ខេត្តកោះកុង ៖ លោកអ្នកអានបានទស្សនាឈុតសាហាវនេះ ប្រាកដជាក្តុកក្តួលរន្ធត់ក្នុងចិត្តខ្លាំងណាស់ ព្រមទាំង មិនគាំទ្រនូវបុគ្គលមួយក្រុមនេះឡើយ ។ ទុកឱ្យច្បាប់ដោះស្រាយតាមការ គួរទៅចុះ ដើម្បីឱ្យរាងចាលក្នុងជីវិតរបស់គាត់ដែលធ្លាប់រស់នៅយ៉ាង ខ្ពង់ខ្ពស់ និងបរិបូរណ៍គ្រប់វិស័យ មិនគួរប្រព្រឹត្តអំពើដែល មនុស្សជាតិស្អប់ខ្ពើមបែបនេះឡើយ ។ គួរកត់សម្គាល់ថា អ្នកដែលត្រូវគេ វាយទាត់ធាក់ គឺជាជនដែលគ្មានកំហុសសោះ ។
ឥឡូវមន្ត្រីយោធាផ្កាយ២មួយរូបនេះ ត្រូវ គេ ស្គាល់ថា ជើងខ្លាំងរកស៊ី... នៅខេត្តព្រះវិហារ និងអង្គរក្ស៣នាក់ ត្រូវបានចៅក្រមសាលាដំបូងខេត្តកោះកុងលោកខាំ សុផារី ចេញដីកា បង្គាប់ឱ្យឃុំខ្លួនបណ្តោះអាសន្ននៅពន្ធនាគារកាលពីរសៀលថ្ងៃទី ២៥ មេសា ២០១២ បន្ទាប់ពីលោកផ្កាយ២ម្នាក់នេះ និងអង្គរក្សច្រើននាក់ វាយដំច្រំធាក់ទៅលើបុរស៤នាក់ ព្រមទាំងយកដំបងអគ្គិសនីមកឆក់សាហាវព្រៃផ្សៃ ដោយសាររឿងទៅគោះ ទ្វារបន្ទប់សណ្ឋាគារប្រពន្ធរបស់គាត់ស្នាក់នៅ ហើយសួររកខ្សែ.ក ដែលបាត់ កាលពួកគេ (ជនរងគ្រោះ) ស្នាក់នៅបន្ទប់សណ្ឋាគារនេះមុន ភរិយាលោកផ្កាយ២ចូលស្នាក់បន្ត (ភ្ញៀវមុនបាត់ខ្សែ.ក) ។
លោកផ្កាយ២ ដែលកាចសាហាវជាងសត្វខ្លា និង តោនេះ ឈ្មោះប៊ុន សុខា អាយុ៣៨ឆ្នាំ អតីតជំនួយការសសម្តេចនាយករដ្ឋ មន្ត្រី និងជានាយរងសេនាធិការ កងអង្គរក្ស , ចំណែកបរិវារ៣នាក់ ទៀតឈ្មោះស៊ុំ វាសនា អាយុ៣៧ឆ្នាំ, ម៉េង ឈាងលី អាយុ២១ឆ្នាំ អ្នកទាំង២ ជាអង្គរក្សលោកផ្កាយ២ផ្ទាល់ និងឈ្មោះស៊ុំ ឆាយា អាយុ២៥ឆ្នាំ ជាអ្នក បើកបរជូនលោកផ្កាយ២... បច្ចុប្បន្នពួកគេទាំង៤នាក់ កំពុងដេក និង សម្រាកក្នុងគុកនៅខេត្តកោះកុង ។
ចំណែកភរិយាលោកផ្កាយ២ឈ្មោះឡុង គឹមណាំ អាយុ៣៣ឆ្នាំ ។ ដើមចមនៃរឿងហិង្សាឃោរឃៅនេះ គឺពួកជនរងគ្រោះមាន សន្តិសុខសណ្ឋាគារបានទៅគោះទ្វារភរិយាលោកផ្កាយ២ ... សុំចូលទៅ រកខ្សែ.កដែលបាត់ ឬភ្លេច ក្នុងនោះ មួយលើកជសាពីរលើក ធ្វើឱ្យ ភរិយារបស់លោកផ្កាយ២ ប៊ុន សុខា ខឹងតូង ទូរស័ព្ទទៅប្រាប់ប្តី អំពីរឿងហេតុ ទើបប្តីនិងអង្គរក្សមកដល់ ចាប់ពួកជនរងគ្រោះវាយទាត់ ធាក់ វាយដំច្រំ ធាក់ ឃោរឃៅតែម្តង ។
តាមមតិ អ្នកតាមដានសាច់រឿងហិង្សានេះ បាន លើកឡើងថា លោកស្រីភរិយាលោកផ្កាយ២ គួរត្រូវចាប់យកទៅសម្រាក ក្នុងគុកដែរ ទើបសម ព្រោះរឿងហេតុផ្តើមចេញពីគាត់ បើពិតមែនតែ គាត់ មិនបានវាយដំទៅលើជនរងគ្រោះក៏ដោយ ក៏គាត់ជាប់ពាក់ព័ន្ធសមគំនិត ដែរ ដោយហេតុថា មិនដឹងជាគាត់និយាយញុះញង់ប្តីរបស់គាត់ (លោកផ្កាយ២) យ៉ាងម៉េច? ទើបធ្វើឱ្យលោកប៊ុន សុខា ផ្កាយ២ ពុះពោរកញ្ជ្រោលទៅដោយ ហិង្សា វាយទាត់ធាក់ស្រេចចិត្តបែបនេះ... មិនតែប៉ុណ្ណោះ បើមើល តាមរូបភាពវីដេអូឃ្លីបវិញ ឃើញភរិយាលោកផ្កាយ២រូបនេះ ចង្អុល ជនរងគ្រោះមុខក្រោយចុះឡើង ហាក់ដូចពន្យុះប្តីថែម... ដូច្នេះត្រូវឃាត់ ខ្លួនពីបទសមគំនិត ទើបត្រឹមត្រូវ ។
