រាជធានីភ្នំពេញ ៖ ករណីគ្រោះថ្នាក់ចរាចររវាងម៉ូតូនិងម៉ូតូបុកគ្នាគំរាមទាមទារឱ្យសងរបៀបចង់កៀបស៊ីអាងយប់ស្ងាត់ លុះឃើញប្រជាពលរដ្ឋទៅចោមរោមមើលយកទូរស័ព្ទដៃនិងសោម៉ូតូជិះចេញទៅបាត់។ ហេតុការណ៍នេះកើតឡើងកាលពីវេលាម៉ោង១និង១០នាទីរំលងអធ្រាត្រថ្ងៃទី១៥ មករា តាមមហាវិថីព្រះមុនីរ៉េត ជាប់របងវត្ដនន្នមុនីក្នុងសង្កាត់ស្ទឹងមានជ័យ ខណ្ឌមានជ័យ។
ប្រភពព័ត៌មានពីជនរងគ្រោះឈ្មោះណែម ប៊ុណ្ណា អាយុ២៣ឆ្នាំ ស្នាក់នៅផ្ទះជួលសង្កាត់ព្រែកលៀប ខណ្ឌឫស្សីកែវ បានឱ្យដឹងថា មុនពេលកើតហេតុរូបគេជិះម៉ូតូម៉ាកអ៊ែរព្លែក ពណ៌ខ្មៅ ក្នុងបំណងទៅលេងផ្ទះបងនៅជិតរោងចក្រកាណាឌីយ៉ា។ លុះពេលទៅដល់អត់ជួបបងក៏ជិះម៉ូតូត្រឡប់ទៅកន្លែងស្នាក់នៅវិញ ខណៈដល់ចំណុចកើតហេតុខាងលើ ស្រាប់តែមានម៉ូតូសេ១២៥ ពណ៌ខ្មៅ ជិះគ្នា៣នាក់អត់បើកភ្លើងទេ ក្នុងទិសដៅបញ្ច្រាសគ្នាបានបុកម៉ូតូខ្លួនពេញទំហឹងតែម្ដង បណ្ដាលឱ្យដួលបែកមុខបែកមាត់និងបាក់ក្បាំងម៉ូតូ។ បុរសរងគ្រោះបន្ដទៀតថា បន្ទាប់ពីបុកគ្នាហើយមានម៉ូតូ១គ្រឿងទៀតជិះគ្នា៣នាក់ជាមិត្ដភក្ដិរបស់ជនបង្កបាននាំគ្នាទៅលើកម៉ូតូទាំងពីរគ្រឿងដែលដួលនៅកណ្ដាលថ្នល់យកទៅចិញ្ចើមថ្នល់ជាកន្លែងងងឹតហើយ បានទះកំផ្លៀងខ្លួនពីរបីដៃថែមទាំងទាមទារឱ្យសងការខូចខាតទៅគេ។ ដោយនៅជាប់នឹងខ្លួនមិនមានប្រាក់ក៏សំពះសុំអង្វរថាអត់មានប្រាក់ទេ ប៉ុន្ដែភាគីអ្នកបង្កប្រាប់ថា បើអត់មានលុយឡើងជិះម៉ូតូជាមួយគេយកម៉ូតូទៅបញ្ចាំដើម្បីបានប្រាក់ឱ្យគេ។ ស្របពេលនោះប្រជាពលរដ្ឋដែលមានទីលំនៅជិតកន្លែងកើតហេតុនាំគ្នាចេញមកមើលបានចាប់ទាញខ្លួនឱ្យចុះពីលើម៉ូតូវិញប្រាប់មិនឱ្យទៅជាមួយគេទេ ។
ពេលនោះអ្នកឃើញហេតុការណ៍បានទូរស័ព្ទហៅសមត្ថកិច្ចមកជួយអន្ដរាគមន៍។ មុនពេលសមត្ថកិច្ចទៅដល់ជនបង្កបានគំរាមយកទូរស័ព្ទដៃនិងសោម៉ូតូរបស់ជនរងគ្រោះរួចនាំគ្នាជិះម៉ូតូគេចទៅបាត់។ សមត្ថកិច្ចជួយឆ្កឹះសោទម្រាំតែរួចសម្រាប់ឱ្យជនរងគ្រោះជិះម៉ូតូត្រឡប់ទៅផ្ទះវិញ៕
ដកស្រង់ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
