ខេត្តបាត់ដំបង ៖ ក្រុមយុវជនប្រមឹក៤នាក់ត្រូវបានសមត្ថកិច្ចចាប់ខ្លួនក្រោយពីស្រាវជ្រាវដឹងថា ពួកគេបានគាស់ផ្ទះលួចយកម៉ូតូអ្នកភូមិមួយគ្រឿងកាលពីវេលាម៉ោង២រំលងអធ្រាត្រឈានចូលថ្ងៃទី២១ មករា នៅចំណុចភូមិអូរកណ្ដោល ឃុំសន្តិភាព ស្រុកសំពៅលូន ដែលបានយកទៅលក់នៅខេត្តបន្ទាយមានជ័យ។
មន្រ្តីនគរបាលស្រុកសំពៅលូនបាននិយាយថា ជនសង្ស័យទាំង៤នាក់រួមមាន១-ឈ្មោះផល ភាន់ អាយុ១៧ឆ្នាំ ២-ឈ្មោះជួប សារិត ហៅឡេវ អាយុ១៧ឆ្នាំ ៣-ឈ្មោះម៉ាប់ តាន់ អាយុ១៧ឆ្នាំ និង៤-ឈ្មោះហេង ចាន់ហ៊ាង អាយុ១៧ឆ្នាំ។ រីឯម្ចាស់ម៉ូតូឈ្មោះផាន់ យុត ភេទស្រី អាយុ៤៨ឆ្នាំ។ ទាំងជនសង្ស័យ និងម្ចាស់ម៉ូតូរស់នៅភូមិ-ឃុំកើតហេតុខាងលើ។ ដោយឡែកម៉ូតូដែលត្រូវក្រុមចោរខាងលើលួចម៉ាកហុងដាឌ្រីមសេ១២៤ ពណ៌ខ្មៅ ស៊េរីឆ្នាំ២០១១។ សមត្ថកិច្ចនិយាយថា ក្រុមជនសង្ស័យទាំងនេះ បានគាស់ផ្ទះជនរងគ្រោះចូលលួចយកម៉ូតូ ក្នុងគ្រាដែលម្ចាស់ផ្ទះដេកលក់ ហើយជនសង្ស័យបានយកម៉ូតូនោះទៅលក់នៅខេត្តបន្ទាយមានជ័យ ក៏ត្រូវសមត្ថកិច្ចខេត្តនេះចាប់ខ្លួនតែម្ដង។ យោងតាមពាក្យបណ្ដឹងរបស់ស្ត្រីឈ្មោះផាន់ យុត បានឲ្យដឹងថា បន្ទាប់ពីដឹងថា បាត់ម៉ូតូនៅម៉ោងប្រហែល៥ទៀបភ្លឺថ្ងៃទី២១ មករា អ្នកស្រីបានប្ដឹងសមត្ថកិច្ចតែម្ដង។ ស្ត្រីម្ចាស់ម៉ូតូបន្តថា ខ្លួនមិនដឹងថាតើអ្នកណាជាអ្នកលួចយកម៉ូតូគាត់នោះទេ តែគ្រាន់តែដឹងថា នៅវេលា២អធ្រាត្រនោះមានឆ្កែព្រុស លុះព្រឹកឡើងស្រាប់តែបាត់ម៉ូតូ ក៏ទៅប្ដឹងសមត្ថកិច្ចតែម្ដងទៅ។
មន្រ្តីនគរបាលនិយាយថា ជនសង្ស័យត្រូវបានសមត្ថកិច្ចខេត្តបន្ទាយមានជ័យចាប់ខ្លួន ខណៈដែលពួកគេយកម៉ូតូនោះទៅលក់ដោយគ្មានឯកសារច្បាស់លាស់៕
ដកស្រង់ ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]