រាជធានីភ្នំពេញ ៖ រថយន្តម៉ាកឡែនរ៉ូវែរ និងរថយន្តម៉ាកមែរសឺដេសពណ៌ខ្មៅ ស៊េរីទំនើប ដែលចតនៅលើចិញ្ចើមផ្លូវជិតភ្លើងស្តុបបូកគោ ស្ថិតក្នុងខណ្ឌចំការមន រាជធានីភ្នំពេញ ត្រូវដើមឈើដួលរលំសង្កត់លើរងការខូចយ៉ាងដំណំ កាលពីវេលាម៉ោង៣ និង២៥នាទីរសៀលថ្ងៃទី៨ ឧសភា ២០១២ដោយសារសារតែភ្លៀងជញ្ជ្រុំ និងខ្យល់បក់បោករំលើងគល់ ។
សេចក្តីរាយការណ៍បានបញ្ជាក់ទៀតថា ខណៈពេលដែលភ្លៀងកំពុងបង្អុរនៅឡើយផ្លូវជាច្រើនកន្លែងក្នុងរាជធានីភ្នំពេញបាន ត្រូវទឹកភ្លៀងជន់លិចត្រឹមជង្គង់ កន្លែងខ្លះលិចដល់ភ្លៅមនុស្សចាស់ និងត្រឹមចង្កេះបង្កអោយមានការលំបាកយ៉ាងច្រើនដល់ប្រជាពលរដ្ឋក្នុង ការធ្វើដំណើរ និងកកស្ទះចរាចរណ៍ ម៉ូតូខ្លះទឹកចូលក្នុងម៉ាស៊ីនម៉ូតូ រលត់ម៉ាស៊ីន បណ្តើរលុយទឹក គួរឱ្យសៅហ្មង ។
នៅក្នុងទឹកដីខណ្ឌសែនសុខ, ទួលគោក និង ដូនពេញ ក៏មានដើមឈើរលំ និងលិចផ្លូវជាច្រើន កន្លែងផងដែរ ប៉ុន្តែខណៈពេលនេះ អាជ្ញាធរមូលដ្ឋានកំពុងប្រឹងប្រែងបូមទឹកចេញពីកន្លែង លិច យ៉ាងញាប់ដៃ ញាប់ជើង ដោយប្រើម៉ាស៊ីនបូមទឹកច្រើនគ្រឿង ។ គួរបញ្ជាក់ថា កន្លងមក អាជ្ញាធររាជធានីភ្នំពេញ បានខិតខំប្រឹងប្រែងផ្លាស់ប្តូរប្រព័ន្ធលូពីតូចទៅធំ ច្រើនកន្លែងផង ដែរ ជាពិសេសក្នុងខណ្ឌដូនពេញតែម្តង ប៉ុន្តែទឹកនៅតែលិចដោយសារធ្លាក់ភ្លៀងគំហុកខ្លាំង ប្រព័ន្ធលូហូរទឹកមិនទាន់ ។ ទោះជាយ៉ាងណាក៏ដោយ គេសង្កេតឃើញកន្លែងដែលលិចទឹកខ្លាំងនៅសង្កាត់ផ្សារកណ្តាល១ ក្នុងរយៈពេលជាង១ម៉ោងក្រោយមកបានស្រក់អស់ទៅវិញ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]