រាជធានីភ្នំពេញ ៖ ចោរប្លន់ប្រដាប់អាវុធអាកា និងដំបងមួយក្រុម បានសម្រុកចូលទៅធ្វើសកម្មភាពភ្ជង់វាយ និងគំរាមបាញ់សម្លាប់លោកអនុប្រធានការិយាល័យកសិកម្ម នៃមន្ទីរកសិកម្មខេត្តកណ្តាល និងប្រពន្ធ ព្រមទាំងកូនដែលកំពុងអង្គុយមើលទូរទស្សន៍នៅក្នុង ផ្ទះពេលយប់ បណ្តាលឱ្យឪពុក និងកូនប្រុសម្នាក់រងរបួសយ៉ាងធ្ងន់ធ្ងរ ។ ចំណែកក្រុមចោរទាំងនោះ ប្លន់យកបានម៉ូតូពីរគ្រឿង ព្រមទាំងគ្រឿងអលង្ការមាសប្លាទីន និងលុយមួយចំនួន ហើយនាំគ្នាជិះគេចខ្លួន ប៉ុន្តែចំថ្ងៃអង្សា ពេលដល់ពាក់កណ្តាលផ្លូវជួបឧប្បត្តិហេតុគ្រោះថ្នាក់ ចរាចរណ៍ ក៏ត្រូវប៉ូលិសប៉ុស្តិ៍កាកាប និងប៉ូលិសខណ្ឌពោធិ៍សែនជ័យ ចាប់ខ្លួនបានពីរនាក់ ព្រមទាំងដកហូតបានកាំភ្លើងអាកាកាត់ស្វាយ១ដើម ម៉ូតូ១គ្រឿង និងគ្រឿងអលង្ការមួយចំនួនមកវិញ ។
ហេតុការណ៍នេះ បានកើតឡើងកាលពីវេលាម៉ោង៧និង៣០នាទីយប់ថ្ងៃទី១៥ ឧសភា នៅក្នុងភូមិសិរីសម្បត្តិ សង្កាត់គងនយ ខណ្ឌដង្កោ ។
មន្ត្រីប៉ូលិសនិយាយថា ក្រុមចោរប្លន់មានគ្នា៤នាក់ ស្លៀកពាក់ស៊ីវិលប្រដាប់ដោយកាំភ្លើងអាកា២ដើម និងដំបងផងដែរ ។ ក្រុមចោរប្លន់អត់មានម៉ូតូជិះសម្រាប់ធ្វើសកម្មភាពទេ គឺទៅប្លន់ដោយថ្មើរជើង ។ ប៉ូលិសចាប់ខ្លួនបានពីរនាក់ គឺឈ្មោះ ស្រេង សេងហាយ អាយុ៣០ឆ្នាំ ជាមេខ្លោង មានស្រុកកំណើតនៅភូមិជាច ឃុំចុងជាច ស្រុកតំបែរ ខេត្តកំពង់ចាម និងឈ្មោះ ធីរិទ្ធ ហៅធា អាយុ២១ឆ្នាំ មានស្រុកកំណើតភូមិពោធិ៍ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម ។ ឯបក្សពួកពីរនាក់ទៀត គេចខ្លួនទៅបាត់ជាមួយកាំភ្លើងអាកា១ដើម និងម៉ូតូ១គ្រឿង ព្រមទាំងគ្រឿងអលង្ការដែលប្លន់បានពីជនរងគ្រោះផងដែរ ។
ជនរងគ្រោះជាម្ចាស់ផ្ទះឈ្មោះ អ៊ុក សុវណ្ណា ភេទប្រុស អាយុ៥០ឆ្នាំ ជាអនុប្រធានការិយាល័យកសិកម្មនៃមន្ទីរកសិកម្មខេត្តកណ្តាល រងរបួសយ៉ាងធ្ងន់ ដោយសារចោរវាយផង និងភិតភ័យខ្លាំងផង បានឡើងទៅលើដំបូលផ្ទះ ហើយលោតចេញក្រៅបណ្តាលឱ្យធ្លាក់បោកទៅលើដីពេញទំហឹង ។ ឯក្រុមគ្រួសាររបស់គាត់៦នាក់ទៀតមានប្រពន្ធ និងកូនប្រុសស្រីត្រូវក្រុមចោរចាប់ចងស្លាបសេក និងវាយធ្វើបាបស្ទើរស្លាប់ស្ទើររស់ បណ្តាលឱ្យកូនប្រុសម្នាក់រងរបួសធ្ងន់ដែរ ។ ក្រុមចោរខាងលើ បានប្លន់យកម៉ូតូឌ្រីមសេ១២៥ ពីរគ្រឿង គឺ១គ្រឿងស៊េរី២០១០ ពណ៌ខ្មៅ និង១គ្រឿងទៀត ស៊េរីឆ្នាំ២០០៨ ពណ៌ក្រហម ។ គ្រឿងអលង្ការមាស៤តម្លឹង២ជី ប្លាទីន១តម្លឹង៣ជី ហើយក៏មានកងដៃ២ឈុត និងលុយជាង២០ម៉ឺនរៀល ក្រវិល២គូទៀត ដែលមិនដឹងពីទម្ងន់ក៏ត្រូវចោរប្លន់យកទៅដែរគឺប្រមូលអស់ ។
