ម៉ូ​ណា​កូ​ក្លិប​ ប្រមូល​​ផ្តុំ​ដោយ​ក្មេង​ស្ទាវ​ប្រុស​ស្រី ​វាយ​​កាប់​ចាក់​គ្នា​បង្ក​ភាព​អាណា​ធិប​តេយ្យ​ អា​ជ្ញា​ធរ​គ្មាន​វិធាន​ការ​

រាជធានីភ្នំពេញ ៖ ប្រជាពលរដ្ឋដែលរស់នៅ តាមបណ្តោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ បានធ្វើការរិះគន់យ៉ាងខ្លាំង ទៅលើក្លិបម៉ូណាកូ ថា មានក្មេងស្ទាវប្រុសស្រីជាច្រើន ពពាក់ពពូនគ្នាចូលលេងកម្សាន្ត សប្បាយ ផឹកស៊ីស្រវឹង ហើយពេលចេញមកវិញ តែងតែបង្កជម្លោះវាយកាប់ចាក់គ្នា បង្កភាពអាណាធិបតេយ្យពេញតាមដងផ្លូវ ស្ទើរតែរាល់យប់រាល់ថ្ងៃ ប៉ុន្តែ មិនដែលមានឃើញសមត្ថកិច្ច ឬអាជ្ញាធរមូលដ្ឋានណា ចាត់វិធានការអ្វីឡើយ ។

គួររំលឹកថា កាលពី ១ឆ្នាំ មុន ក្លិបម៉ូណាកូនេះ ធ្លាប់មានករណីសន្តិសុខក្នុងក្លិបវាយយុវជន ៣នាក់ ឱ្យរងរបួសធ្ងន់សន្លប់ក្នុងក្លិប ហើយត្រូវបានអាជ្ញាធរខណ្ឌសែនសុខ ព្រមាននឹងធ្វើការបិទក្លិបម៉ូណាកូ ដោយឱ្យធ្វើកិច្ចសន្យា ប្រសិនជាមានករណីវាយកាប់ចាក់គ្នា កើតឡើងម្តងទៀត ប៉ុន្តែ ជាញឹកញយដងក្លិបមួយនេះ តែងតែមានសកម្មភាពវាយតប់គ្នា បង្កភាពអាណាធិបតេយ្យជាដដែល ក៏នៅមិនឃើញមានសមត្ថកិច្ច ឬអាជ្ញាធរមូលដ្ឋានណា ចុះមកបិទក្លិបមួយនេះ ដូចការព្រមានឡើយ ។

ប្រជាពលរដ្ឋ ដែលរស់នៅចំណុចខាងលើ បានសំណូមពរយ៉ាងទទូចថា សុំឱ្យសមត្ថកិច្ច និងអាជ្ញាធរមូលដ្ឋាន មេត្តាយកចិត្តទុកដាក់ចំពោះសកម្មភាពបង្ក ភាពអាណាធិបតេយ្យរបស់ក្លិបម៉ូណាកូផង ៕