ខេត្តកំពង់ស្ពឺ ៖ ទីបំផុត ការភ្ញាក់ផ្អើលពីបុរសជនជាតិបារាំង និងកូនៗ៤នាក់ដែលបានបាត់ខ្លួនពីផ្ទះរបស់ខ្លួនដោយគ្មានពន្លឺ និងងងឹតសូន្យសុងនោះបានក្លាយជារឿងគួរឱ្យរន្ធត់មួយនៅក្នុងរយៈពេលជាង៣ខែក្រោយមក ដោយសារតែពួកគេមិនបានបាត់ទៅណានោះទេ តែឪពុក-កូនទាំងអស់បានស្លាប់ក្នុងរថយន្តពន្លិចក្នុងទឹកស្រះ ដែលមានជម្រៅប្រមាណ៣ទៅ៤ម៉ែត្រនៅក្បែរលំនៅឋានរបស់ខ្លួនក្នុងភូមិទួលធ្នង់ សង្កាត់កាធំ ក្រុងច្បារមន។ ការឆោឡោពីការប្រទះឃើញសពបុរសជនជាតិបារាំង និងកូនៗរបស់ខ្លួន៤នាក់នៅក្នុងរថយន្តពន្លិចទឹកនេះ បានកើតមានកាលពីថ្ងៃទី១៤ មករា ។
ជាមួយនឹងព័ត៌មានពីការប្រទះឃើញសពនៅក្នុងរថយន្តទាំងឪពុក និងកូននេះ នៅថ្ងៃដដែលស្ថានទូតបារាំងប្រចាំនៅកម្ពុុជា ក៏បានប្រកាសថា ស្ថានទូតបារាំងត្រូវបានផ្តល់ដំណឹងដោយនគរបាលកម្ពុជា អំពីការរកឃើញរថយន្តរបស់ពលរដ្ឋបារាំងម្នាក់រស់នៅកម្ពុជា គឺលោកវ៉ាលីយេ ព្រមទាំងគ្រោងឆ្អឹងមនុស្សទាំង៥នាក់នៅក្នុងរថយន្តនោះ។ ការប្រកាសរបស់ស្ថានទូតបារាំងដដែល បានបង្ហាញពីជំហររបស់ស្ថានទូតជុំវិញហេតុការណ៍ដ៏រន្ធត់នេះថា នៅក្នុងស្ថានភាពបច្ចុប្បន្នគេមិនទាន់អាចសន្និដ្ឋានបានថា សាកសពទាំងនោះគឺជាសាកសពរបស់លោកវ៉ាលីយេ និងកូនៗរបស់គាត់បានទេ។ ស្ថានទូតកំពុងបន្តធ្វើការទាក់ទងជាប់ជានិច្ចជាមួយនគរបាលយុត្តិធម៌កម្ពុជា ដើម្បីកំណត់អត្តសញ្ញាណរបស់់សាកសព។
នេះគឺជាសោកនាដកម្មដ៏ជូរចត់មួយដែលបានកើតឡើងនៅក្នុងរង្វង់គ្រួសាររបស់ជនជាតិបារាំងលោកឡូរ៉ង់ វ៉ាលីយេ ក្នុងនោះមានទាំងកូន៤នាក់ផង សរុបចំនួន៥នាក់ ដោយពុំមាននរណាម្នាក់អាចមានជីវិតគេចផុតពីសេចក្តីស្លាប់ឡើយ និងជាការសម្លាប់ផ្តាច់ពូជតែម្តង ។ ការប្រទះឃើញសាកសពបានកើតឡើងនាព្រឹកថ្ងៃទី១៤ មករា នៅក្នុងភូមិទួលធ្នង់ សង្កាត់រកាធំ ក្រុងច្បារមន បន្ទាប់ពីគ្រួសារបារាំងនេះបានបាត់ខ្លួនតាំងពីថ្ងៃទី១៤ កញ្ញា ឆ្នាំ២០១១។ អ្នកភូមិទួលធ្នង់ម្នាក់បានដើរទៅទាក់លលកនៅក្បែររបងខាងលិចផ្ទះបារាំង ក្បែរត្រពាំងទឹកដែលជីកក្នុងដីឡូត៍កម្មសិទ្ធិបុរសជនជាតិបារាំងនោះដែលមានទំហំ១០ម៉ែត្រគុណ៣០ម៉ែត្រ និងជម្រៅប្រមាណពី៣ម៉ែត្រទៅ៤ម៉ែត្រ ។ ដោយសារទឹកត្រពាំងខែប្រាំងបានរីង ក៏លេចចេញដំបូលរថយន្តលើផ្ទៃទឹកប្រមាណ២តឹក ផ្នែកខាងក្រោយ ទើបអ្នកទាក់លលកនោះរត់ទៅប្រាប់សមត្ថកិច្ចសង្កាត់រកាធំ នៅរសៀលម៉ោង៧និង១០នាទីព្រឹក។
ពេលផ្អើលឈូឆរនោះសមត្ថកិច្ចដែលមានស្នងការនគរបាលខេត្ត បញ្ជាការកងរាជអាវុធហត្ថខេត្ត អ្នកបច្ចេកទេសវិទ្យាសាស្ត្រ នាយកដ្ឋានសន្តិសុខផ្ទៃក្នុង មេធាវី ពិសេសតំណាងឱ្យស្ថានទូតបារាំង បានចុះសើុបអង្កេតផ្ទាល់នៅពេលស្ទូចរថយន្តឡើងលើគោក។ ខណៈនោះបានយកម៉ាសីូនបូមទឹកចំនួន៥គ្រឿងមកបូមរហូតដល់ម៉ោង២និង៣០នាទីរសៀល ទើបសម្រេច បើកទ្វាររថយន្តម៉ាក Nissan-PATROL ពណ៌ស ជាកម្មសិទ្ធិរបស់ជនជាតិបារាំងឈ្មោះឡូរ៉ង់ វ៉ាលីយេ។ ជនជាតិបារាំងរូបនេះ បានយកប្រពន្ធខ្មែរតែជាអកុសលក្រោយពីសម្រាលកូនទី៤រួចក៏ស្លាប់ ។ តាំងពីប្រពន្ធស្លាប់ចោលទៅ បុរសជនជាតិបារាំងរូបនេះក៏ស្ថិតនៅជាបុរសពោះម៉ាយចិញ្ចឹមកូនរបស់ខ្លួនទាំង៤នាក់ ដែលមាន ១-ឈ្មោះឈួន យ័ន្ត ភេទប្រុស អាយុ១១ឆ្នាំ ២-ឈ្មោះឈួន រស្មី ភេទស្រី អាយុ៨ឆ្នាំ ៣-ឈ្មោះឈួន ស្រីវ៉ាន់ ភេទស្រី អាយុ៦ឆ្នាំ និង៤-ឈ្មោះឈួន មីកាអែល ភេទប្រុស អាយុ១ឆ្នាំ ។
ការបាត់ខ្លួនគ្រួសារជនជាតិបារាំងនេះ ត្រូវបានឪពុកម្តាយក្មេកនៅឯខេត្តព្រៃវែង រួមទាំងប្រជាពលរដ្ឋក្នុងភូមិទួលធ្នង់ និយាយថា បាត់តាំងពីថ្ងៃទី១៤ កញ្ញា ឆ្នាំ២០១១ គឺតាំងពីថ្ងៃបុណ្យភ្ជុំបិណ្ឌមកម៉្លេះ ហើយសមត្ថកិច្ចបានចុះត្រួតពិនិត្យចំនួនពីរលើករួចមកហើយ គឺនៅពីថ្ងៃទី២៨ វិច្ឆិកា ឆ្នាំ២០១១ ម្តង និងថ្ងៃ៥ មករា ឆ្នាំ២០១២ ម្តង ដោយធ្វើការឆែកឆេរក្នុងផ្ទះ តែគ្មានពន្លឺថា ពួកគេនៅទីណានោះទេ។
