រាជធានីភ្នំពេញ ៖ សិស្សវិទ្យាល័យបឹងត្របែក និងវិទ្យាល័យព្រែកចំនួន៤នាក់បានត្រូវនគរបាលប៉ុស្តិ៍ច្បារអំពៅទី២ ខណ្ឌមានជ័យ ឃាត់ខ្លួននៅចំណុចភ្លើងស្តុបច្បារអំពៅ ស្ថិតនៅលើកំណាត់ផ្លូវជាតិលេខ១ សង្កាត់ច្បារអំពៅទី២ កាលពីវេលាម៉ោង១០ និង៣០នាទីព្រឹកថ្ងៃទី២០ មករា ។ សិស្សថ្នាក់វិទ្យាល័យដែលសមត្ថកិច្ចឃាត់ខ្លួន១-ឈ្មោះម៉ាក់ សំបូរ ភេទប្រុស អាយុ១៩ឆ្នាំ មានទីលំនៅសង្កាត់ចាក់អង្រែក្រោមខណ្ឌមានជ័យ ២-ឈ្មោះ រដ្ឋ ប៊ុនណា អាយុ១៧ឆ្នាំ មានទីលំនៅសង្កាត់ផ្សារដើមថ្កូវ ខណ្ឌចំការមន ៣-ឈ្មោះលី វិច្ឆិកា អាយុ១៩ឆ្នាំ មានទីលំនៅសង្កាត់ព្រែកឯង ខណ្ឌមានជ័យ ៤-ឈ្មោះវ៉ាន់ បញ្ញា អាយុ១៨ឆ្នាំ ស្នាក់នៅសង្កាត់ព្រែកឯង ខណ្ឌមានជ័យ ។ ខណៈពេលឃាត់ខ្លួនក្រុមយុវសិស្សទាំង៤នាក់នេះ សមត្ថកិច្ចបានដកហូតម៉ូតូ៣គ្រឿងពីក្រុមពួកគេ។ ក្នុងចំណោមយុវសិស្សទាំង៤នាក់នេះ ឈ្មោះម៉ាក់ សំបូរ បានរងរបួសបែកក្បាល និងរយះគុម្ពត្រចៀកហូរឈាមកក្លាក់។
តាមប្រភពព័ត៌មានជុំវិញការឃាត់ខ្លួនយុវសិស្សទាំង៤នាក់ខាងលើនេះ បើតាមប្រភពព័ត៌មានពីនគរបាលប៉ុស្តិ៍ច្បារអំពៅទី២ បានឱ្យដឹងថា មុនពេលសមត្ថកិច្ចឃាត់ខ្លួន គឺពួកគេបានជិះម៉ូតូដេញវាយតប់គ្នានៅតាមផ្លូវសាធារណៈ ហើយខ្លះបានប្រើដុំថ្មគប់គ្នា បណ្តាលឱ្យខ្ទាតទៅត្រូវកញ្ចក់លំនៅឋានប្រជាពលរដ្ឋ ទើបសមត្ថកិច្ចឈានទៅឃាត់ខ្លួនពួកគេតែម្តង ។ ក្រោយពេលឃាត់ខ្លួនសួរនាំហើយ សមត្ថកិច្ចបានបំភ្លឺថា ពួកគេទាំងអស់គ្នាទើបនឹងចេញពីមើលការប្រកួតបាល់ទះរវាងសិស្សវិទ្យាល័យព្រែកឯង និងសិស្សវិទ្យាល័យបឹងត្របែក ហើយលទ្ធផលក្រុមកីឡាករបាល់ទះវិទ្យាល័យព្រែកឯង ឈ្នះក្រុមកីឡាករបាល់ទះវិទ្យាល័យបឹងត្របែក ។ ផ្តើមចេញពីបញ្ហានេះ ពួកគេក៏តាមដេញវាយតប់គ្នាពេញដងផ្លូវ លុះដល់ចំណុចភ្លើងស្តុបច្បារអំពៅ ក៏មានរឿងហិង្សាធ្ងន់ធ្ងររហូតមានអ្នកខ្លះរបួសតែម្តង ។
បើតាមចម្លើយរបស់យុវសិស្សទាំង៤នាក់ខាងលើបាននិយាយថា ពួកគេអត់ដឹងថា មានរឿងអ្វីកើតឡើងឡើយ ស្រាប់តែមានគេដេញវាយតប់ និងគប់ដោយដុំថ្មប្រសាចពេញផ្លូវ
ដូច្នេះ ។ ទោះជាក្រុមយុវសិស្សទាំង៤នាក់នេះខំប្រឹងឆ្លើយដោះសាយករួចខ្លួនយ៉ាងណាក៏ដោយ ក៏សមត្ថកិច្ចបន្តឃាត់ខ្លួនសួរនាំរកហេតុផលពាក់ព័ន្ធនឹងក្រុមក្មេងទំនើងដែរ ។
សូមបញ្ជាក់ថា មួយរយៈមកនេះ ពិសេសគឺដើមឆ្នាំ២០១២តែម្តង ក្រុមក្មេងទំនើងបានបង្កបាតុភាពអនាធិបតេយ្យកើនឡើងគួរឱ្យកត់សម្គាល់នៅក្នុងរាជធានីភ្នំពេញ ពិសេសគឺនៅក្នុងប្លុកមជ្ឈមណ្ឌលកោះពេជ្រតែម្តង ។ ចំពោះបញ្ហានេះសមត្ថកិច្ចអាជ្ញាធរគ្រប់ជាន់ថ្នាក់គួរតែចាត់វិធានការឱ្យបានតឹងរ៉ឹងលើក្រុមក្មេងទំនើង ដើម្បីឆ្លើយតបតាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន ដែលបានដាក់បទបញ្ជាយ៉ាងម៉ឺងម៉ាត់ឱ្យលុបបំបាត់ដល់ប្ញសគល់នូវសមាសភាពក្មេងទំនើងក្នុងសង្គម ។
ដោយឡែកករណីខាងលើនេះ ប្រជាពលរដ្ឋរស់នៅច្បារអំពៅសូមកោតសរសើរចំពោះការដឹកនាំរបស់លោកគួច ចំរើន អភិបាលខណ្ឌមានជ័យ ក្នុងនាមជាប្រធានគណៈបញ្ជាការឯកភាពខណ្ឌដែលតែងក្រើនរំលឹកដល់មន្ត្រីសមត្ថកិច្ចក្រោមឱវាទឱ្យយកចិត្តទុកដាក់អំពីក្មេងទំនើង ហើយឈានទៅឃាត់ខ្លួនបានភ្លាមៗដូចករណីខាងលើជាដើម ៕
ដកស្រង់ ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]