រាជធានីភ្នំពេញ ៖ លោកឧត្តមសេនីយ៍ត្រី ទូច ណារ៉ុថ ស្នងការនគរបាលរាជធានីភ្នំពេញ បានបញ្ជាក់ប្រាប់កោះសន្តិភាពនៅថ្ងៃទី២០ ឧសភា ថា ករណីបងថ្លៃម្ចាស់ហាងលក់គ្រឿងសម្ភារអគ្គិសនី ភីភី ជេណឺរ៉ល បាញ់សម្លាប់មេការ រួចបាញ់ខ្លួនឯងនោះ គឺស្ថិតនៅតែជារឿងគំនុំមិនពាក់ព័ន្ធនឹងស្នេហាត្រីកោណទេ ។
លោកស្នងការបន្តថា ទោះបីជារឿងនេះ ជនរងគ្រោះក៏ស្លាប់ ខ្មាន់កាំភ្លើងក៏បាញ់សម្លាប់ខ្លួនឯង គឺជារឿងបិទមុខ ប៉ុន្តែសមត្ថកិច្ចនៅតែប្រឹងប្រែងបន្តការស្រាវជ្រាវរកឱ្យឃើញ អង្គហេតុបណ្តាលឱ្យបាត់បង់អាយុជីវិតមនុស្ស២នាក់ ដោយសារគ្រាប់កាំភ្លើងនោះដែរ ហើយបើទោះបីមានពាក្យបណ្តឹង ឬគ្មានពាក្យបណ្តឹង សមត្ថកិច្ចនៅតែប្រមូលព័ត៌មានដាក់ជូនស្ថាប័នសាលាដំបូងទៅតាម នីតិវិធីច្បាប់ ។
មន្ត្រីជំនាញដែលស្និទ្ធនឹងការស៊ើបអង្កេតលើ ករណីបាញ់សម្លាប់មនុស្សនេះ បានបង្ហើបឱ្យដឹងថា បានជាការស្រាវជ្រាវលើករណីនេះបង្ហាញថាជារឿងគំនុំ ព្រោះបើតាមការបំភ្លឺពីអ្នកបម្រើការងារក្នុងហាងនោះបញ្ជាក ់ថា កន្លងមកហាងលក់សម្ភារអគ្គិសនីនេះគ្រប់គ្រងផ្ទាល់ដោយឪពុករបស់ អ្នកទាំង៣ គឺជា តុង បងស្រី ជាតុង ដែលត្រូវជាប្រពន្ធងួន វុទ្ធី ហៅទូច និងងួន វុទ្ធី ដែលជាកូនប្រសា ។ ប៉ុន្តែមួយរយៈពេលដែលឪពុកអ្នកទាំងបីមានជំងឺក៏បានឱ្យកូនទាំង អស់មើលការខុសត្រូវទម្រាំគាត់ធូរស្រាល នឹងគ្រប់គ្រងឡើងវិញ ។ ក្នុងចន្លោះពេលកូនបង្កើត និងកូនប្រសាមើលការខុសត្រូវជំនួសឪពុកនេះ លោកជា តុង ជាកូនបង្កើតក៏បានរៀបចំគណនេយ្យថ្មីមួយសម្រាប់គ្រប់គ្រងចំណូល ចំណាយលើទឹកប្រាក់នាំចេញ-នាំចូលសម្ភារគ្រប់សព្វសារពើ ដែលគណនេយ្យនោះ មានសិទ្ធិតែ២នាក់ទេ គឺលោកជា តុង និងលោកវង្ស សុក្រិតសារ៉ា ដែលជាមេការ ។
ប្រភពដដែលបន្តថា ចាប់តាំងពីបង្កើតគណនេយ្យថ្មីនេះមកបងប្អូនទាំង៣នាក់មានភាព រកាំរកូសជាប្រចាំ ម៉្យាងទៀតធ្វើឱ្យគ្រួសារលោកងួន វុទ្ធី ហៅទូច មិនសូវចុះសម្រុងគ្នាទៀតផង ។ បន្ទាប់ពីការបង្កើតឱ្យមានគណនេយ្យថ្មីនេះ លោកវង្ស សុក្រិតសារ៉ា ជាមេការតែងតែនិយាយលេងជាមួយលោកងួន វុទ្ធី ដែលជាបងថ្លៃរបស់អ្នកគ្រប់គ្រងហាងទាំងមូល គឺលោកជា តុង ។ ពាក្យសំដីនិយាយរបៀបលេងសើច បានធ្វើឱ្យលោកងួន វុទ្ធី ប្រកាន់ខឹងមេការនោះ ។ សាក្សីរៀបរាប់ប្រាប់សមត្ថកិច្ចទៀតថា ក្រោយពេលកើតមានគណនេយ្យ ឬអ្នកគ្រប់គ្រងហាងបណ្តោះអាសន្នថ្មីនោះ លោកងួន វុទ្ធី ជាកូនប្រសាម្ចាស់ហាងខូចចិត្តដើរលេងច្រើនមិនសូវចូលផ្ទះធ្វើ ឱ្យប្រពន្ធខឹងមិនសូវលស់ថ្ងៃទេ ហើយមានពេលខ្លះឈ្លោះគ្នាតាមទូរស័ព្ទក៏មាន ។
ដោយសារការគ្រប់គ្រងហាងលក់ដូរត្រូវបាត់បង់ ហើយក្នុងរង្វង់គ្រួសារ ក៏មានភាពរកាំរកូស លោកងួន វុទ្ធី បានជ្រើសរើសយកផ្លូវមួយគត់ គឺផ្តាច់ជីវិតមេការ រួចប្រហារជីវិតខ្លួនឯង ដើម្បីចៀសឱ្យផុតពីការមើលងាយមើលថោកពីអ្នកនៅជិតខ្លួន ។ សាក្សីបន្តថា នៅថ្ងៃកើតហេតុនោះ លោកជា តុង បានទៅធ្វើការធម្មតាជាមួយលោកវង្ស សុក្រិតសារ៉ា ជាមេការ ហើយនៅរសៀលថ្ងៃទី១៧ ឧសភា គេឃើញវត្តមានលោកងួន វុទ្ធី ហៅទូចទៅដល់ហាងដែរ ។ ពេលលោកងួន វុទ្ធី ទៅដល់បានកើតមានជម្លោះជាមួយគេឯងគ្រប់គ្នារាប់ទាំងលោកជា តុង និងលោកវង្ស សុក្រិតសារ៉ា ផង។ អាកប្បកិរិយារបស់លោកងួន វុទ្ធី គឺច្រងេងច្រងាងខុសធម្មតាបន្តិចក្រោយមកស្រាប់តែដើរឡើងទៅជាន់ ទី១ ចូលបន្ទប់មេការ រួចដកកាំភ្លើងខ្លីធុនទំនើបបាញ់លោកវង្ស សុក្រិតសារ៉ា ជាច្រើនគ្រាប់បណ្តាលឱ្យស្លាប់ ។
ភ្លាមនោះ គេឃើញលោកងួន វុទ្ធី ស្ទុះទៅភ្ជង់ក្បាលលោកជា តុង ជាប្អូនថ្លៃទៀត ដោយពោលថា អាតុងអញមិនសម្លាប់អ្ហែងទេ នោះចាត់ទុកជាសំណាងអ្ហែងហើយ ។ បន្ទាប់ពីនោះមក លោកងួន វុទ្ធី បានដើរចូលបន្ទប់ទឹករួចបាញ់សម្លាប់ខ្លួនឯងតែម្តង ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]