រាជធានីភ្នំពេញ ៖ គ្រាន់តែគ្រោះថ្នាក់ចរាចរណ៍ប៉ះគ្នាមិនបន្តិចបន្តួច អាងមានកាំភ្លើង ហើយទំនងជាស្រវឹងផងនោះ បានដកកាំភ្លើងគំរាមតេត្រូវគេវាយតបវិញឡើងទ្រមខ្លួនរត់ឡើងម៉ូតូឌុបទៅមន្ទីរពេទ្យដោយខ្លួនឯង។ ហេតុការណ៍នេះកើតឡើងនៅមុខភោជនីយដ្ឋានតោកៃ តាមបណ្ដោយមហាវិថីព្រះមុនីវង្សកែង២៨៨ ក្នុងសង្កាត់បឹងកេងកងទី២ ខណ្ឌចំការមន កាលពីវេលាម៉ោង២និង២០នាទីរំលងអធ្រាត្រ ឈានចូលថ្ងៃទី១៩ មករា ។
សាក្សីឃើញហេតុការណ៍បានឱ្យដឹងថា មុនពេលកើតហេតុ គេឃើញរថយន្ដការមីគូទហើម ពណ៌សំបកឪឡឹកបើកតាមមហាវិថីព្រះមុនីវង្ស ក្នុងទិសដៅពីត្បូងទៅជើង ចំណែកម៉ូតូធុនធំ ពណ៌ក្រហមបើកពីជើងទៅត្បូងដល់កន្លែងកើតហេតុត្រង់ផ្លូវកែង២៨៨ ខណៈរថយន្ដបត់ឆ្វេងស្រាប់តែម៉ូតូក៏បើកទៅដល់បុកគ្នាផាំងលាន់ដូចរន្ទះដួលប្រាវ ហើយជនរងគ្រោះដែលបើកម៉ូតូរបួសក្បាល ឯម៉ូតូខូចខាងយ៉ាងដំណំ ចំណែករថយន្ដធ្លាក់កាងមុខ។ ពេលនោះជនរងគ្រោះមានមិត្ដភក្ដិជិះម៉ូតូ២គ្រឿងទៀតមកពីក្រោយ ។ ប្រភពព័ត៌មានឱ្យដឹងទៀតថា ភាគីទាំងសងខាងសុទ្ធតែស្រវឹង បន្ទាប់ពីបុកគ្នាហើយ ស្រាប់តែអ្នកបើកបររថយន្ដបើកទ្វាររថយន្ដចុះមកបានដកកាំភ្លើងសម្លុតជនរងគ្រោះថាបើកម៉ូតូអត់ចេះមើលរថយន្ដបត់ ចំណែកជនរងគ្រោះបានសុំទោសម្ចាស់រថយន្ដវិញ។ សមត្ថកិច្ចដែលប្រចាំការនៅតំបន់នោះបានចូលទៅអន្ដរាគមន៍ និងដកយកកាំភ្លើងពីម្ចាស់រថយន្ដទុក។ ស្របពេលនោះមិត្ដភក្ដិរបស់ជនរងគ្រោះបានជួយគ្រាហ៍ជនរងគ្រោះទៅចិញ្ចើមផ្លូវហើយបានទូរស័ព្ទហៅបងប្អូនទៅជួយអន្ដរាគមន៍។ មួយសន្ទុះក្រោយមកបងប្អូនជនរងគ្រោះប្រដាប់ដោយវិទ្យុទាក់ទងនិងកាំភ្លើងផងដែរបានទៅដល់កន្លែងកើតហេតុ ។ គ្រាន់តែឃើញបងប្អូនទៅដល់ភ្លាមជនរងគ្រោះបានស្ទុះទៅវាយម្ចាស់រថយន្ដ បើទោះគរបាលហាមឃាត់ម្ចាស់រថយន្ដទ្រមខ្លួនរត់ឡើងជិះម៉ូតូឌុបទៅមន្ទីរពេទ្យដោយខ្លួន។ ចំណែកជនរងគ្រោះនិងបក្សពួកបាននាំគ្នាឡើងជិះរថយន្ដត្រឡប់ទៅវិញអស់។
ដោយឡែកម៉ូតូនិងរថយន្ដរបស់ភាគីទាំងពីរត្រូវសមត្ថកិច្ចយកទៅរក្សាទុកនៅការិយាល័យនគរបាលចរាចរជើងគោកដើម្បីធ្វើការដោះស្រាយបន្ដទៀត៕
ដកស្រង់ ពីគេហទំព័រកោះសន្តិភាព
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]