លំនៅឋានរបស់លោក អ៊ុក សុវណ្ណា ដែលត្រូវចោរចូលប្លន់នោះស្ថិតនៅទីតាំង ឆ្ងាយពីគេឯងពី៥០ទៅ១០០ម៉ែត្រ យប់ឡើងមានស្ថានភាពស្ងាត់ជ្រងំ ។ នៅវេលាយប់កើតហេតុ ក្រុមគ្រួសារទាំងអស់គ្នានោះបាននាំគ្នាអង្គុយមើលទូរទស្សន៍នៅ ក្នុងផ្ទះដោយបិទទ្វាររបងខាងមុខ ប៉ុន្តែអត់ចាក់សោទេ ឯទ្វារផ្ទះក៏មិនបានបិទដែរព្រោះរង់ចាំបើករថយន្តចូលទុកដាក់ ។ លុះដល់ពេលកើតហេតុ ក្រុមចោរបានបើកទ្វាររបងផ្ទះចូលទៅធ្វើសកម្មភាពចាប់ប្រពន្ធ និងកូនប្រុស ស្រីសរុបមានគ្នា៦នាក់ចងស្លាបសេក និងវាយធ្វើបាប ។ ឯលោក អ៊ុក សុវណ្ណា បានរត់ឡើងទៅលើដំបូលផ្ទះសម្ងំមួយសន្ទុះ ទើបស្រែកថា ចោរៗ ។ ពេលនោះចោរកំពុងរើកកាយយកទ្រព្យសម្បត្តិ ពេលឮបុរសនោះស្រែកក៏បានឡើងទៅតាមចាប់ធ្វើឱ្យបុរសនោះភ័យ ក៏លោតចុះពីដំបូលផ្ទះបណ្តាលឱ្យធ្លាក់មកដីរងរបួសធ្ងន់ ។ ឯក្រុមចោរនឹកស្មានថា បុរសនោះរត់ចេញក្រៅរួចក៏នាំគ្នាអូសយកម៉ូតូទាំង ២គ្រឿង និងប្រមូលយកគ្រឿងអលង្ការគេចខ្លួនបាត់ស្រមោល ។ ក្រោយពេលកើតហេតុបង្កឱ្យមានការភ្ញាក់ផ្អើលយ៉ាង ខ្លាំង និងមិននឹកស្មានដល់ថា ចោរត្រូវប៉ូលិសចាប់បាននោះទេ ។
ប្រភពព័ត៌មានពី ប្រជាពលរដ្ឋបានធ្វើការរិះគន់យ៉ាងចាស់ដៃចំពោះសមត្ថ កិច្ចប៉ូលិសខណ្ឌដង្កោ ដែលក្រោយពេលកើតហេតុភ្លាមៗប៉ូលិសមិនបានប្រកាសជាចំហ ដើម្បីឱ្យគោលដៅផ្សេងៗ ឬសមត្ថកិច្ចខណ្ឌជិតខាងជាប់ព្រំប្រទល់គ្នាជួយពួន ស្ទាក់ចាប់នោះទេ គឺស្ងាត់ឈឹងដែលពុំដឹងថា ប៉ូលិសខណ្ឌដង្កោបានដឹងភ្លាមៗដែរ ឬក៏ក្រោយពេលកើតហេតុរយៈពេលយូរទើបដឹងនោះទេ ។
ដោយឡែកក្រុមចោរពេលប្លន់បានហើយក៏ជិះ ម៉ូតូគេចខ្លួនចម្ងាយរាប់គីឡូម៉ែត្រផុតពីភូមិ សាស្ត្រខណ្ឌដង្កោ ឆ្លងចូលភូមិសាស្ត្រខណ្ឌពោធិ៍សែនជ័យបានដោយរលូន ។ លុះពេលទៅដល់ផ្លូវចូលវត្តតាំងក្រសាំងមុខព្រលានយន្តហោះ អន្តរជាតិភ្នំពេញ ត្រង់ចំណុចភូមិក្បាលដំរី សង្កាត់កាកាប ម៉ូតូដែលចោរប្លន់ជិះបុកម៉ូតូសេ១០០ កូរ៉េមួយគ្រឿងរបស់អ្នកដំណើរ ។