ការត្រួតពិនិត្យក្រោយពេលរថយន្តត្រូវបានស្ទូចចេញពីក្នុងត្រពាំង ទើបដឹងថា មានសាកសពរលួយស្អុយទៅហើយ ។ នៅក្នុងរថយន្តមានវ៉ាលីសចំនួនពីរ ដែលវ៉ាលីសធុនមធ្យមមួយដាក់ក្បាលបុរសជាតិជាតិបារាំងឡូរ៉ង់ វា៉លីស ឯដងខ្លួនស្ថិតនៅលើពូករថយន្តខាងមុខ រលួយវ៉ល់ដូចគេជ្រំប្រហុក ។ ទាក់ទិននឹងការប្រទះឃើញសពទាំងគ្រួសារត្រូវបានសន្និដ្ឋានថា ជាករណីមនុស្សឃាត ព្រោះជនដៃដល់បានកាត់ក្បាលច្រកវ៉ាលីស ឯដងខ្លួននៅកន្លែងផ្សេង ។ ទោះបីជាបែបណា ក៏សមត្ថកិច្ចដែលធ្វើការត្រួតពិនិត្យរួមទាំងតំណាងស្ថានទូតបារាំងដែលចូលរួមផង ពុំទាន់អះអាងថា ជាអំពើអត្តឃាត ឬមនុស្សឃាតដោយគំនុំ ឬប្លន់នៅឡើយទេ ។
ការត្រួតពិនិត្យចាប់ពីម៉ោង២ និង៣០នាទីរសៀលរហូតមកដល់ម៉ោង៤រសៀលថ្ងៃដដែលពុំទាន់ចប់ ហើយសមត្ថកិច្ចក៏ពុំទាន់អាចបំភ្លឺករណីស្លាប់យ៉ាងអាណោចអាធ័មរបស់គ្រួសារជនជាតិបារាំងនេះ នៅឡើយដែរ។ ក្នុងការពិនិត្យនោះ ក៏មានវត្តមានឪពុកក្មេកម្តាយក្មេកជនជាតិបារាំងរូបនេះមកពីខេត្តព្រៃវែង យំយែកដោយការសោកស្តាយចំពោះសពកូនប្រសា និងចៅជាទីស្រឡាញ់ទាំង៤នាក់របស់ពួកគាត់ ។ ករណីសម្លាប់គួរឱ្យភ្ញាក់ផ្អើលនេះ មិនទាន់មានការបំភ្លឺឱ្យបានឱ្យច្បាស់លាស់នោះទេ ហើយសមត្ថកិច្ចពុំទាន់បានផ្តល់ព័ត៌មានដល់អ្នកកាសែតឡើយ តែប្រជាពលរដ្ឋក្នុងភូមិដែលធ្លាប់ស្រឡាញ់រាប់អានគ្រួសារជនជាតិបារាំងនេះបានចូលរួមមរណៈទុក្ខនេះដោយគ្រៀមក្រំ ។
លោកទិត ឈួន អាយុ៦៩ឆ្នាំ និងភរិយាឈ្មោះស សាវី អាយុ៤២ឆ្នាំ ដែលជាឪពុក ម្តាយក្មេកលោកវ៉ាលីយេ រស់នៅភូមិព្នៅ ឃុំជ្រៃស្រុកកំពង់ត្របែក ខេត្តព្រៃវែង បានប្រាប់កោះសន្តិភាពថា បន្ទាប់ពីទទួលព័ត៌មានថា កូនប្រសា និងពួកចៅៗបាត់ខ្លួនពីផ្ទះ គាត់ក៏តាមស្វែងរកដែរ ដោយព្យាយាមមកសួរអ្នកភូមិ ប្រធានភូមិបានចម្លើយមកថា អត់មាននរណាបានដឹងនោះទេ ។ គាត់បន្តថា គាត់បានសុំចូលមើលក្នុងផ្ទះតែប៉ូលិសមិនឱ្យចូលជាដាច់ខាត ។ គាត់ក៏បានចូលសួរដល់ស្ថានទូត៣លើកនៅតែគ្មានដំណឹង គ្រាន់តែប្រាប់ថា កូនប្រសាគាត់និងកូនៗមិនបានចេញក្រៅប្រទេសកម្ពុជានោះទេ ។
