ក្រុមចោរចូលប្លន់ ផ្ទះប្រជាពលរដ្ឋ យកទូរស័ព្ទ៤៨គ្រឿង

តាកែវៈ ក្រុមចោរប្រដាបដោយកាំភ្លើង មានគ្នាប្រមាណ ៥-៦នាក់ បានធ្វើសកម្មភាពចូលប្លន់ផ្ទះអ្នក បញ្ចូលអាគុយ និងជួសជុលទូរស័ព្ទ យកទូរស័ព្ទអស់ ៤៨គ្រឿង បាញ់គំរាម ៤គ្រាប់គេចខ្លួនដោយ សុវត្ថិភាព។

យោងតាមប្រភពពីនគរបាលព្រហ្មទណ្ឌកម្រិតធ្ងន់ ខេត្តតាកែវ បានឲ្យដឹងថា កាលពីវេលាម៉ោង ៩ និង ៥នាទីយប់ថ្ងៃទី១០ ខែឧសភា ឆ្នាំ២០១២ ក្រុមចោរមួយក្រុមបានធ្វើសកម្មភាពប្លន់ផ្ទះប្រជាពលរដ្ឋ នៅ ភូមិតាសូ ឃុំតាផេន ស្រុកត្រាំកក់ ខេត្តតាកែវ ដោយវាយម្ចាស់ផ្ទះឲ្យរងរបួសហើយយកទូរស័ព្ទអស់ចំនួន ៤៨គ្រឿង។ បន្ទាប់ពីយកទ័រស័ព្ទបានហើយក្រុមចោរបានបាញ់គំរាមចំនួន ៤គ្រាប់ ហើយគេចខ្លួនបាត់ ដោយសុវត្ថិភាព។

ក្រោយពេលកើតហេតុកម្លាំងសមត្ថកិច្ចបានចុះដល់កន្លែងកើតហេតុ ហើយនៅព្រឹកថ្ងៃទី១១ ខែឧសភា នេះ បាននឹងកំពុងស៊ើបអង្កេត និងសាកសួរជនរងគ្រោះ ដើម្បីកំណត់មុខសញ្ញាក្រុមជនល្មើសមកផ្តន្ទា ទោស៕

ដោយៈ ស៊ន សុភក្រ្ត

ផ្តល់សិទ្ធដោយ ដើមអម្ពិល