ក្រុងប៉ោយប៉ែត ៖ យុវជនម្នាក់បើករថយន្តកាមរីឆ្លាម ថយក្រោយជ្រុលចូលផ្ទះអ្នកស្រុក ហើយស្របពេលនោះបុរសចំណាស់ម្នាក់ដែលកំពុងដេកអង្រឹងលោតចេញ បណ្តាលឱ្យថ្លោះចង្កេះ ព្រមទាំងកិនបាក់គ្រែ និងផើងផ្កា ។ ហេតុការណ៍នេះបានកើតឡើងកាលពីវេលាម៉ោង៩និង៤០នាទីព្រឹកថ្ងៃ ទី២២ ឧសភា ក្នុងភូមិប៉ោយប៉ែត សង្កាត់ប៉ោយប៉ែត ។
រថយន្តបង្កហេតុម៉ាកកាមរី ស៊េរីឆ្នាំ១៩៩១ ចង្កូតស្តាំ បើកដោយឈ្មោះយឹម សិលា ភេទប្រុស អាយុ១៨ឆ្នាំ ។ លំនៅឋានដែលរថយន្តបើកថយជ្រុលចូលនោះជារបស់ឈ្មោះឆៃ វ៉ាន់ណូ អាយុ៨៨ឆ្នាំ ។ ពេលនោះគាត់កំពុងសម្រាកលើអង្រឹង ក៏លោតគេចបណ្តាលឱ្យថ្លោះចង្កេះ និងរងរបួសជើង ។ រថយន្តនោះកិនបាក់គ្រែ ព្រមទាំងបែកផើងផ្កាខាងមុខផ្ទះផងដែរ ។
សមត្ថកិច្ចឱ្យដឹងថា អ្នកបើករថយន្តនោះមិនមែនជាម្ចាស់រថយន្តទេ គ្រាន់តែជាសាច់ញាតិម្ចាស់រថយន្តប៉ុណ្ណោះ ។ រថយន្តនោះត្រូវម្ចាស់ដឹកត្រីពីខេត្តសៀមរាប ទៅឱ្យម៉ូយនៅម្តុំខាងលិចផ្សាររ៉ា លុះដាក់ត្រីអស់ក៏ទុករថយន្តនៅកន្លែងកើតហេតុ រួចចូលទៅផ្សារលុងក្លឿ ទឹកដីថៃ ។ ម្ចាស់រថយន្តទុកកូនសោឱ្យឈ្មោះយឹម សិលា ហើយប្រាប់ថា បើទើសផ្លូវឱ្យកូនសោគេជួយថយ ឬបើកទៅរកទៅកន្លែងផ្សេងផង ។
ខណៈមានរថយន្តគេចេញចូលទីនោះច្រើនឈ្មោះយឹម សិលា ក៏ឡើងបើករថយន្តដោយខ្លួនឯង ហើយជួបគ្រោះថ្នាក់តែម្តង ។
ភាគីទាំង២សម្រួលគ្នា ដោយភាគីបង្កព្រមបង់ថ្លៃខូចខាតឱ្យបុរសចំណាស់២.៥០០បាត ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
