ខេត្តពោធិ៍សាត់ ៖ ក្មេងស្រីម្នាក់ដែលពូកែដើរបាត់ពីផ្ទះច្រើនដងពេក ត្រូវបានម្តាយចិញ្ចឹមដាក់ច្រវាក់ជើងចាក់សោជាប់នឹងរោងឆ្កែ រួចហើយទៅផ្សារបាត់ ។ លុះមួយសន្ទុះក្រោយមកព័ត៌មាននេះបានធ្លាយចេញទៅក្រៅធ្វើឱ្យ សមត្ថកិច្ចចុះមកពិនិត្យមើលព្រោងព្រាតសង្ស័យពាក់ព័ន្ធនឹង ករណីបង្ខាំងមនុស្សខុសច្បាប់ ។
ម្ចាស់ផ្ទះអ្នកស្រីយិន ស៊ីណា អាយុ៥៤ឆ្នាំ ជាអនុប្រធានភូមិពាលញែក២ សង្កាត់ផ្ទះព្រៃ ក្រុងពោធិ៍សាត់ ប្តីជាជនពិកាជើងមានមុខរបរជាជាងប៉ះកង់ ។ ចំណែកក្មេងស្រីដែលដាក់ច្រវាក់ជើងកុំឱ្យដើរឈ្មោះសំ ស្រីណុច អាយុ១៣ឆ្នាំ ជាកូនចិញ្ចឹម និងមានសតិមិនប្រក្រតី ។
លោក វរសេនីយ៍ទោសាយ សាវុធ អនុប្រធានការិយាល័យកណ្តាលនគរបាលយុត្តិធម៌នៃស្នងការ ដ្ឋាននគរបាលខេត្តឱ្យដឹងថា នៅព្រឹកថ្ងៃទី១៧ ឧសភា ដោយមានការផ្តល់ព័ត៌មានពីប្រជាពលរដ្ឋថា ផ្ទះមួយនៅខាងត្បូងជាប់របងអធិការដ្ឋានរដ្ឋបាលជលផល ខាងត្បូងបឹងទន្លេសាប ស្ថិតក្នុងភូមិពាលញែក២ សង្កាត់ផ្ទះព្រៃ ក្រុងពោធិ៍សាត់ មានក្មេងស្រីម្នាក់ត្រូវគេដាក់ច្រវាក់មិនឱ្យដើរទៅ ណា ។ ភ្លាមលោកវរសេនីយ៍ឯករស់ ប៊ុនណាន ស្នងការរង និងជាប្រធានការិយាល័យកណ្តាលនគរបាលយុត្តិធម៌នៃស្នង ការដ្ឋាននគរបាលខេត្តបានចាត់ឱ្យលោកដឹកនាំកម្លាំងចុះ ទៅពិនិត្យមើល ។ ពេលទៅដល់ស្ងាត់ជ្រៀបពុំមានអ្នកណានៅទេ ឃើញតែក្មេងស្រីនោះម្នាក់ឯងអង្គុយក្នុងរោងក្បែររបង ជើងជាប់ច្រវាក់ ។ មួយសន្ទុះក្រោយមកទើបឃើញស្ត្រីម្ចាស់ផ្ទះមកដល់ ហើយកម្លាំងរបស់លោកក៏ហៅទៅសួរនាំនៅឯស្នងការដ្ឋាន នគរបាលតែម្តង ។
នៅចំពោះមុខសមត្ថកិច្ច ស្រ្តីម្ចាស់ផ្ទះឈ្មោះយិក ស៊ីណា បានរៀបរាប់ប្រាប់ថា ក្មេងស្រីឈ្មោះសំ ស្រីណុច នេះជាកូនកំព្រាឪពុកម្តាយ ហើយត្រូវបានអង្គការទំពាំងស្នងប្ញស្សីនៅភ្នំ ពេញយកមកឱ្យគាត់ចិញ្ចឹម៦-៧ឆ្នាំមកហើយ ។ក្មេងស្រីនេះមានជំងឺសរសៃប្រសាទលេបថ្នាំរាល់ថ្ងៃ ហើយមុនថ្ងៃសីលមួយថ្ងៃតែងធ្វើទុកស្រែកយំ និងកាចខុសពីធម្មតា ។ ពេលប្តីរបស់គាត់ទៅប្រកបរបររកស៊ីប៉ះកង់នៅក្បែររបង វត្តពាលញែក ហើយគាត់ទៅសាលាឃុំ តែងទុកនាងឱ្យនៅចាំផ្ទះឬឱ្យទៅរៀននៅសាលា ប៉ុន្តែនាងមិនដែលនៅផ្ទះទេ ដើរទៅណាបាត់ៗរាល់ថ្ងៃ ជួនកាលម៉ោង១០យប់ទើបឃើញចូលផ្ទះ ។ មានថ្ងៃខ្លះ ដោយសារនាងមានសតិមិនល្អ បានដើរសើយអាវ យកដៃលុញសុដន់លេងនៅតាមហាងកាហ្វេ ពេលនោះមានអ្នកស្គាល់ក៏នាំមកដល់ផ្ទះ ។ លុះស្អែកឡើងថ្ងៃទី១៧ ឧសភា គាត់ទៅទិញម្ហូបនៅឯផ្សារដោយបារម្ភពេក គាត់ក៏ដាក់ច្រវាក់មួយភ្លែតក្នុងរោងឆ្កែជ្រុងរបងផ្ទះ ។ ប៉ុន្តែទើបតែជិះកង់ដល់ផ្សារ ស្រាប់តែគេទូរស័ព្ទឱ្យត្រឡប់មកវិញ ព្រោះសមត្ថកិច្ចនៅពេញផ្ទះចង់ជួប ។ ស្ត្រីម្ចាស់ផ្ទះបន្តថា កន្លងមកគាត់មិនដែលវាយធ្វើបាប ឬបង្អត់អាហារក្មេងស្រីនេះទេ គឺចាត់ទុកដូចជាកូនបង្កើត ហើយការដាក់ច្រវាក់នេះគឺគាត់ទៅផ្សារមួយភ្លែតប៉ុណ្ណោះ ។ ប៉ុន្តែដោយសារគាត់ជិតមកដល់បែរជាជាប់ចោទថា បង្ខាំងមនុស្សខុសច្បាប់ទៅវិញ ។
បន្ទាប់ពីសួរនាំដឹងថា ក្មេងស្រីរងគ្រោះពិតជាមានជំងឺសរសៃប្រសាទដើរបាត់ៗពីផ្ទះ រាល់ថ្ងៃ និងដោយមានការទទួលដឹងឮពីមេឃុំ-ភូមិ និងប្រជាពលរដ្ឋនៅក្បែរនោះផង លោកព្រះរាជអាជ្ញាមិនចោទប្រកាន់ទេ គឺបានឱ្យស្ត្រីនោះមកផ្ទះវិញធម្មតា ។ ឯក្មេងស្រីរងគ្រោះប្រគល់ទៅឱ្យភាគីខាងមន្ទីរសង្គមកិច្ច អតីតយុទ្ធជននិងយុវនីតិសម្បទាគ្រប់គ្រង ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
