះរត់ចេញ ។
ស្ត្រីជាប្រពន្ធបុរសជាប់ចោទប្រាប់សមត្ថកិច្ច ថា ប្តីរបស់នាងមានគំនិតទុច្ចរិតប៉ុនប៉ងចាប់ប្អូនស្រីរបស់នាង រំលោភក្នុងគ្រានាងយកកូនទៅខេត្តសៀមរាប ដើម្បីព្យាបាលជំងឺ ។ រូបនាងបានត្រឡប់មកវិញទាំងយប់ក្រោយពីប្អូនស្រីប្រាប់អំពី រឿងចាប់រំលោភនោះភ្លាមតាមទូរស័ព្ទ ហើយទៅប្តឹងសមត្ថកិច្ចឱ្យចាប់ខ្លួនប្តីទាំងយប់ ។
នារីរងគ្រោះឈ្មោះ ភុំ ធីហឿង និយាយប្រាប់សមត្ថកិច្ចថា ពេលនាងកំពុងដេកលក់ ស្រាប់តែបងថ្លៃឈ្មោះ យ៉ាំងធឿន ចូលក្នុងមុងរបស់នាង ហើយសម្រាតខោនាង តែនាងដឹងខ្លួនក៏ធាក់ និងច្រានជនស្រវឹងនោះចេញ ។ នាងងើបរត់ចេញទៅក្រៅ រួចទូរស័ព្ទប្រាប់បងស្រីភ្លាម ។
ជនសង្ស័យសារភាពថា គេបើកមុងចូលដេកជាមួយប្អូនថ្លៃដោយសារស្មានតែប្រពន្ធរបស់គេ ព្រោះស្រវឹងពេក ។ ពេលគេចាប់ស្រាតខោប្អូនថ្លៃ ឮនាងនិយាយថា «ហេតុអីក៏បងធ្វើអ៊ីចឹង» ទើបដឹងថា នាងជាប្អូនថ្លៃមិនមែនជាប្រពន្ធទេ ។ នេះជាការភ័ន្តច្រឡំតែប៉ុណ្ណោះ ។
មន្ត្រីនគរបាលនៃការិយាល័យជំនាញប្រាប់ថា ជនសង្ស័យត្រូវកសាងសំណុំរឿងបញ្ជូនខ្លួនទៅតុលាការចាត់ការ តាមច្បាប់ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