រឿងហេតុវាយដំច្រំធាក់ទៅលើបុរស៤នាក់ ក្នុងនោះមានមន្ត្រីប៉េអឹម និងសន្តិសុខសណ្ឋាគារផងនោះ បានកើតឡើងកាលពីវេលាម៉ោង១១និង ៤០នាទីយប់ថ្ងៃទី២២ មេសា ២០១២ ហើយនៅយប់ដដែលនោះលោកផ្កាយ២ ប៊ុន សុខា បានចាប់បុរស៤នាក់ ដែលខ្លួនសង្ស័យថា មានគម្រោងមិនស្រួលនោះប្រគល់ជូនប៉ូលិស ។ លុះព្រឹកឡើងថ្ងៃទី២៣ មេសា ២០១២ បុរស៤នាក់បានដាក់ពាក្យបណ្តឹងទៅកាន់ការិយាល័យព្រហ្មទណ្ឌនៃ ស្នងការដ្ឋាននគរបាលខេត្តកោះកុង ចោទប្រកាន់ពីបទធ្វើទារុណកម្ម ឬប៉ុនប៉ងមនុស្សឃាត ដោយមានរូប ភាពខ្សែអាត់វីដេអូ (វីដេអូឃ្លីប) ជាភស្តុតាងបញ្ជាក់ពីសកម្មភាពវាយដំច្រំធាក់ផងដែរ ។
ថ្ងៃទី២៤ មេសា ២០១២ ប៉ូលិសព្រហ្មទណ្ឌខេត្តកោះកុង បានហៅលោកផ្កាយ២ ដែលនាំភរិយាទៅវិស្សមកាលនៅខេត្តកោះកុងនោះ ទៅសាកសួរជុំវិញរឿងវាយដំច្រំធាក់ព្រៃផ្សៃ ដោយប៉ូលិសសំអាងទៅលើភស្តុតាងខ្សែអាត់វីដេអូរបស់សណ្ឋាគារដែល មើលទៅឃើញសកម្មភាពវាយដំច្រំធាក់សាហាវគួរឱ្យញាក់សាច់ ។ រហូតដល់ថ្ងៃទី២៥ មេសា ២០១២ វេលារសៀលបន្តិចទៅហើយ ចៅក្រម សាលាដំបូងខេត្តកោះកុងរិះរកមធ្យោបាយជួយលោកផ្កាយ២ មិនបាន ដោយសារតែឃើញខ្សែអាត់វីដេអូបង្ហាញពីសកម្មភាពវាយដំ ច្រំធាក់ព្រៃផ្សៃជាក់ស្តែងពេកក៏សម្រេចចេញដីកាបង្គាប់ឱ្យឃុំ ខ្លួនលោកផ្កាយ២ បណ្តោះអាសន្ននៅពន្ធនាគារតែម្តង ។
តាមប្រភពព័ត៌មានពីមន្ត្រីស្និទ្ធនឹងលោក ផ្កាយ២ ប៊ុន សុខា បានឱ្យដឹងថា ភ្លាមៗនោះលោកផ្កាយ២ បានសុំខាង តុលាការតម្កល់ប្រាក់រាប់សិបម៉ឺនដុល្លារ ដើម្បីបាននៅក្រៅឃុំ ប៉ុន្តែខាងតុលាការជួយមិនបាន ។ មិនតែប៉ុណ្ណោះ ខាងលោកផ្កាយ២ បានទៅនិយាយសុំផ្តល់សំណងដល់ជនរងគ្រោះទាំង៤ ក្នុងម្នាក់ៗ ១៥.០០០ដុល្លារ ដើម្បីបញ្ចប់រឿង ប៉ុន្តែខាងជនរងគ្រោះមិនព្រម ដោយទុកឱ្យច្បាប់ចាត់ការ ។
មកដល់ថ្មីៗនេះទៀត តាមប្រភពមួយចំនួន បានឱ្យ ដឹងថា បក្សពួកក្រុមគ្រួសាររបស់លោកផ្កាយ២ប៊ុន សុខា កំពុងរវល់ ញាប់ដៃញាប់ជើង រត់ការធ្វើយ៉ាងណាសុំឱ្យលោកផ្កាយ២រូបនេះ រស់នៅក្រៅឃុំ ប៉ុន្តែមិនទាន់មានលទ្ធផលវិជ្ជមានសម្រាប់លោក ផ្កាយ២នៅឡើយ ។ ក្រុមអ្នកច្បាប់លើកឡើងថា ទោះតម្លៃណាក៏ដោយ មិនត្រូវឱ្យមនុស្សសាហាវដូចលោកផ្កាយ២ ប៊ុន សុខា ស្ថិតនៅក្រៅឃុំ នោះទេ ព្រោះដូចជាលែងខ្លាឱ្យចូលព្រៃ... ម្យ៉ាងធ្វើបែបនោះ ហាក់ ផ្តល់ឱកាសឱ្យគាត់បង្កើនឥទ្ធិពលគំរាមជនរងគ្រោះ តាមរូបភាពណាមួយ ព្រោះគាត់ជាមនុស្សសាហាវស្រាប់ ។
កោះសន្តិភាពនឹងតាមដានការប្រែប្រួលនៃសំណុំ រឿងអំពើឃោរឃៅរបស់លោកផ្កាយ២ ប៊ុន សុខា នេះ រហូតដល់ទីបញ្ចប់ និងផ្សាយជូន នៅពេលក្រោយៗទៀត ... ៕
ដោយ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