ហេតុការណ៍ប្រទះឃើញសាកសពបុរសជនជាតិបារាំង និងកូនៗនេះមិនមែនធ្វើឱ្យមានការភ្ញាក់ផ្អើលតែក្នុងប្រទេសកម្ពុជានោះទេ តែក៏បានក្លាយជារឿងរ៉ាវមួយដែលត្រូវចាប់អារម្មណ៍សម្រាប់សាធារណជនបារាំងផងដែរ ។ តាមការសន្និដ្ឋាន ការសម្លាប់នេះហាក់បានធ្វើឡើងដោយមនុស្សស្គាល់គ្នា ព្រោះសូម្បីតែជីវិតកូនក្មេងក៏ក្រុមឃាតកមិនទុកជីវិតដែរ មានន័យថា បង្កឡើងដោយមនុស្សស្គាល់នេះឯង ។
មេភូមិទួលធ្នង់ បានរៀបរាប់ឱ្យដឹងថា បុរសពោះម៉ាយជាជនជាតិបារាំងនេះ មានប្រពន្ធជាស្ត្រីខ្មែរ និងមានកូន៤នាក់ក្នុងបន្ទុក តែពុំមានអ្នកណាដឹងថា គាត់មានមុខរបរអ្វីពិតប្រាកដនោះទេ។ គាត់រស់នៅក្នុងភូមិទួលធ្នង់ ចំនួនជាង២ឆ្នាំមកហើយ ដោយបានទិញផ្ទះ និងដីពីរកន្លែងនៅភូមិទួលធ្នង់ពីស្ត្រីឈ្មោះគីម សុភា ហៅខូច ជាស្ត្រីខ្មែរដែលបានយកប្តីបារាំងដែរ ឈ្មោះមីសែល និងមានមុខរបរដាំបន្លែ។
លោកមេភូមិឱ្យដឹងទៀតថា ផ្ទះទី១ ធ្វើពីឈើប្រក់ហ្វ៊ីប្រូស៊ីម៉ង់ត៍និងខាងក្រោមចាក់បេតុងក្រាលឥដ្ឋការ៉ូ និងផ្ទះទី២ ជាផ្ទះល្វែងពីរជាន់ធ្វើអំពីឥដ្ឋថ្មប្រក់ក្បឿង។ ក្រោយពីបុរសបារាំងឈ្មោះមីសែល ជាអ្នកដាំបន្លែស្លាប់ដោយគ្រោះថ្នាក់ចរាចរណ៍ ប្រពន្ធខ្មែរនេះក៏លក់បន្តឱ្យបុរសបារាំងឈ្មោះវ៉ាលីយេ ដែលមានប្រពន្ធជាស្ត្រីខ្មែរដែរ ឈ្មោះលួន ស៊ីណា ហៅច្រឹប តែក្រោយមកនាងលួន ស៊ីណា ហៅច្រឹបក៏បានស្លាប់ក្នុងមន្ទីរពេទ្យខេត្ត ពេលសម្រាលកូនទី៤ ។ ចាប់ពីពេលនោះមកលោកវ៉ាលីយេក៏ក្លាយជាបុរសពោះម៉ាយ រស់នៅជាមួយកូន៤នាក់ (ក្នុងនោះប្រុស២) នៅលើលំនៅឋាននេះ ។
អ្នកភូមិទួលធ្នង់ និយាយថា មុនថ្ងៃកាន់បិណ្ឌជនជាតិបារាំងនេះនៅចេញចូលផ្ទះនៅឡើយ លុះនៅថ្ងៃបិណ្ឌទី១ ទី២ ក៏ស្រាប់តែបាត់មុខរហូតរួមទាំងកូនៗផង ឯទ្វាររបងក៏បិទជិត ហើយផ្ទះចាក់សោជាប់ទៀត ៕
ដកស្រង់ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