ប្រភពដដែលបន្តថា ខណៈនោះបានធ្វើឱ្យអ្នកជិះម៉ូតូសេ១០០កូរ៉េរងរបួស ធ្ងន់ធ្ងរ ។ ឯក្រុមចោរដែលជិះម៉ូតូប្លន់បានពីជនរងគ្រោះម៉ាក ឌ្រីមសេ១២៥ ស៊េរីឆ្នាំ២០០៨ ពណ៌ក្រហម រងរបួសស្រាល អាចដើរបានក៏នាំគ្នាក្រោកដើរចេញពីម៉ូតូដោយកាន់កាំ ភ្លើងអាកាកាត់ស្វាយ១ដើម ដែលច្រកក្នុងការុងពណ៌សទៅជាមួយផង ។ ពេលនោះពុំមាននរណាម្នាក់បានដឹងថា ជននោះគឺជាមុខសញ្ញាចោរដែលទើបប្លន់នៅផ្ទះលោក អ៊ុក សុវណ្ណា នោះទេ សូម្បីតែប៉ូលិសខណ្ឌពោធិ៍សែនជ័យក៏មិនបានដឹងដែរ ព្រោះមិនបានទទួលព័ត៌មានឱ្យជួយស្ទាក់ចាប់ពីប៉ូលិសខណ្ឌ ដង្កោទេ ។ ឯក្រុមចោរវិញ បានយកកាំភ្លើងនោះទៅបោះចោលឆ្ងាយពីកន្លែងគ្រោះ ថ្នាក់ចរាចរណ៍បន្តិច ហើយបក្សពួកម្នាក់បានដើរត្រឡប់ទៅបម្រុងយកម៉ូតូវិញ ឯជនផ្សេងទៀតគេចខ្លួន បាត់ ។ ខណៈពេលចោរនោះបម្រុងទៅយកម៉ូតូវិញ មានប្រជាពលរដ្ឋប្រាប់ថា បានឃើញជននោះបោះកាំភ្លើងចោល ទើបលោកវរសេនីយ៍ទោ ប៊ន សំអាត អធិការប៉ូលិសខណ្ឌពោធិ៍សែនជ័យបញ្ជាឱ្យកម្លាំងប៉ុស្តិ៍ កាកាប និងប៉ូលិសខណ្ឌធ្វើការឃាត់ខ្លួនបណ្តោះអាសន្ន ។
ប្រភពដដែលបន្តទៀតថា បន្ទាប់ពីចាប់ខ្លួនជននោះបានក៏ធ្វើការសួរនាំ ទើបធ្លាយរឿងប្លន់ក្នុងផ្ទះលោក អ៊ុក សុវណ្ណា ដែលដំណឹងនោះបង្កឱ្យមានការភ្ញាក់ផ្អើលយ៉ាងខ្លាំង ហើយលោកអធិការរូបនោះបានសួរនាំទៅសមត្ថកិច្ចខណ្ឌដង្កោ ទើបមានការប្រាប់មកវិញថា ពិតជាមានករណីចោរប្លន់ក្នុងផ្ទះមែន ។ ក្រោយមកប៉ូលិសខណ្ឌពោធិ៍សែនជ័យ បានស្រាវជ្រាវចាប់ខ្លួនបក្សពួកចោរម្នាក់ទៀត ពេលកំពុងដើរនៅជិតវត្តទួលសុភាឃួន ភូមិព្រៃទា សង្កាត់ចោមចៅ ។
ក្នុងប្រតិបត្តិការចាប់ខ្លួនចោរនោះ ប៉ូលិសខណ្ឌពោធិ៍សែនជ័យ ដកហូតបានកាំភ្លើងអាកាកាត់ស្វាយ១ដើម ម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០០៨ មួយគ្រឿង ព្រមទាំងគ្រឿងអលង្ការមួយចំនួន ។ ចំណែកគ្រឿងអលង្ការមួយចំនួនទៀត ត្រូវបក្សពួក២នាក់ទៀតជិះយកគេចខ្លួនបាត់ដោយ សុវត្ថិភាព ។ ប៉ូលិសខណ្ឌ ពោធិ៍សែនជ័យ កំពុងកសាងសំណុំរឿងបញ្ជូនជនសង្ស័យទៅតុលាការ និងស្វែងរកចាប់ខ្លួនបក្សពួកបន្តទៀត ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]